Рабочы графік Прэзідэнта Беларусі заўсёды вельмі насычаны падзеямі. Аляксандр Лукашэнка праводзіць нарады і рабочыя сустрэчы па найбольш актуальных пытаннях развіцця краіны, рэгулярна бывае ў рэгіёнах, робіць замежныя візіты і сам прымае замежных гасцей, размаўляе з журналістамі, падпісвае ўказы і законы. І нават калі публічных мерапрыемстваў няма, гэта зусім не значыць, што кіраўнік дзяржавы не працуе. Дарэчы, і падчас адпачынку, ці то хакейная трэніроўка або рубка дроў, Аляксандр Лукашэнка не-не ды і знойдзе падставу для чарговага даручэння. Як ён любіць гаварыць, трэба ва ўсім ісці ад жыцця.
Праект БелТА «Тыдзень Прэзідэнта» для тых, хто хоча ісці ў нагу з кіраўніком дзяржавы, быць у курсе самых актуальных заяў і рашэнняў беларускага лідара.
Рабочы візіт Аляксандра Лукашэнкі ў Расію пачаўся яшчэ 22 ліпеня, у суботу, а ў нядзелю, 23 ліпеня, кіраўнікі дзяржаў правялі афіцыйную частку перагавораў у Канстанцінаўскім палацы ў Санкт-Пецярбургу, разам наведалі славутыя мясціны ў Кранштаце. Аб гэтым БЕЛТА падрабязна інфармавала, у тым ліку ў мінулым выпуску спецпраекта.
Аднак прэзідэнты прадоўжылі плённую сустрэчу і ў наступныя дні. Камандзіроўка беларускага лідара завяршылася толькі ў аўторак, і абодва гэтыя дні таксама былі насычаны перагаворамі з Уладзімірам Пуціным, хоць і многае з гэтага па зразумелых прычынах засталося за кадрам. У наш час менавіта ў такім фармаце абмяркоўваюцца самыя сур’ёзныя пытанні. І гэта быў найбольш важны складнік паездкі.
Лідары краін сустракаліся ў другой палове дня ў нядзелю, у панядзелак, сумясціўшы гэта з паездкай на Валаам, і нават раніцай у аўторак, 25 ліпеня, да адлёту Аляксандра Лукашэнкі. Па селектары на сувязі былі службовыя асобы, адказныя за розныя напрамкі. Гэта таксама звычайная практыка. Але ў асноўным прэзідэнты размаўлялі сам-насам.
Як ужо адзначалася, у цесным перагаворным графіку кіраўнікі дзяржаў знайшлі час абстрагавацца ад свецкіх пытанняў на карысць спраў духоўных. У Кранштаце Аляксандр Лукашэнка і Уладзімір Пуцін акрамя Музейна-гістарычнага парку «Востраў фартоў» наведалі стаўрапігіяльны Мікольскі марскі сабор. Гэта галоўны храм Ваенна-марскога флоту Расіі.
На наступны дзень прэзідэнты разам наведалі Спаса-Праабражэнскі Валаамскі мужчынскі манастыр, размешчаны на востраве Валаам (Ладажскае возера) у Карэліі. У саборы яны пакланіліся мошчам прападобных Сергія і Германа — заснавальнікаў манастыра. Кіраўнікі дзяржаў таксама наведалі Свята-Уладзімірскі скіт, дзе размешчана Уладзімірская царква.
Валаамскі манастыр — адзін з самых шануемых у Расіі. Штогод яго наведваюць больш як 100 тыс. паломнікаў і турыстаў. Папярэдні раз кіраўнікі дзяржаў былі на Валааме ў ліпені 2019 года.
Ход уборачнай кампаніі і кадравае пытанне ў Міністэрстве сельскай гаспадаркі і харчавання — гэта былі галоўныя пытанні 27 ліпеня на дакладзе Прэзідэнту віцэ-прэм’ера Леаніда Зайца.
«Галоўнае пытанне — як на палях у нас сёння сітуацыя, як складваецца ўборка ўраджаю? Другое пытанне — кадравае. Вы за гэты тыдзень павінны былі ўнесці кандыдатуру міністра сельскай гаспадаркі (цяперашні кіраўнік Мінсельгасхарча Ігар Брыло зойме пасаду памочніка Прэзідэнта ў Віцебскай вобласці. — Заўвага БЕЛТА). Я хацеў бы пачуць ваша меркаванне. А ў бліжэйшы час я пастараюся пабыць (у рэгіёнах. — Заўвага БЕЛТА). У мяне ў плане захад паглядзець. Якраз зона тваёй адказнасці — Гродзенская вобласць. Паглядзім, магчыма, Брэсцкую вобласць. Цэлы комплекс работ Міністэрства сельскай гаспадаркі», — сказаў кіраўнік дзяржавы.
