Старшыня Савета Рэспублікі Наталля Качанава і мітрапаліт Мінскі і Заслаўскі Веніямін, Патрыяршы Экзарх усёй Беларусі, правялі сустрэчу са шматдзетным сем’ямі з усёй краіны. Месцам адкрытага дыялогу ўлады і бацькоў стаў горад Полацк. Мерапрыемства прайшло з мэтай умацавання статусу сям’і і сямейных каштоўнасцяў у Рэспубліцы Беларусь.
Для галоўных герояў сустрэчы — бацькоў, якія выхоўваюць трох і больш дзяцей і з’яўляюцца прыкладамі, на якіх трэба раўняцца, — зладзілі аглядавую экскурсію па горадзе — калысцы нашай дзяржаўнасці і Полацкім Спаса-Ефрасіннеўскім жаночым манастыры. Круглы стол, у якім узялі ўдзел 14 сем’яў з шасці абласцей і горада Мінска, адбыўся ў Музеі кнігадрукавання.
У пачатку адкрытага дыялогу Наталля Іванаўна адзначыла, што 11 кастрычніка ўсе члены Савета Рэспублікі правялі прамыя тэлефонныя лініі, большасць зваротаў грамадзян датычыліся традыцыйных сямейных каштоўнасцяў, у тым ліку была ўнесена прапанова прапісаць у Канстытуцыі, што шлюб магчымы толькі паміж мужчынам і жанчынай. А адзін чалавек, які звярнуўся на прамую лінію да старшыні верхняй палаты парламента, унёс прапанову на дзяржаўным узроўні ўшаноўваць сямейныя пары, якія пражылі разам 50 і больш гадоў, бо сёння такая з’ява ў нашай краіне, на жаль, рэдкасць.
Мітрапаліт Мінскі і Заслаўскі Веніямін, Патрыяршы Экзарх усёй Беларусі, расказаў, што фарміраванне традыцыйных сямейных каштоўнасцяў і ўсведамленне сям’і як фундаментальнай асновы грамадства ў дзяцей закладваюцца яшчэ ў школе. З гэтай мэтай прадстаўнікі царквы праводзяць з вучнямі духоўную работу у межах факультатыўных заняткаў, Школы актыўнага грамадзяніна. Аднак пэўную работу трэба праводзіць і па палавым выхаванні, у аснове якога павінны стаяць каханне, павага і вернасць.
«Што важна цяпер для бацькоў? Каб іх дзеці былі сумленнымі і годнымі людзьмі, цанілі і паважалі сваіх бацькоў. Сёння назіраецца тэндэнцыя хамства маладога пакалення ў адносінах да дарослых людзей, і гэта сапраўды бяда, калі сціраюцца межы разумення. Накіраваць дзяцей на правільны шлях — наша агульная задача, у тым ліку і педагогаў, якія павінны не толькі вучыць, але і выхоўваць», — падкрэсліла Наталля Качанава.
На сустрэчы сем’і дзяліліся сваімі гісторыямі, цікаваліся пра выкарыстанне сямейнага капіталу, прапаноўвалі метады прыцягнення моладзі да духоўнага стаўлення і актыўнай грамадскай дзейнасці. А сям’я Нікіціных з Гомельскай вобласці ўнесла прапанову адзначаць на дзяржаўным узроўні ордэнамі не толькі матуль, але і шматдзетных тат, якія робяць не менш важкі ўнёсак у фарміраванне сям’і, а некаторыя ўвогуле выхоўваюць дзяцей адны. Такіх сем’яў, дарэчы, у нашай краіне 53 тысячы.
Напрыканцы сустрэчы сем’ям былі ўручаны падзякі і кветкі. Заўтра святочныя мерапрыемствы напярэдадні Тыдня бацькоўскай любові ў Полацку працягнуцца. «Размова аб галоўным: шчаслівая сям’я — моцная дзяржава» з удзелам старшыні Савета Рэспублікі, сем’яў, прадстаўнікоў грамадскіх арганізацый збярэ ў старажытным горадзе каля 250 чалавек.
Аляксандра ГВОЗДЗЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.