Сярэдняя тэмпература паветра другога месяца восені ў нашай краіне склала 8 цяпла, што вышэй за кліматычную норму на 1,2 градуса. А, па падліках спецыялістаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, кастрычнік бягучага года заняў 11-е месца ў ранжыраваным шэрагу назіранняў ад самага цёплага да самага халоднага, пачынаючы з 1945 года.
Па большай частцы тэрыторыі краіны адзначалася дадатная анамалія тэмпературы паветра. Яна знаходзілася ў асноўным у межах ад 0,2 да 1,6 градуса. Па крайнім паўночным усходзе была адзначана нязначная адмоўная анамалія. У абласным разрэзе найбольшыя значэнні дадатных адхіленняў тэмпературы паветра ад кліматычнай нормы адзначаны ў Брэсцкай вобласці (у сярэднім па вобласці плюс 2 градусы), а ў Віцебскай вобласці адхіленні былі найменшымі (плюс 0,3 градуса).
Як адзначаюць кліматолагі, сярэдняя тэмпература паветра ўсіх трох дэкад была вышэйшай за норму. Так, дзённыя тэмпературы паветра большую частку месяца ў асноўным складалі плюс 11–20 градусаў, у асобныя суткі паніжаючыся да плюс 10 — плюс 5 градусаў і ніжэй. Максімальнага значэння (плюс 25 градусаў) тэмпература паветра дасягнула днём 14 кастрычніка ў Драгічыне. Тэмпература паветра пераважна ўначы знаходзілася ў межах 6–11 цяпла, але ў асобныя суткі паніжалася да плюс 2–5 градусаў. У самыя халодныя ночы тэмпература паветра месцамі апускалася да адмоўных значэнняў. Мінімальная тэмпература паветра адзначана на станцыі Брагін 11 кастрычніка і склала мінус 5,7 градуса.
Устойлівы пераход сярэдняй сутачнай тэмпературы паветра праз 10 градусаў у бок паніжэння (заканчэнне перыяду актыўнай вегетацыі) адбыўся на 3–13 дзён пазней сваіх звычайных тэрмінаў — 6–8 кастрычніка, і толькі на крайнім поўдні і паўднёвым захадзе пераход наступіў 15–16 кастрычніка. Далейшае паніжэнне тэмпературы назіралася 19–26 кастрычніка, калі па паўночнай частцы краіны сярэдняя сутачная тэмпература паветра перайшла праз 5 градусаў, дадалі сіноптыкі.
За месяц у сярэднім па Беларусі выпала 83,3 міліметра ападкаў, што склала 153% кліматычнай нормы. Кастрычнік 2023 года заняў 10-е месца ў ранжыраваным шэрагу назіранняў ад самага вільготнага да самага сухога. Па большай частцы тэрыторыі краіны выпала 100–200% кліматычнай нормы ападкаў.
Больш за ўсё ападкаў кліматолагі адзначылі на тэрыторыі Гомельскай і Віцебскай абласцей — у сярэднім 96,4 міліметра і 96,2 міліметра, або 174% і 155% нормы адпаведна. Менш за ўсё — на тэрыторыі Брэсцкай вобласці — 59,5 міліметра, або 134% нормы. Ападкі выпадалі ў выглядзе дажджоў, у асобныя суткі месцамі адзначалася выпадзенне снегу. Па Віцебскай, а таксама паўночнай частцы Мінскай і Магілёўскай абласцей 26–27 кастрычніка на непрацяглы час усталявалася снежнае покрыва вышынёй ад 0,1 сантыметра да 9 сантыметраў.
На працягу месяца ў асобных раёнах краіны ў начныя і ранішнія гадзіны назіраліся туманы, месцамі — галалёдныя з’явы, навальніцы і град. Адзначалася ўзмацненне хуткасці ветру парывамі да 15 м/с і больш, месцамі дасягнула крытэрыю небяспечнай гідраметэаралагічнай з’явы (25 м/с і больш). Спецыялістамі была зафіксавана максімальная хуткасць ветру за месяц на станцыі Слуцк 8 кастрычніка (28 м/с).
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