Леанід Заяц далажыў Прэзідэнту аб тэмпах уборачнай кампаніі, стане тэхнікі. «Тэхнічная гатоўнасць вельмі высокая, камбайны спраўныя, сушыльная гаспадарка працуе на ўсе 100 працэнтаў. Чакаем на краі поля добрых умоў і пачынаем уборку. Кожную гадзіну выкарыстоўваем для таго, каб можна было ўбраць хлеб. Тэхнічных магчымасцей і людскіх рэсурсаў дастаткова для таго, каб убраць усё своечасова і без страт», — запэўніў віцэ-прэм’ер у размове з журналістамі.
На ўзроўні ўрада і кіраўніка дзяржавы прыняты ўсе неабходныя рашэнні для арганізацыі ўборкі збожжавых культур, у тым ліку па забеспячэнні сельгасарганізацый палівам, запчасткамі для тэхнікі, дадатковым аўтатранспартам.
У час рабочай сустрэчы нечакана хуткае прадаўжэнне атрымала нядаўняе даручэнне Аляксандра Лукашэнкі асвоіць у Беларусі вытворчасць цукерак з прасаванага сухога малака. Такія ласункі вельмі папулярныя ў Кітаі.
Чыноўнікі хутка адрэагавалі на даручэнне Прэзідэнта, і ўжо выпушчана пробная партыя. Для аператыўнасці эксперыменту рабілася гэта на медыцынскім абсталяванні, а таму і цукеркі пакуль выйшлі ў форме вялікіх таблетак, але гэта, як кажуць, толькі пачатак.
«У Кітаі мы падгледзелі іх тэхналогіі вытворчасці розных кандытарскіх вырабаў, у дадзеным выпадку цукерак. Наогул без цукру з сухога малака. Можна дабаўляць туды якія-небудзь раслінныя дабаўкі. Асабліва для дзяцей, — пацікавіўся кіраўнік дзяржавы на сустрэчы. — Шчыра кажучы, калі Мікалай (сын Аляксандра Лукашэнкі. — Заўвага БЕЛТА) прывёз мне іх з Кітая, я пакаштаваў сам. Вядома, гэта не для мяне. Але дзеці, маленькія дзеці з вялікім задавальненнем спажываюць гэты ласунак. Чаму мы не можам рабіць гэта і прадаваць? І, галоўнае, сваіх людзей забяспечыць».
Леанід Заяц прынёс адразу некалькі варыянтаў цукерак. У саставе сухое натуральнае малако, да 40 працэнтаў дзіцячага харчавання, сыроватка. «Розны састаў. Але вельмі прыемныя на смак, і для спажыўца даволі нядрэнны прадукт, — сказаў ён. — Тут вось парэчка дабаўлена. Тут аскарбінавая кіслата. Дзве такія таблетачкі на кубак цёплай вады — як малако. Прыемна спажываць. Салодзенькія».
Аляксандр Лукашэнка ўпэўнены, што ў такіх натуральных цукерак можа быць і добры экспартны патэнцыял. І гэта не толькі Кітай, дзе такія ласункі папулярныя ўжо, але і, напрыклад, краіны Афрыкі, пацвердзіў віцэ-прэм’ер.
Леанід Заяц запэўніў, што складанасці ў вытворчасці такіх цукерак ніякай няма. Але, зразумела, неабходна апрабаваць лінію, прадумаць фасоўку, выбудаваць маркетынг, а недзе і дапрацаваць рэцэптуру.
«Трэба, каб пакаштавалі дзеці, дарослыя. Трэба зрабіць дастатковую колькасць і апрабаваць», — рэзюмаваў беларускі лідар.
Прэзідэнт паставіў задачу да канца бягучага года наладзіць у Беларусі масавую вытворчасць такіх цукерак.
Яшчэ адна сустрэча 27 ліпеня ў Прэзідэнта адбылася з пастаянным прадстаўніком Беларусі ў ААН Валянцінам Рыбаковым.
