Надвор'е: Ноччу холадна, а днём мокра и слізка

Мне падабаецца, калі зіма нармальная. Калі снег і нават невялікі мароз. Але ў апошнія гады з тэмпературай у нас арэлі. Вось і ў гэтыя выхадныя надвор’е чакаецца «ніякае» — то прымарозіць уначы да мінус 11, а потым прыгрэе днём да плюс 7 градусаў, паведамілі спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

А ў пятніцу надвор’е ў краіне будуць вызначаць вобласць павышанага атмасфернага ціску і халодная вільготная паветраная маса з Балтыйскага мора. Воблачна, днём з праясненнямі. Месцамі, а ноччу па паўночным усходзе на большай частцы тэрыторыі пройдзе снег. Уначы і раніцай у асобных раёнах будзе згушчацца слабы туман. На дарогах чакаецца галалёдзіца. Вецер паўночна-заходні ўмераны. Тэмпература паветра мінімальная ноччу складзе ад мінус 1 градуса па захадзе да 10 марозу па паўночным усходзе Беларусі. Максімальная тэмпература днём ад мінус 5 да плюс 1 градуса. Атмасферны ціск будзе расці.

Першы месяц зімы вырашыў змагацца са снегам ужо ў гэтую суботу. Умовы надвор’я ў краіне ў асноўным будзе вызначаць франтальны раздзел, які ссоўваецца з боку Балтыйскага мора. Воблачна з праясненнямі. У многіх раёнах пройдуць невялікія ападкі ў выглядзе снегу, мокрага снегу і дажджу. Месцамі чакаюцца слабыя туман і галалёд, на дарогах галалёдзіца. Вецер заходні ўмераны, месцамі парывісты. Тэмпература паветра мінімальная ноччу ад 2 да 8 марозу, пры праясненнях па паўночным усходзе краіны паветра будзе астуджацца да мінус 11 градусаў, у заходніх раёнах нуль — плюс 1 градус. Максімальная тэмпература днём складзе ад мінус 4 да плюс 3 градусаў.

У нядзелю чарговая змена надвор’я. Наша тэрыторыя апынецца пад уплывам атмасферных франтоў і цёплых атлантычных паветраных мас, якія паступаюць з боку Заходняй Еўропы. Воблачна з праясненнямі. Часам будуць ісці ападкі ў выглядзе мокрага снегу, які будзе пераходзіць у дождж. У асобных раёнах слабы туман. Ноччу і раніцай месцамі слабы галалёд, на дарогах галалёдзіца. Вецер заходні парывісты. Тэмпература паветра мінімальная ўначы будзе ад мінус 5 градусаў па ўсходзе да 3 цяпла па захадзе краіны. А днём запахне вясной — гэтым разам будзе ад нуля да 7 цяпла.

У сувязі з тым, што нас чакая такая «шырокая» галалёдзіца, МУС нагадвае аўтамабілістам і пешаходам аб правілах бяспечнага руху.

У гэта надвор’е кіроўцам неабходна рухацца не проста з дазволенай хуткасцю, а з адпаведнай канкрэтным дарожным умовам на кожным участку маршруту, папярэдзілі эксперты. Асабліва асцярожнымі варта быць у месцах, дзе ўтворыцца наледзь з-за частых тармажэнняў: перад пешаходнымі пераходамі, штучнымі няроўнасцямі, прыпынкамі грамадскага транспарту, чыгуначнымі пераездамі.

Пешаходам ва ўмовах ападкаў варта апранаць вопратку павышанай бачнасці, у цёмны час карыстацца святлоадбівальнымі элементамі. Пераходзіць дарогу дапушчальна толькі ў дазволеных месцах і толькі пераканаўшыся, што кіроўцы заўважылі пешахода і прапускаюць яго. Чакаць пераходу рэкамендуецца за метр ад краю праезнай часткі.

Сяргей КУРКАЧ