Янка Брыль: Працяг сустрэч

Па заказе і пры фінансавай падтрымцы Міністэрства інфармацыі Рэспублікі Беларусь выдавецтва «Мастацкая літаратура» прадаўжае выданне Збору твораў Янкі БРЫЛЯ (1917 — 2006) ў дзесяці тамах. Пабачыў свет восьмы том.

Выданне рыхтуецца ў Інстытуце літаратуразнаўства імя Янкі Купалы, які ўваходзіць у склад Цэнтра даследванняў беларускай культуры, мовы і літаратуры Нацыянальнай акадэміі навук Беларусі. Склад рэдакцыйнай калегіі выдання наступны: А. І. Лакотка, І. В. Саверчанка, Н. І. Семашкевіч, В. А. Шніп, А. А. Васілевіч. Рэдактар восьмага тома — А. А. Васілевіч. Падрыхтоўка тэкстаў і каментарыі да тома Вольгі Карачун і Валерыя Назарава. У восьмы том увайшлі 15 нарысаў і 20 літаратурных партрэтаў, створаных пісьменнікам за амаль паўстагоддзя (1955 — 1998). З выдавецкай анатацыі да восьмага тома: «Аўтар шчодра дзеліцца з чытачом неардынарнымі інтэлектуальнымі і ідэйна-светапогляднымі набыткамі, багатым жыццёвым досведам, вобразнымі назіраннямі, уключаючы іх у парадыгму мноства творчых стасункаў, асабістага жыцця, блізкага акружэння, значнага кола сяброў і знаёмых з Беларусі і замежжа».

Нарысы прысвечаны падарожжам Янкі Брыля па замежжы і Беларусі, асобам, якія стрэліся пісьменніку па жыцці. У першы раздзел уключаны: «Польскі дзённік» (твор напісаны па выніках падарожжа ў суседнюю краіну ў рамках дэкады беларускай культуры 30 верасня — 9 кастрычніка 1955 г.); «Павел Арсеньевіч» (нарыс расказвае пра Паўла Арсеньевіча Жалезняковіча, першага сакратара Любчанскага райкама КП Беларусі, партызанскага камісара, дзеяча камуністычнага падполля ў час акупацыі Беларусі панскай Польшчай), «На тым баку планеты» (з канадскіх уражанняў лета 1960 г.), «Волга ўпадае...» (паводле ўражанняў падчас падарожжа па Волзе ў 1967 г.), «Душа — не падарожніца» (паводле ўражанняў ад 16-дзённага наведвання пісьменнікам поўдня Індыі ў 1967 г.), «Хвалі і сосны» (аб падарожжы ў Ялту), «Знаёмства з ГДР» (падарожжа 1969 г.), «У нас в горах...» (з нагоды святкавання 100-гадовага юбілею з дня нараджэння армянскага пісьменніка Аванеса Туманяна на яго радзіме ў 1969 г.) і іншыя не меней цікавыя творы.

У літаратурным, літаратурна-крытычным раздзеле восьмага тома чытача чакаюць сустрэчы з Валянцінам Таўлаем, Міхасём Лыньковым, Алесем Адамовічам і яшчэ з многімі пісьменнікамі розных пакаленняў, з якім Янку Брыля звязвалі зацікаўленне, захапленне іх творчасцю, а часам і добрае, шчырае сяброўства.

Тыраж выдання — 600 экзэмпляраў. Таму спяшайцеся набыць восьмы том Збору твораў народнага пісьменніка Беларусі Янкі Брыля. Гэты кніжны набытак — на гады. Знаёмства з нарысамі і літаратурнымі партрэтамі сапраўднага класіка беларускай літаратуры дапаможа па-новаму зірнуць на аўтара рамана «Птушкі і гнёзды» і многіх іншых мастацкіх твораў, якія надоўга застануцца ў біяграфіі беларускага прыгожага пісьменства.

Мікола БЕРЛЕЖ