«ААН. Што гэта такое на сённяшні дзень? Якія перспектывы наогул гэтай арганізацыі, на ваш пункт гледжання? Ну і нам што рабіць у гэтай арганізацыі? Зразумела, мы як адна з краін-заснавальніц гэтай арганізацыі не можам вось так спакойна глядзець на тое, што адбываецца там. Я гляджу, і мы абмяркоўвалі гэта пытанне з Прэзідэнтам Расіі, — Сакратарыят ААН, рабочы орган, — яны пачалі ўжо працаваць з пункту гледжання нейкіх пераваг адной або дзвюм дзяржавам, або Захаду-Усходу. Гэта значыць, яна неяк ужо, гэта арганізацыя, ператвараецца ў такую арганізацыю „Чаго вашай ласцы?“. Ад буйных дзяржаў больш залежыць. Гэта ненармальна. Пры тым націску, які аказваюць буйныя дзяржавы, Захад», — заявіў беларускі лідар.
Аляксандр Лукашэнка ў якасці прыкладу згадаў саміт «Расія — Афрыка», які праходзіць гэтымі днямі, і жудасны націск, які амерыканцы і краіны Заходняй Еўропы аказвалі на яго ўдзельнікаў. «Гэта ненармальна», — падкрэсліў ён.
Ён пацікавіўся работай беларускага прадстаўніцтва ў ААН, ці не фармальна яно прысутнічае там і што рэальна можа. «Напрыклад, калі заходнія дзяржавы адмовіліся фактычна супрацоўнічаць з намі, ну што ж, мы сёння дыпламатаў пераводзім на тыя напрамкі, дзе нам трэба працаваць, дзе трэба ўзмацняць сітуацыю і абстаноўку. Можа, і з Арганізацыяй Аб’яднаных Нацый так паглядзець і паставіць іх у шэраг з заходнімі дзяржавамі?» — выказаў меркаванне беларускі лідар.
Валянцін Рыбакоў на сустрэчы пацвердзіў, што крытыка ААН пачалася фактычна з моманту яе заснавання, і арганізацыю, яе сакратарыят сапраўды ёсць за што крытыкаваць. Разам з тым ААН — гэта не проста будынак або сакратарыят сам па сабе. «Разам з намі гэта 193 краіны. І Беларусь як адна з заснавальніц гэтай арганізацыі актыўна ў ёй працуе. Мы працуем у першую чаргу не з чыноўнікамі міжнароднымі. Мы працуем з дзяржавамі, якія прадстаўлены ў гэтай арганізацыі», — сказаў дыпламат.
Па выніках сустрэчы Аляксандр Лукашэнка даручыў дадаткова актывізаваць работу пастаяннага прадстаўніцтва Беларусі пры ААН. «Мы будзем гэта прадаўжаць рабіць. Ёсць шэраг напрамкаў, дзе мы вельмі паспяхова працуем. Некаторыя з гэтых напрамкаў нарадзіліся пасля выступленняў Прэзідэнта Беларусі Аляксандра Лукашэнкі. У прыватнасці, напрыклад, пытанне барацьбы з гандлем людзьмі, некаторыя іншыя пытанні. Таму мы будзем прадаўжаць актыўна працаваць, супрацоўнічаць з дзяржавамі і пашыраць нашы нацыянальныя інтарэсы», — сказаў Валянцін Рыбакоў журналістам пасля сустрэчы з кіраўніком дзяржавы.
Ён расказаў пра работу дыпламатаў, якія прыкладаюць усе намаганні, каб не дапусціць разгляду якія-небудзь негатыўных пытанняў адносна Беларусі ў Генеральнай Асамблеі або Савеце Бяспекі ААН. Адна з такіх маленькіх перамог беларускай дыпламатыі — закрыццё ў Савеце Бяспекі тэмы інцыдэнту з самалётам Ryanair. «Мы фактычна адным нашым выступленнем закрылі тэму Ryanair у Савеце Бяспекі. Наша выступленне поўнасцю паставіла кропку. У Савеце Бяспекі гэта пытанне больш не разглядалася ніколі», — адзначыў дыпламат.
Яшчэ адзін прыклад — рэзалюцыя па чарнобыльскім супрацоўніцтве. У гэтым годзе беларускі бок павінен быў прадставіць праект такой рэзалюцыі. Але, разумеючы рэгіянальную сітуацыю, мы адмовіліся гэта рабіць. «У гэты праект маглі быць унесены іншымі краінамі нейкія моманты, якія нас катэгарычна не задавольваюць. І мы апынуліся б у сітуацыі, калі мы, уносячы дакумент, вымушаны былі б потым штосьці з ім рабіць — здымаць яго з разгляду, неяк процідзейнічаць гэтым негатыўным усім аспектам. Мы не ўнеслі праект рэзалюцыі», — растлумачыў Валянцін Рыбакоў.
