Турнір у Мінску сабраў лепшых юных баксёраў з васьмі краін

Юныя баксёры праверылі свае сілы на адным з самых важных стартаў сезона. У Мінску прайшоў Адкрыты кубак Мінска па боксе Minsk Open памяці Заслужанага трэнера Рэспублікі Беларусь Уладзіміра Батвініка. Турнір традыцыйны і кожны год яго геаграфія і ўзровень спартсменаў толькі расце. Сярод пераможцаў і гаспадары, прадстаўнікі каманды Беларусі.Анастасія Смолкіна і Наталля Насачова перамаглі ў вагавых катэгорыях 52 кг і 57 кг адпаведна. Марыя Блізнюк заваявала залаты медаль ў вагавай катэгорыі 60 кг. Такім чынам, у кожнай з трох вагавых катэгорый эаночых спаборніцтваў на першым месцы — беларускія спартсменкі.

Сёлета на мінскім рынгу сустрэліся 142 спартсмены з васьмі краін ва ўзросце 15-16 гадоў. Як адзначаюць спецыялісты, у гэтым узросце ўжо можна ацэньваць перспектывы баксёра ў спорце вышэйшых дасягненняў. 

Што тычыцца хлопцаў, то Сяргей Заяц перамог у катэгорыі да 46 кг, Данііл Калістаў — да 52 кг, Аляксей Казусеў — да 54 кг. Андрэй Мацкевіч стаў трыўмфатарам у катэгорыі да 70 кг, Анатоль Бараноўскі — лідар сярод баксёраў да 75 кг. Андрэй Румянцаў і Станіслаў Жілянін — пераможцы ў катэгорыях да 80 кг і 80 плюс кілаграм. 

«Мы імкнемся турнір кожны год рабіць цікавейшым і важным. Напрыклад, некалькі гадоў таму турнір стаў майстарскім, гэта значыць пераможцы могуць атрымаць званне майстра спорту, яшчэ праз нейкі час мы ўключылі ў праграму спаборніцтваў дзяўчат. У гэтым годзе мы зрабілі вялікі крок — адным з арганізатараў турніру стаў Прэзідэнцкі спартыўны клуб. Ён вялікую ўвагу надае дзіцячаму спорту. Мы вельмі ўдзячныя за іх клопат і за тое, што іх увага будзе прыкавана цяпер яшчэ і да бокса. Вельмі хочацца падзякаваць СДЮШАР па боксе і скалалажанні Мінскага гарвыканкама за арганізацыю турніра. Кожны год з-за ўсяго, што адбываецца ў свеце, мы асцерагаемся, што нешта можа не атрымацца. Але з кожным годам мы пераконваемся ў тым, што спорт — гэта лепшая дыпламатыя. Гэта пацвярджае прысутнасць 8 краін. Да нас упершыню прыехалі спартсмены са Швейцарыі. І мы будзем працягваць умацоўваць з імі адносіны. Калі мы паглядзім у цэлым на ўзровень удзельнікаў, то яна на вышыні. Акрамя нацыянальнай зборнай Беларусі па юніёрам, сваю нацыянальную зборную прывезла каманда Узбекістана, гэта лідары ў сусветным боксе. Спартсмены з Расіі, Азербайджана таксама вельмі моцныя. І тое, што прыехалі спартоўцы з Літвы і Польшчы нас вельмі радуе», — адзначыў выканаўчы дырэктар Беларускай федэрацыі бокса Дзяніс Сабалеўскі. 

Валерыя СЦЯЦКО

Фота Лізавета ГОЛАД