У Мар’інагорскім агратэхнічным каледжы імя У. Лабанка прайшла сустрэча з пісьменнікам і краязнаўцам Алесем Карлюкевічам.
Аўтар цэлага шэрагу кніг пра Пухавіцкі край, яго гістарычную і літаратурна-мастацкую біяграфію расказаў пра лёсы пісьменнікаў, якія паяднаны з гэтай старонкай. У зале, дзе сабраліся першакурснікі старэйшай навучальнай установы аграпрамысловага комплексу краіны (каледж заснаваны яшчэ ў другой палове XIX стагоддзя), гучалі імёны народнага паэта Беларусі Якуба Коласа, народнага пісьменніка Беларусі Кандрата Крапівы, паэтаў, празаікаў, якія нарадзіліся на Пухавіччыне: Макара Паслядовіча, Уладзіміра Хадыкі, Васіля Гарбацэвіча, Генадзя Кляўко, Таісы Бондар...
Алесь Карлюкевіч спыніўся і на гісторыі ўзнаўлення сцэнічнага жыцця п’есы В. Гарбацэвіча «Чырвоныя кветкі Беларусі», прысвечанай славутым дукорскім партызанам, удзельнікам антыпольскай барацьбы ў Грамадзянскую вайну. Некаторы час твор гэты знаходзіўся ў забыцці. І першыя яго пастаноўкі былі здзейсненны менавіта драматычным гуртком Мар’інагорскага сельскагаспадарчага тэхнікума. Захавалася афіша спектакля, захаваліся імёны выканаўцаў роляў герояў п’есы, прысвечанай моладзі, якая не скарылася пад гнётам акупацыі.
У час віртуальнай вандроўкі па літаратурнай памяці Пухавіцкага раёна і горада Мар’іна Горка гучалі назвы многіх паселішчаў, у тым ліку — і спаленых фашыстамі вёсак Беразянка і Прыстань. Госць будучых спецыялістаў, будучых кіраўнікоў прадпрыемстваў АПК расказаў і пра мастацкае ўвасабленне лёсаў гэтых паселішчаў, іх жыхароў у творчасці Якуба Коласа, Яніны Крайнік, Генадзя Кляўко.
— Мы рады гэтай сустрэчы, — зазначыла настаўніца беларускай мовы і літаратуры аграрнага каледжа Алена Свірыдава. — Алесь Мікалаевіч не ўпершыню выступае ў нашай навучальнай установе. Частыя госці ў нас — і іншыя пісьменнікі, сярод якіх і дырэктар выдавецтва «Мастацкая літаратура» паэт і празаік Алесь Бадак, і галоўны рэдактар часопіса «Полымя» паэт Віктар Шніп. А я на ўроках беларускай літаратуры расказваю навучэнцам, што ў нашым каледжы вучыўся лаўрэат Дзяржаўнай прэміі Рэспублікі Беларусь празаік і публіцыст Уладзімір Глушакоў, у сельскагаспадарчым тэхнікуме доўгія гады працаваў выкладчыкам паэт-сатырык Захар Бірала... Спадзяюся, што дзякуючы сучасным пісьменнікам краіны моладзь, якая сёння вучыцца ў каледжы, адкрые многія старонкі беларускай літаратуры.
Сяргей ШЫЧКО
Прэв’ю: pexels.com
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