Затое праект рэзалюцыі па чарнобыльскім супрацоўніцтве ўнесла Украіна, практычна цалкам украўшы ў Беларусі тэкст папярэдняга праекта рэзалюцыі. «На здзіўленне Украіны і еўрапейскіх дзяржаў (для іх гэта проста была шокавая сітуацыя), мы выступілі суаўтарамі разам з Расіяй. Расія выступіла суаўтарам украінскай рэзалюцыі. Нам нават паступалі званкі ад еўрапейскіх нашых калег, якія задавалі нам пытанне: «А вы не памыліліся? Вы наогул разумееце, што робіце? Што вы выступаеце суаўтарам рэзалюцыі, якую ўнесла Украіна. — Так, вядома, разумеем. Рэзалюцыя нармальная, тэкст добры, нас задавольвае. Чаму не? Чарнобыльскае супрацоўніцтва — святая справа для нас», — расказаў Пастаянны прадстаўнік Беларусі ў ААН.
Ён звярнуў увагу, што вось такія дробныя на першы погляд перамогі на самай справе не так проста даюцца, і яны вельмі карысныя для краіны. «Мы будзем прадаўжаць гэту работу», — дадаў Валянцін Рыбакоў.
У пятніцу, 28 ліпеня, працоўны тыдзень кіраўніка дзяржавы завяршаў кадравы дзень. Ужо сама па сабе гэта навіна была інтрыгуючай, паколькі атрымлівалася, што вакантныя былі адразу тры міністэрскія пасады. Раней яны ўтварыліся ў Міністэрстве ЖКГ, Мінтрансе, а ўлічваючы анансаванае раней новае назначэнне Ігара Брыло, яшчэ і ў Мінсельгасхарчы.
Па выніках кадравага дня дзве з гэтых трох пазіцый былі закрыты. Новым міністрам ЖКГ стаў Генадзь Трубіла, а Міністэрства транспарту і камунікацый узначаліў Аляксей Ляхновіч. Абодва назначаны на гэтыя пасады пасля працы на пасадах першых намеснікаў міністраў у адпаведных ведамствах, і гэты факт Прэзідэнт адзначыў асабліва: «Акрамя задач, якія я хацеў бы перад вамі паставіць, думаю, больш важна тое, што вы лепш за мяне ведаеце, што трэба рабіць на даручаных вам участках работы».
У практыцы кадравых рашэнняў такое ў Беларусі адбываецца нячаста, каб міністрам станавіўся менавіта нехта з намеснікаў. «Мы заўсёды шукалі, падбіралі новых людзей. Каб новы чалавек прыйшоў, дасведчаны ў справе, прафесіянал, паглядзеў новымі вачамі на тое ці іншае ведамства. Але ў дадзеным выпадку я лічу, што і Генадзь Аляксеевіч, і Аляксей Аляксеевіч — людзі падрыхтаваныя. Не магу сказаць, што міністэрствы былі правалены і былыя міністры дрэнна працавалі. Таму мы і спыніліся на кандыдатурах намеснікаў», — сказаў Аляксандр Лукашэнка.
Тым не менш кіраўнік дзяржавы перад кожным паставіў шэраг задач.
Прэзідэнт таксама ўзгадніў шэраг іншых назначэнняў, уключаючы кіраўніцтва ключавых для краіны прадпрыемстваў. Многіх Аляксандр Лукашэнка дэталёва распытаў не толькі аб іх планах на новай пасадзе, але і аб тым, як ідуць справы на іх папярэднім месцы працы.
Аляксандр Лукашэнка нагадаў, што не раз гучалі прапановы ліквідаваць Міністэрства ЖКГ — далучыць або размеркаваць яго функцыі і паўнамоцтвы паміж іншымі ведамствамі. Але кіраўнік дзяржавы супраць такога падыходу, паколькі на першым месцы ў зваротах ад грамадзян, якія паступаюць у Адміністрацыю Прэзідэнта, менавіта пытанні жыллёва-камунальнай гаспадаркі.
