«Людзей заўсёды цікавіць, як прадстаўніца шматдзетнай сям’і змагла дабіцца поспеху ў жыцці. Сваім прыкладам я стараюся паказаць хлопчыкам і дзяўчатам з такіх сем’яў, што ў жыцці магчыма ўсё! Калі верыць у сябе і ісці наперад, нягледзячы ні на што!» — кажа Заслужаная артыстка Рэспублікі Беларусь, спявачка Жанет.
Пра тое, у гонар каго ёй далі такое незвычайнае імя, пра мужа — аднаго з мацнейшых людзей Беларусі Паўла Сароку, пра тое, як двойчы спявачка выратавала жыццё незнаёмым, а таксама пра іншыя цікавыя і малавядомыя факты вы даведаецеся, прачытаўшы інтэрв’ю з Жанет на старонках «Алесі».
У рубрыцы «Жаночая сіла: змяняць, ствараючы» вас чакае сустрэча з намеснікам старшыні ветэранскай арганізацыі Партызанскага раёна Мінска Альбінай Пажаевай. У свае 83 гады жанчына танцуе, спявае, грае на гітары і выступае на канцэртах. Займаецца валанцёрствам: дапамагае ветэранам і дзецям. А яшчэ сочыць за модай і ведае 80 спосабаўпрыгожа завязваць шалік. Пра сакрэты яе непадуладнасці ўзросту і жыццярадаснасці, пра тое, як пасля складаных аперацый яна сама жыве напоўніцу і натхняе сваім прыкладам іншых, чытайце ў гутарцы з гэтай цікавай жанчынай, адной з пераможцаў рэспубліканскага конкурсу «Жанчына года — 2022».
Каміль Камал: «Свет без жанчыны, як дом без дзвярэй»
«Сям’я — гэта і праца, і вялікая адказнасць. Абодва, мужчына і жанчына, адказныя за трываласць свайго саюза. „Жонка“ ў даслоўным перакладзе з азербайджанскай мовы значыць „сябар жыцця“. Той, хто знайшоў сябра жыцця, — шчаслівы чалавек», — упэўнены мастак Каміль Камал.
Яго бацькі — азербайджанцы, нарадзіўся ён у Грузіі, а сям’ю стварыў у Мінску, дзе і жыве ўжо сорак гадоў. Для мастака такая біяграфія — унікальны шанец злучыць у сваёй творчасці культурныя традыцыі Беларусі і Усходу.
Сваімі развагамі пра жыццё, мастацтва, жанчын і каханне Каміль Камал падзяліўся з чытачамі часопіса.
Хто не марыць сустрэць чалавека, з якім будзеш па-сапраўднаму шчаслівы? Чаму шмат у каго гэта не атрымоўваецца? Дзе і як сёння лепей знаёміцца? Пра што трэба памятаць, калі хочаш, каб пасля першага спаткання было і другое? Якіх спадарожнікаў жыцця сёння жадаюць бачыць побач з сабой жанчыны? І пры якіх умовах можна выбудаваць шчаслівыя працяглыя адносіны? Пра гэта — гутарка з псіхолагам Наталляй Свірыдавай.
Аб новым фактары рызыкі, які адбіваецца на нашым псіхічным самаадчуванні, распавёў нейрахірург, навуковы супрацоўнік аддзялення пухлін галаўнога мозгу РНПЦ анкалогіі і медыцынскай радыялогіі ім. Н. М. Аляксандрава, выкладчык кафедры неўралогіі і нейрахірургіі БелМАПА Гарбанніджад Гумен Гушанг.
Здаецца, час жорсткіх правілаў і патрабаванняў да знешняга выгляду адышоў у нябыт. Сучасны свет моды ўсё больш памяркоўна ставіцца да таго, як чалавек апрануты. І ўсё ж такі сустракаюцца памылкі, якія відавочна паказваюць адсутнасць густу і псуюць наш вонкавы выгляд. Чаго ў сваім гардэробе лепш пазбягаць, каб не выглядаць недарэчна? На якія памылкі, промахі сучаснікаў у адзенні звяртаюць увагу спецыялісты? Сваімі назіраннямі на гэты конт дзеліцца дызайнер, магістр мастацтвазнаўства, старшы выкладчык кафедры дызайну моды факультэта сацыякультурных камунікацый БДУ Марына Машэда.
Вольга ПАКЛОНСКАЯ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
