Надвор'е: Мокры снег з дажджом, пад нагамі — каша

Трохі памарозіла ў гэтым снежні і хопіць? А цяпер на дварэ чыста беларускі снежань эпохі глабальнага пацяплення. Уначы слабы мароз і снег, а ўдзень слабы плюс і мокры снег з дажджом. Такое незразумелае надвор’е чакаецца практычна на працягу ўсяго тыдня, пра гэта паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

У аўторак умовы надвор’я ў Беларусі будуць вызначаць атмасферныя франты і цёплая вільготная паветраная маса. Воблачна. На большай частцы тэрыторыі краіны пройдуць ападкі ў выглядзе снегу, мокрага снегу і дажджу. Месцамі чакаюцца слабыя туман і галалёд. На асобных участках дарог галалёдзіца. Вецер паўднёвы ўмераны. Тэмпература паветра днём будзе складаць ад мінус 2 градусаў да плюс 4. Атмасферны ціск ноччу будзе слаба падаць, днём істотна не зменіцца.

У сераду захаваецца ўплыў франтальных раздзелаў і цёплых вільготных паветраных мас атлантычнага паходжання. Будзе таксама воблачна. На большай частцы тэрыторыі краіны пройдуць ападкі ў выглядзе мокрага снегу і дажджу. Месцамі па краіне чакаюцца туман і слабы галалёд, на дарогах галалёдзіца. Вецер паўднёвай чвэрці ўмераны. Тэмпература паветра на працягу сутак складзе ад мінус 3 да плюс 3 градусаў.

У чацвер чакаецца змяненне надвор’я (актыўныя ападкі) і крыху пахаладае. У гэтыя суткі краіна апынецца пад уплывам цыклону, які ссоўваецца з Карпат на Бранскую вобласць Расіі. Воблачна, ноччу па поўначы рэспублікі з праясненнямі. На большай частцы тэрыторыі краіны пройдуць ападкі (у асноўным мокры снег, па паўднёвым усходзе краіны з дажджом), раніцай і днём у паўднёва-ўсходніх раёнах Беларусі месцамі ападкі моцныя. У асобных раёнах прагназуюцца туман і слабы галалёд, на дарогах галалёдзіца. Вецер усходні з пераходам на паўночны ўмераны, у дзённыя гадзіны месцамі парывісты. Тэмпература паветра на працягу сутак ад мінус 3 да плюс 3 градусаў, ноччу па поўначы краіны пры праясненнях паветра будзе астуджацца да мінус 5 градусаў.

У пятніцу ноччу на большай частцы тэрыторыі, днём месцамі па краіне чакаецца кароткачасовы снег і мокры снег. На асобных участках дарог галалёдзіца. На працягу сутак будзе мінус 5 — плюс 1 градус, а ўначы пры праясненнях — да мінус 7 градусаў.

Паводле інфармацыі айчынных сіноптыкаў, няўстойлівае з ападкамі рознай фазы і інтэнсіўнасці надвор’е захаваецца ў нашай краіне і ў выхадныя. У суботу месцамі па краіне пройдзе кароткачасовы снег, мокры снег. На асобных участках дарог галалёдзіца. Уначы слупкі тэрмометра пакажуць мінус 1–8 градусаў, а ўдзень — мінус 4 — плюс 2 градусы.

У нядзелю на большай частцы тэрыторыі краіны прагназуюцца ападкі ў выглядзе мокрага снегу і дажджу. Месцамі згусціцца туман, утворыцца слабы галалёд, на дарогах галалёдзіца. Уначы тэмпература паветра апусціцца да мінус 5 — плюс 2 градусаў, а ўдзень — мінус 2 — плюс 5 градусаў.

Сяргей КУРКАЧ