«Я чакаю ад міністэрства, па-першае, каб яно было бачна. Разумееце, пра што гаворка. І, па-другое, каб гэта міністэрства нарэшце даказала, што яму быць. Што Міністэрства жыллёва-камунальнай гаспадаркі ў краіне патрэбна, — сказаў Аляксандр Лукашэнка, звяртаючыся да новага міністра. — Вы павінны прыўносіць навінкі ў гэту сістэму, жорстка кантраляваць выкананне ўсяго функцыяналу, які ўскладзены на мясцовыя органы ўлады і іншыя арганізацыі. І хацелася б, каб гэтых скаргаў было менш. Я разумею, што заўсёды так было. Заўсёды чагосьці не хапала — то агароджу не адрамантавалі, то дах, то балкон».
Прэзідэнт звярнуў увагу, што трэба дакладна падзяліць абавязкі і вызначыць, дзе павінна падключацца сфера ЖКГ.
«Што датычыцца Міністэрства транспарту і камунікацый, ну вы ведаеце, што ў нас і ўнутры краіны хапае пытанняў. І ва ўзаемаадносінах з нашымі галоўнымі партнёрамі. І Расія, і Кітай. Асабліва Расія — транзіт і гэтак далей. Шмат пытанняў, якія ёсць», — сказаў кіраўнік дзяржавы.
Ён адзначыў, што адпаведныя пытанні абмяркоўваліся і на нядаўняй сустрэчы з Прэзідэнтам Расіі Уладзімірам Пуціным. «Я Галоўчанку (прэм’ер-міністр Беларусі Раман Галоўчанка. — Заўвага БелТА) пасля апошняй сустрэчы з Прэзідэнтам Расіі выклаў нашы падыходы, дамоўленасці. Нідзе няма адхілення. Ваша справа працаваць», — падкрэсліў Аляксандр Лукашэнка.
«Трэба дамаўляцца. Таму што лагістыка ўскладнілася і тарыфы, дапусцім, на нашы тавары — гэта пытанне сур’ёзнае. Нам пажадана, каб гэтыя тарыфы (на транспарціроўку і перавалку грузаў. — Заўвага БелТА) былі меншыя. Каб прадпрыемствы з-за лагістыкі не ляглі і страту не цярпелі. Ну і таксама рухомы састаў, іншыя пытанні. Вельмі шмат пытанняў з перавозкамі людзей. Усім гэтым трэба будзе займацца», — даў наказ Прэзідэнт.
Афіцыйна новае назначэнне атрымаў цяпер ужо былы міністр сельскай гаспадаркі і харчавання Ігар Брыло. Ён адпраўляецца працаваць памочнікам Прэзідэнта Беларусі — інспектарам па Віцебскай вобласці.
«Табе, Ігар, я ўжо гаварыў. Калі ты гэта ўспрымаеш як ссылку — гэта твае праблемы. Табе трэба прайсці гэты этап. І калі ты там возьмешся моцна, то і вынік будзе, і для цябе асабіста будзе вельмі карысны вынік. Як вучоны чалавек, як ідэалагічны работнік ад практыкі ты гэтымі якасцямі валодаеш. Цяпер трэба зазямляцца, калі ты думаеш далей працаваць. Табе да пенсіі — як да Госпада Бога. Таму трэба ўпрагацца і паказваць вынік. Гэта мая табе прапанова», — сказаў Прэзідэнт.
У сваім наказе Ігару Брыло на працу на новай пасадзе Аляксандр Лукашэнка папрасіў яго не падмяняць работу губернатара і не выконваць яго функцыі, а больш працаваць праз кадры. «Калі трэба, дакладвай мне непасрэдна. Ты ведаеш, я там часта бываю. У любы час або патэлефануеш, або даложыш. Але Віцебскую вобласць трэба ставіць на тое месца, на якім яна павінна стаяць. Сітуацыя няпростая. Лепш за ўсіх гэта разумееш. Ды і сам быў адказным (за Віцебскую вобласць. — Заўвага БЕЛТА). Таму трэба папрацаваць там з поўнай аддачай», — даручыў беларускі лідар.
Пры ўзгадненні Алега Буянава на пасаду генеральнага дырэктара Аршанскага льнокамбіната Прэзідэнт нагадаў аб важнасці лёну як «палітычнай» культуры — кветкі гэтай расліны паказаны на гербе краіны.
Новы кіраўнік расказаў аб галоўных задачах, якія бачыць у плане развіцця прадпрыемства. Гэта ўстараненне перакосаў у камерцыйнай дзейнасці, работа над сыравіннай базай, пытанні паглыбленай перапрацоўкі сыравіны.
«Карацей кажучы, з кароткага валакна порах вы зробіце», — зрабіў вывад Аляксандр Лукашэнка.
