У Цэнтральным батанічным садзе НАН Беларусі размясціўся інтэрактыўны арт-аб’ект «Нулявая экспазіцыя». Выстаўка ўяўляе сабой люстэркі, асноўная ідэя якіх — паказаць, які ўплыў аказвае чалавек на розныя экалагічныя працэсы. Пабачыць экспанаты наведвальнікі змогуць да 30 верасня.
Арт-аб’ект састаіць з шасці люстэрак. Кожнае з іх сімвалізуе асобнае экалагічнае альбо сацыяльнае пытанне, якія тычацца выкарыстання вады, забруджвання глебы і атмасферы, утылізацыі адходаў, безадказнага спажывання алкаголю і невыканання правілаў бяспекі. Калі хтосьці захоча даведацца падрабязней пра арт-аб’екты, у гэтым дапаможа QR-код, што мае кожны экспанат.
Як паведамляе адзін са стваральнікаў арт-аб’ектаў, старшыня манументальнай секцыі Беларускага саюза мастакоў, аўтар інклюзіўных праектаў Васіль Зянько, рэалізацыя гэтай ідэі пачалася яшчэ ў мае. Было вельмі важна адлюстраваць асноўную задумку праекта: гледзячы ў люстэрка, людзі бачаць галоўнага вінаватага цяперашняй экалагічнай сітуацыі ў свеце і адначасова галоўнага выратавальніка Зямлі.
— Нам хацелася, каб, гледзячы на сваё адлюстраванне, чалавек задаваў сабе пытанне: «А што менавіта я зрабіў дзеля таго, каб палепшыць гэты свет?». Калі адказ чалавека не задаволіць, наша выстаўка будзе невялікім, але такім важным штуршком, каб змяніць нешта да лепшага, — перакананы Васіль Зянько. — Праект сімвалічна называецца менавіта «Нулявая экспазіцыя», бо хацелася б, каб шкода, якую чалавек наносіць экалогіі, імкнулася «да нуля».
Сярод усіх экспазіцый мастак асабліва выдзяліў люстэрка з подпісам «Гэта той, хто павінен цябе берагчы!» На яго думку, гэта экспазіцыя найбольш дакладна адлюстроўвае галоўную ідэю праекта і той пасыл, які хацелі данесці аўтары.
— Сярод астаткіх арт-аб’ектаў таксама вылучу экспазіцыю з пластыкавымі дзіцячымі цацкамі. Мне прыйшлося некалькі разоў ездзіць у краму за «матэрыялам»: яго заўсёды было мала, — удакладняе мастак.
Аўтары лічаць, што дадзены інтэрактыўны арт-аб’ект не пакіне раўнадушнымі мінчан і гасцей сталіцы, бо цікавага ў гэтай выстаўке шмат: пачынаючы ад месца яе размяшчэння і заканчваючы тэмамі, якія арганізатары ў ёй паднімаюць. Але варта наведаць гэтую арыгінальную экспазіцыю нават і дзеля таго, каб захапіцца гульнёй прасторы і люстэрка, паназіраць, як прыгожа ў новых экспанатах адлюстроўваецца неба і расліны, быццам ландшафт сада крочыў па той бок люстраной прасторы.
Тэкст Кацярыны КУРДО
Фота Віктара ІВАНЧЫКАВА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».