32-ю гадавіну незалежнасці Узбекістана адзначылі ў Мінску

12 кастрычніка ў Мінску адбылося ўрачыстае мерапрыемства ў гонар 32-й гадавіны незалежнасці Узбекістана. Галоўнае нацыянальнае свята адзначаецца штогод 1 верасня.

На адкрыцці мерапрыемства часовы павераны ў справах Узбекістана ў Беларусі Рахматула Назараў заявіў, што цяпер у краіне адбываюцца гістарычныя пераўтварэнні ў палітычнай і сацыяльна-эканамічнай сферах:

— За гады незалежнасці Узбекістан сфарміраваў асновы рынкавых адносін, паспяхова ажыццяўляе дэмакратычныя рэформы ў грамадстве. Рэспубліка праводзіць свой, заснаваны на нацыянальных інтарэсах і агульнасусветных каштоўнасцях, эканамічны і знешнепалітычны курс.

Таксама часовы павераны дадаў, што ўзважаная і разумная палітыка кіраўніцтва Узбекістана забяспечвае ў краіне мір і стабільнасць.

— Сёння ў розных рэгіёнах свету ўзмацняецца рост напружанасці, — абвастраецца геапалітычнае супрацьстаянне і ўзброеныя канфлікты, — адзначыў Рахматула Назараў. — У гэтых умовах у знешняй палітыцы Узбекістан прытрымліваецца міралюбівай пазіцыі. Развіццё супрацоўніцтва з блізкімі і далёкімі краінамі на аснове ўзаемнай павагі разглядаецца ў якасці важнейшага прыярытэту.

Таксама на свяце выступіў прадстаўнік ад беларускага боку: старшыня Пастаяннай камісіі Савета Рэспублікі Нацыянальнага сходу Рэспублікі Беларусь па міжнародных справах і нацыянальнай бяспецы Сяргей Рачкоў. Ён адзначыў, што Беларусь і Узбекістан — даўнія добрыя сябры і партнёры:

— У гэтым годзе мы адзначаем 30-годдзе ўстанаўлення дыпламатычных адносін паміж нашымі краінамі. За гэты перыяд нам удалося закласці сур’ёзны фундамент беларуска-ўзбекскага супрацоўніцтва, выбудаваць трывалыя сувязі і ўзаемавыгадныя дзелавыя адносіны, развіваць узаемадзеянні ў розных сферах.

Пасля заканчэння афіцыйнай часткі ўсіх запрошаных чакалі танцавальныя нумары і дэгустацыя страў нацыянальнай кухні.

Лізавета ГОЛАД

Фота аўтара