«Так, таварыш Прэзідэнт», — адказаў Алег Буянаў.
Лён сапраўды можа служыць сыравінай для вырабу пораху, і, як сцвярджаюць спецыялісты, рэчыва ў такім выпадку мае энергетыку большую, чым пры выкарыстанні традыцыйнай бавоўны.
Прэзідэнт растлумачыў, што меў на ўвазе, гаворачы пра порах. Размова ў цэлым аб тым, каб пашыраць лінейку прадукцыі на аснове льняной сыравіны. «Трэба паглядзець і шырэй — тое, што на рынку сёння запатрабавана», — сказаў ён.
Новы кіраўнік ведае сітуацыю на прадпрыемстве і гатовы працаваць. Прэзідэнт нагадаў яму і пра асаблівае стаўленне да Аршанскага льнокамбіната, на якім у свой час працавала маці Аляксандра Лукашэнкі: «Глядзіце, я там часта бываю. Гэта роднае маё прадпрыемства. Там маці ў мяне працавала. Але справа не ў тым, што гэта асабістае. Хоць усё роўна нейкая настальгія ёсць — школьнікам я там часта бываў, па гэтым ільнокамбінаце хадзіў. Вы ж ведаеце, што гэта палітычнае прадпрыемства. Мы на гербе маем лён. Таму вельмі хацелася б, каб вы там актыўна працавалі. Калі бачыце, чым можна выправіць сітуацыю ў сыравіннай базе, буду вам удзячны. Калі па экспарце, ну гэта ўжо вашы праблемы».
Аляксандр Лукашэнка нагадаў, што не трэба спісваць цяжкасці ў экспарце толькі на санкцыі, ды і з тымі ж еўрапейцамі варта прадаўжаць працаваць, паколькі льняная сыравіна і прадукцыя з яе вельмі запатрабаваны ў розных краінах. Прэзідэнт таксама паабяцаў прыехаць на прадпрыемства праз некаторы час, каб ужо на месцы дэталёва абмеркаваць стан спраў.
Аляксандр Лукашэнка арыентуе вытворцаў асвойваць новыя экспартныя напрамкі, нягледзячы на адкрытасць і даступнасць традыцыйнага для краіны расійскага рынку. Гэта тэма гучала, у прыватнасці, у размове з Віталем Асіпенкам, які ўзгоднены на пасаду генеральнага дырэктара ААТ «СветлагорскХімвалакно». Да гэтага часу ён быў першым намеснікам дырэктара — галоўным інжынерам ААТ «Гомельскі хімічны завод». Менавіта работай гэтага прадпрыемства і пацікавіўся Аляксандр Лукашэнка.
«На сённяшні дзень забяспечваем усе заяўкі спажыўцоў па мінеральных угнаеннях пад будучую пасяўную кампанію. Робім новыя маркі ўгнаенняў, — расказаў Віталь Асіпенка. — Такім чынам, усе заяўкі для ўнутранага рынку будуць поўнасцю забяспечаны».
«А што з экспартам?» — прадоўжыў задаваць пытанні Прэзідэнт.
Як расказаў Віталь Асіпенка, экспарт у асноўным ідзе на расійскі рынак. Пры гэтым прапануюцца і нішавыя прадукты, за якія не бяруцца вялікія расійскія вытворцы. «Мы знайшлі сваю нішу і прапануем унікальны прадукт — з мікраэлементамі, з дабаўкамі. З задавальненнем яго расійскі пакупнік набывае», — растлумачыў ён.
Прэзідэнт спытаў, а ці ёсць зацікаўленасць у спажыўцоў на ўнутраным рынку ў комплексных смешаных угнаеннях. «Ёсць пытанні па зацікаўленасці. Што датычыцца тэхнічнай часткі, мы зможам забяспечыць усю патрэбнасць унутранага рынку па комплексных угнаеннях», — запэўніў кіраўнік прадпрыемства.
Паводле слоў Аляксандра Лукашэнкі, у гэтым плане неабходна правільна сарыентаваць урад і ўсіх адказных. «Разумееце, яны ў глебу кідаюць асобна калій, асобна фосфар, асобна азот. Вы робіце комплексна», — растлумачыў кіраўнік дзяржавы.
«У адной грануле», — пацвердзіў Віталь Асіпенка.
