Новую бальніцу ў Лунінцы збудавалі ў 2010-м. Сёння яна абслугоўвае больш як 62,5 тысячы мясцовых жыхароў. Летась тут мадэрнізавалі кабінет камп’ютарнай тамаграфіі, на што пайшло 1 млн 530 тыс. рублёў. За кошт рэспубліканскага бюджэту купілі новы 128-спіральны КТ апарат «ВЕНТУМ», а за кошт мясцовага адрамантавалі сам пакой. Бліжэйшым часам тут павінен адкрыцца рэнтген-кабінет, а ў мадэрнізаваных спецыялізаваных кабінетах, як плануецца, з’явяцца рэнтген-апараты: мамограф і флюарограф.
У ковідныя часы архіважнай задачай для бальніцы стала рэканструкцыя інфекцыйнага блока. Цяпер гэта асобны будынак, дзе да кожнага ложка-месца падаецца кісларод, падзялілася Святлана Хлебус, галоўны ўрач Лунінецкай цэнтральнай раённай бальніцы:
— Падчас пандэміі, асабліва ў перыяд дэльта-хвалі, мы перажывалі, каб яго прывозілі з Пінска своечасова. Цяпер на тэрыторыі бальніцы будуецца кіслародна-размеркавальная станцыя — і ў нас будзе ўласны кісларод (1000 літраў за хвіліну), які мы падвядзём да кожнага ложка па ўсёй бальніцы.
У аддзяленні гемадыялізу, якое пачало працаваць адразу з адкрыццём новага будынка, спачатку было дзевяць пацыентаў: мясцовых і з Ганцавіцкага раёна. У 2017-м ужо толькі сваіх раённых было 33 чалавекі, аддзяленне працавала ў тры змены, і ганцавіцкім прыйшлося ездзіць лячыцца ў Баранавічы, успамінае Алена Казун, загадчык аддзялення гемадыялізу:
— Цяпер мы працуем у дзве змены і абслугоўваем 21 чалавека. Максімальная загружанасць — шэсць апаратаў у змену. Яны прызначаны для рознага тыпу дыялізу. У залежнасці ад паказчыкаў пацыенты прыязджаюць да нас хто праз дзень, хто чатыры разы на тыдні (у асноўным тыя, чыя вага большая за 100 кілаграмаў). Прывозяць і адвозяць людзей бясплатна на нашым санітарным транспарце. Для пацыентаў з тэрмінальнай нырачнай недастатковасцю такое лячэнне жыццёва неабходнае — без працэдур іх не стане дзён праз пяць.
Мясцовая хірургія і лапараскапічныя аперацыі (шляхам праколвання тканак, без разразання) — таксама нагода для гонару. Усе хірургі і рэаніматолагі маюць вышэйшую катэгорыю. А ў 2020-м лунінецкія дактары прайшлі курс навучання па эндаскапіі ў сімуляцыйным цэнтры Рэспубліканскага клінічнага медцэнтра Кіраўніцтва справамі Прэзідэнта, што пашырыла спектр паслуг і магчымасці аказання высокатэхналагічнай дапамогі, расказаў урач-хірург Аляксандр Петруковіч:
— За няпоўныя тры гады мы зрабілі ўжо каля 150 падобных аперацый. Лапараскапія — спосаб мінімальна траўматычны для пацыента, які забяспечвае яго кароткатэрміновае знаходжанне ў бальніцы (два-тры дні), а ўжо праз два тыдні чалавек можа займацца сваёй звычайнай дзейнасцю і нават спортам. З медыцынскага пункту гледжання лапараскапічныя аперацыі пры пахвіннай грыжы, якія мы робім лапараскапічным метадам (да 80% выпадкаў), бадай што нічым не адрозніваюцца ад пластыкі па Ліхтэнштэйну, якая лічыцца залатым стандартам у лячэнні пахвінных грыж. Так што мы стараемся паспяваць за сусветнымі тэндэнцыямі. Звычайным спосабам робяцца аперацыі тым, каму лапараскапія супрацьпаказана.
А яшчэ ў бальніцы пад мясцовай анестэзіяй робяць лазернае выдаленне вен — у Брэсцкім рэгіёне такія аперацыі робяць толькі ў абласной бальніцы. Адразу пасля працэдуры пацыент пачынае хадзіць, а на наступны дзень вяртаецца да работы.
43 населеныя пункты Лунінецкага раёна — тэрыторыя, якая пацярпела ад Чарнобыльскай аварыі, і некаторыя мясціны дагэтуль лічацца забруджанымі. Іх жыхары абавязкова штогод праходзяць дадатковы аб’ём абследаванняў, у прыватнасці абавязковае ўльтрагукавое даследаванне шчытападобнай залозы.
Ірына СІДАРОК
Фота Яўгена ПЯСЕЦКАГА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
