У Кітаі выдзелілі 320 мільёнаў юаняў для ліквідацыі наступстваў паводак

Міністэрства фінансаў КНР сумесна з Міністэрствам па кіраванні надзвычайнымі сітуацыямі КНР прынялі рашэнне аб выдзяленні 320 мільёнаў юаняў (каля 44 млн долараў), якія будуць накіраваны на правядзенне работ па ліквідацыі наступстваў паводак і геалагічных катастроф у горадзе Чунцын, правінцыі Сычуань на паўднёвым захадзе Кітая і ў іншых раёнах краіны, перадае «Жэньмінь жыбаа» анлайн».

У прыватнасці, 250 мільёнаў юаняў будуць накіраваны на супрацьпаводкавыя работы і ліквідацыю наступстваў стыхійных бедстваў, а астатнія 70 млн юаняў — на ліквідацыю наступстваў геалагічных бедстваў, адзначаецца ў заяве Міністэрства фінансаў КНР. Выдзеленыя сродкі таксама будуць накіраваны на правядзенне аварыйна-выратавальных работ і ліквідацыю наступстваў стыхійных бедстваў, галоўным чынам на пошук, выратаванне і перамяшчэнне пацярпелых людзей, а таксама на выяўленне і прадухіленне пагрозы другасных бедстваў і аднаўленне пашкоджаных дамоў.

Гэты крок быў зроблены ў сувязі з тым, што на рэгіёны краіны, уключаючы горад Чунцын, абрынуліся працяглыя залевы, што прывяло да вялікіх ахвяр і значнай матэрыяльнай шкоды.