«У адной грануле робяць усё. Ну і трэба закупляць. Гэта эфект дае добры. Яны ж у Расіі, у свеце прадаюць гэтыя прадукты. Але трэба ўсіх арыентаваць на тое, што нельга яйкі класці ў адзін кошык. Расія — блізкая, родная нам дзяржава. Але вы ж ведаеце, яны валодаюць гэтымі тэхналогіямі і вырабляюць гэтыя ўгнаенні. І змешаныя, комплексныя і іншыя будуць вырабляць. Таму канкурэнцыю ніхто не адмяняў. І каб нас не выціснулі з аднаго-адзінага рынку, нам трэба мець больш шырокі спектр экспарту. Гэта ваша задача», — падкрэсліў беларускі лідар.
Новы генеральны дырэктар у ААТ «Нафтан». На гэту пасаду ўзгоднены Алег Жэбін, які раней працаваў на пасадзе намесніка генеральнага дырэктара (па хімічнай вытворчасці) — дырэктарам завода «Палімір» ААТ «Нафтан».
«Нафтан» і Мазырскі НПЗ — яны пад павелічальным шклом. Глядзіце, каб у нас тут быў парадак. Нібыта ж выраўняліся там па рабоце заводы. І расіяне малайцы, Прэзідэнт Расіі. Вельмі дапамаглі«, — сказаў Аляксандр Лукашэнка.
«Сыравінай забяспечаны, стабільна працуюць», — пацвердзіў Алег Жэбін.
Прэзідэнт падкрэсліў: калі трэба больш сыравіны — гэта не праблема. Галоўнае — каб складвалася эканоміка. «Сыравіны, калі вам трэба больш, дык гэта не пытанне. Калі эканоміка будзе не горшая, а лепшая — калі ласка, з сыравінай не пытанне. Збыт таксама ёсць. Попыт велізарны. Як мяне інфармуюць экспарцёры, колькі дасце, столькі мы і прададзім, гэта значыць, у любой сітуацыі можна працаваць. Таму поспехаў вам», — сказаў Аляксандр Лукашэнка.
Сярод іншых кадравых рашэнняў Аляксандр Лукашэнка ўзгадніў кандыдатуру Юрыя Аляксея на пасаду гендырэктара кінастудыі «Беларусьфільм» і паставіў перад новым кіраўніком шэраг ключавых задач.
«Што датычыцца нашай кінавытворчасці, гэта бяда, — абазначыў праблему кіраўнік дзяржавы. — Запатрабаванне, адразу вам гавару, будзе вельмі сур’ёзнае. Чаму? Таму што колькі можна мяняць кіраўнікоў, а выніку няма! А база нядрэнная, не горшая, чым у іншых рэспубліках, у тым ліку і ў Расіі. Відаць, дзесьці мы недапрацоўвалі і ў кіраўніцтве. Магчыма, увагі менш надавалі».
Гаворачы пра ролю кінамастацтва, Аляксандр Лукашэнка нагадаў выказванне Уладзіміра Леніна: «З усіх мастацтваў важнейшым для нас з’яўляецца кіно». «Вялікі Ленін аб гэтым гаварыў, вы гэта таксама добра ведаеце. І гэта сапраўды так», — звярнуў увагу Прэзідэнт. Ён падкрэсліў, што ў ідэалагічным, выхаваўчым плане кіно не мае роўных па ступені ўздзеяння. Прычым цяпер кінафільмы глядзяць не толькі па тэлевізары, але і праз інтэрнэт.
Кіраўнік дзяржавы адзначыў, што вельмі разлічвае на актыўную работу Юрыя Аляксея на новай пасадзе, але яшчэ раз папярэдзіў, што запатрабаванне будзе жорсткае. «Трэба выдаць на-гара пэўную колькасць фільмаў — розных, для розных катэгорый, — сказаў Прэзідэнт. — Можа, пайсці па расійскім шляху. Вядома, менш бы гэтай крыві, бандытызму, забойстваў, пісталетаў, аўтаматаў, разборак і гэтак далей. Хоць і ў нас ёсць часы, якія мы павінны людзям паказаць, — што было на самай справе. Але галоўнае — актуальныя тэмы (іх таксама хапае), на базе якіх мы павінны здымаць фільмы і паказваць людзям, выхоўваючы іх».
Адзін з перспектыўных напрамкаў, які абазначыў Аляксандр Лукашэнка, — супрацоўніцтва кінастудыі «Беларусьфільм» з нацыянальнымі тэлевізійнымі каналамі, Белтэлерадыёкампаніяй. Тым больш што яны цяпер абнаўляюць матэрыяльна-тэхнічную базу, арганізуюць новыя студыі, развіваюць новыя напрамкі дзейнасці. «Таму трэба ўключацца і разам працаваць, — падкрэсліў Прэзідэнт. — Трэба аб’ядноўвацца і дзейнічаць».
