Надвор'е. Прыпячэ да плюс 31

Як і прадказвалі айчынныя сіноптыкі, першая дэкада верасня па тэмпературным рэжыме апынулася ў асноўным на 1—3 градусы вышэй за кліматычную норму. Толькі ў асобных раёнах Віцебскай і Магілёўскай абласцей тэмпература паветра была ў межах сярэдніх шматгадовых значэнняў. Пры гэтым, паводле папярэдніх ацэнак, цёплай будзе і другая дэкада верасня. Так, у першай палове гэтага тыдня ўмовы надвор'я на тэрыторыі краіны працягне вызначаць вобласць павышанага атмасфернага ціску, пры гэтым у паўднёва-заходніх раёнах адаб'ецца ўплыў цёплай паветранай масы міжземнаморскага паходжання. Істотных ападкаў па краіне не чакаецца, а тэмпература паветра ў асноўным будзе каля на 1—4 градусы вышэй за кліматычную норму, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя.

Даволі кантраснае надвор'е чакаецца ў аўторак. У гэты дзень будзе пераважна без ападкаў. Раніцай у некаторых раёнах слабы туман і досыць холадна — месцамі па ўсходзе краіны 3—5 градусаў. Днём тэмпература паветра будзе вагацца ад плюс 23 градусаў па паўночным усходзе да плюс 29 градусаў па паўднёвым захадзе краіны.

Практычна без ападкаў і ў сераду. Уначы і раніцай у некаторых раёнах магчымы слабы туман. Тэмпература паветра ўначы будзе вагацца ад 7 градусаў па ўсходзе да плюс 17 градусаў па захадзе краіны. Днём паветра прагрэецца да 22—28 градусаў, а ў паўднёва-заходніх раёнах — да 31 цяпла.

У чацвер нас чакаюць грыбныя ападкі, таму што ўначы будзе максімальная вільготнасць. У цёмны час сутак пераважна па заходняй палове краіны, раніцай і днём на большай частцы тэрыторыі пройдуць кароткачасовыя дажджы. У некаторых раёнах навальніцы, удзень моцныя дажджы і ўзмацненне ветру парывамі да 15—20 м/с. Тэмпература паветра ўначы складзе ад 7 градусаў на ўсходзе да плюс 17 градусаў на захадзе краіны. Днём слупкі тэрмометраў пакажуць 17—24 градусы, а ў паўднёва-ўсходніх раёнах — да 28 градусаў цяпла.

Паводле папярэдняга прагнозу сіноптыкаў, у канцы тыдня фон атмасфернага ціску зноў пачне павышацца, і ападкаў будзе няшмат. У начныя і ранішнія гадзіны месцамі па краіне магчымыя непрацяглыя туманы.

У пятніцу ноччу і раніцай месцамі па краіне чакаюцца кароткачасовыя дажджы, магчымыя навальніцы. Удзень будзе пераважна без ападкаў. Уначы прагназуецца ад 8 градусаў па паўночным захадзе да плюс 16 градусаў па паўднёвым усходзе. Днём тэмпература павысіцца да 17—24 градусаў, а ў паўднёва-ўсходніх раёнах — да плюс 26 градусаў.

У суботу будзе пераважна без ападкаў. У начныя і ранішнія гадзіны ў некаторых раёнах слабы туман. Уначы чакаецца 5—11 градусаў, а месцамі — да плюс 14 градусаў. Максімальная тэмпература днём складзе 19—26 цяпла.

Сяргей КУРКАЧ

Прэв’ю: pexels.com