Бібліятэкары Гомеля распрацавалі ўнікальны электронны рэсурс пра гісторыю вайны

Бібліятэкары Гомеля распрацавалі ўнікальны электронны рэсурс аб ваеннай гісторыі першага вызваленага ад нямецка-фашысцкіх захопнікаў беларускага абласнога цэнтра. У праекце «Стужка часу: Гомель у гады Вялікай Айчыннай вайны» сабраны матэрыялы звыш 100 краязнаўчых артыкулаў. Маштабную, карпатлівую работу па зборы і алічбаванні матэрыялаў правялі супрацоўнікі Гомельскай цэнтральнай гарадской бібліятэкі імя А. І. Герцэна.

— Бібліятэкі сёння перажываюць актыўны працэс аўтаматызацыі і ўкаранення інфармацыйных тэхналогій. Наша ідэя — стварыць інфармацыйны рэсурс, дзе будуць сабраныя ўсе алічбаваныя краязнаўчыя матэрыялы бібліятэкі, — адзначыла загадчык інфармацыйна-бібліяграфічнага аддзела Гомельскай цэнтральнай гарадской бібліятэкі імя А. І. Герцэна Марына Перунова.

Спецыяліст нагадала, што 26 лістапада гамяльчане адзначаць 80-годдзе з дня вызвалення Гомеля ад нямецка-фашысцкіх захопнікаў. Праект бібліятэкараў — гэта ў тым ліку падарунак жыхарам абласнога цэнтра, якія шануюць памяць аб ваеннай гісторыі горада над Сожам.

Так, праект «Стужка часу: Гомель у гады Вялікай Айчыннай вайны» ў храналагічным парадку аднаўляе эпізоды ваеннага летапісу Гомеля. У аснове краязнаўчага рэсурсу — база даных «Гомель у друку», якая змяшчае ўсе алічбаваныя крыніцы фондаў бібліятэкі.

У рэсурсе сабрана інфармацыя аб гераічнай абароне Гомеля, Гомельскім партызанскім атрадзе «Бальшавік», сумна вядомых Дулаг-121 і гета на тэрыторыі акупаванага абласнога цэнтра. Акумулявана інфармацыя аб подзвігах адважных падпольшчыкаў і наступных жорсткіх расправах над імі падчас фашысцкай акупацыі Гомеля, адлюстраваны падзеі доўгачаканага вызвалення горада. «Стужка часу» расказвае і аб людзях, з імёнамі якіх звязана ваенная гісторыя Гомеля. Зацікавяць звесткі аб баявым шляху Ільі Кожара, Емяльяна Барыкіна, Рамана Цімафеенкі, Мікалая Піваварава і іншых партызан і падпольшчыкаў.

Электронны рэсурс рыхтаваўся сіламі спецыялістаў інфармацыйна-бібліяграфічнага аддзела і сектара аўтаматызацыі і інфармацыйных тэхналогій Гомельскай цэнтральнай гарадской бібліятэкі імя А. І. Герцэна.

Між тым стварэнне рэсурсу заняло каля чатырох месяцаў. Супрацоўнікі не толькі сабралі ўвесь неабходны матэрыял, але і самі прапрацавалі фармат падачы інфармацыі.

— Мы вывучылі інфармацыю на гэтую тэму ў інтэрнэце, зрабілі апытанне сярод маладых людзей — нашых наведвальнікаў. Ставілі задачу вызначыцца з такім фарматам падачы інфармацыі, які будзе цікавы і зручны для карыстання, — звяртае ўвагу Марына Перунова.

«Стужка часу: Гомель у гады Вялікай Айчыннай вайны» прадстаўлена на сайце сеткі публічных бібліятэк горада Гомеля. Тэкставыя блокі рэсурсу маюць спасылкі на артыкулы з перыядычных выданняў розных гадоў.

— Дастаткова перайсці па спасылцы, і можна даведацца больш аб выбраным факце, падзеі або персаналіі. Адбор дат і падзей быў самым працаёмкім працэсам падчас стварэння рэсурсу, — падзялілася загадчык інфармацыйна-бібліяграфічнага аддзела.

Спецыялісты вывучылі шмат літаратурных крыніц: кніг, публікацый, інтэрнэт артыкулаў. Таксама важна было адабраць асноўныя крыніцы інфармацыі, бо здараецца, што ў друку звесткі аб ваеннай гісторыі Гомеля паўтараюцца.

— Мы звяртаем увагу на тое, што сёння на вагу золата краязнаўчая літаратура аб гісторыі нашай малой радзімы. Мы літаральна па крупінках усё гэта зверылі, сабралі і прадставілі. Каштоўная «Кніга «Памяць: гісторыка-дакументальная хроніка гарадоў і раёнаў Беларусі» як крыніца, дзе пасля вайны былі апісаныя не толькі звесткі аб удзельніках падзей ваеннай гісторыі Гомеля, але і інтэрв’ю рэальных сведак, іх успаміны, — зазначае Марына Перунова.

— Цікава як для спецыяліста было працаваць з інфармацыяй і яе падборам у фармаце стужкі часу. Спадзяёмся, падлеткі і маладыя людзі ацэняць такі падыход, — пераканана бібліёграф інфармацыйна-бібліяграфічнага аддзела Гомельскай цэнтральнай гарадской бібліятэкі імя А. І. Герцэна Аліна Кушнярова.

— Я ў асноўным займалася графічным афармленнем самой «Стужкі часу», дызайнам тэкставых блокаў. Падчас работы адкрыла невядомыя факты пра вызваленне Гомеля, дзейнасць партызан, — дадала бібліёграф інфармацыйна-бібліяграфічнага аддзела Гомельскай цэнтральнай гарадской бібліятэкі імя А. І. Герцэна Ангеліна Луцэнка.

Спецыялісты нагадваюць, што часам у інтэрнэце людзі сутыкаюцца з недакладнай падачай інфармацыі аб вайне, наўмысным замоўчваннем падзей і некарэктнай інтэрпрэтацыяй фактаў. Таму вельмі важна, што бібліятэка адкрывае шырокаму колу чытачоў доступ да праверанай інфармацыі з афіцыйных надзейных крыніц. У гэтым асаблівая важнасць рэсурсу для моладзі, вучняў, студэнтаў, іх бацькоў.

Наталля КАПРЫЛЕНКА

Фота аўтара