Прэзідэнт узгадніў кандыдатуру Юрыя Голубева на пасаду рэктара Брэсцкага дзяржаўнага ўніверсітэта імя А.С.Пушкіна. Да назначэння ў гэту вышэйшую навучальную ўстанову ён быў прарэктарам па вучэбнай рабоце Полацкага дзяржаўнага ўніверсітэта імя Ефрасінні Полацкай. Прэзідэнт, прыгадаўшы аб тым, што не так даўно з полацкага ўніверсітэта пайшоў на іншую работу Алег Раманаў, які працаваў там рэктарам, а цяпер ідзе і Юрый Голубеў, спытаў: «Неяк мы тут пазабіралі кадры з Полацка. Не правалімся там?»
«Не. У нас моцна, надзейна ўсё», — упэўнена адказаў Юрый Голубеў.
Наконт яго назначэння рэктарам Брэсцкага дзяржаўнага ўніверсітэта імя А.С.Пушкіна кіраўнік дзяржавы заўважыў: «Я не думаю, што нейкія ў вас будуць там складанасці ў плане кіравання, падыходаў адпаведных. Вы — чалавек, які працуе і вырас на гэтым шляху. Але пытанні да гэтага ўніверсітэта былі, заўсёды былі. Я яшчэ да дэпутацкіх часоў гэта помню. Ён заўсёды неяк праходзіў у спісе нядобранадзейных. Хацелася б, каб вы, як чалавек патрыятычны, выбудавалі там сістэму так, каб моладзь разумела, дзе яна жыве і што яна павінна цаніць. Я асаблівых праблем для вас тут не бачу».
У той жа час Прэзідэнт пажадаў новаму рэктару не спыняцца ў кар’ерным росце, падкрэсліўшы, што ў сферы адукацыі заўсёды запатрабаваны прафесіяналы. «Ты ж ведаеш, што ў нас у адукацыі праблем нямала. Ідзе змена пакаленняў, таму стаўка сёння на вопытных людзей, і ніхто ад гэтага адмаўляцца не будзе», — сказаў Аляксандр Лукашэнка.
Правядзенне электаральнай кампаніі, ідэалагічныя і кадравыя пытанні сталі асноўнымі тэмамі на сустрэчы 28 ліпеня Прэзідэнта са старшынёй Савета Рэспублікі Наталляй Качанавай і кіраўніком Адміністрацыі Прэзідэнта Ігарам Сергяенкам.
Акцэнт на маючых адбыцца выбарах. «Мы ўступаем у электаральную кампанію. Яна будзе працяглай: і гэты, і наступны год, пачынаючы з мясцовых органаў улады, мясцовых Саветаў (выбары дэпутатаў мясцовых Саветаў розных узроўняў. — Заўвага БЕЛТА), Усебеларускі народны сход (новы ў нас напрамак) і заканчваючы прэзідэнцкімі выбарамі. З аднаго боку, мабілізацыя людзей і наша мабілізацыя. З іншага боку, вядома, трэба зрабіць так, каб не расхісталася краіна і грамадства, як гэта было раней», — звярнуў увагу кіраўнік дзяржавы.
Што датычыцца кадравых і ідэалагічных пытанняў, то тут шмат праблем, канстатаваў беларускі лідар. «Неяк працуем, але пажадана, каб эфектыўнасць была вышэйшай», — заўважыў Аляксандр Лукашэнка.
У Беларусі ў 2024 годзе ўпершыню пройдзе адзіны дзень галасавання, які прадугледжаны ў абноўленай Канстытуцыі. Будзе не толькі фарміравацца склад парламента, але грамадзяне таксама выберуць дэпутатаў мясцовых Саветаў розных узроўняў. Прадугледжана, што адзіны дзень галасавання праводзіцца ў апошнюю нядзелю лютага. У 2024 годзе гэта 25 лютага.
Яшчэ адна асаблівасць — фарміраванне складу Усебеларускага народнага сходу, органа, які па выніках рэферэндуму набыў у Беларусі канстытуцыйны статус. У Канстытуцыі закладзена, што пасля адзінага дня галасавання не пазней як праз 60 дзён павінна адбыцца першае пасяджэнне Усебеларускага народнага сходу. Такім чынам, апошні магчымы дзень для пачатку работы пасяджэння УНС — 25 красавіка.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
