Вось і набліжаюцца зімовыя святы — Каляды і Новы год. Вуліцы гарадоў, вітрыны магазінаў і кафэ, будынкі арганізацый і прадпрыемстваў упрыгожваюцца разнастайнымі гірляндамі.
Каб прадухіліць выпадкі электрычнага траўматызму і пажараў падчас навагодніх масавых мерапрыемстваў, усе работы па мантажы і падключэнні дадатковых электраўстановак, гірлянд і святочнай ілюмінацыі павінны ажыццяўляюцца падрыхтаванымі спецыялістамі. Амаль у кожным доме будуць ставіць і ўпрыгожваць ёлкі. Таму варта ведаць элементарныя правілы электрычнай бяспекі пры выкарыстанні электрычных прылад для ўпрыгожвання. Пра тое, як не дапусціць няшчасных выпадкаў, правільна выбраць гірлянду і засцерагчы сваіх дзяцей, расказаў намеснік генеральнага дырэктара — галоўны інжынер ДУ «Дзяржаўны энергетычны і газавы нагляд» Аляксандр Гулевіч.
Спецыяліст адзначыў, што пры падключэнні да электрычнай сеткі гірлянд і ілюмінацый чалавек можа трапіць пад дзеянне электрычнага току і ў выніку атрымаць электратраўму альбо ў памяшканні можа ўзнікнуць пажар.
Паводле яго інфармацыі, інцыдэнты могуць адбывацца па некалькіх прычынах. Напрыклад, калі ў сетцы няма апаратаў ахоўнага адключэння. Маюцца на ўвазе не толькі аўтаматы ў электрычных шчытках, але і спецыяльныя прылады, якія ўстаўляюцца ў разетку і такім чынам іграюць ролю засцерагальніка.
Электрычная траўма можа адбыцца па прычыне непасрэднага дотыку да адкрытых токаводных частак — пашкоджанага корпуса разеткі, правадоў і іншых электрапрыбораў. Таксама да няшчаснага выпадку можа прывесці выкарыстанне няякасных матэрыялаў пры падключэнні гірлянд, у тым ліку прымяненне самаробных гірлянд або вырабаў сумніўнай вытворчасці.
«Пажаранебяспечныя сітуацыі ўзнікаюць таксама пры падключэнні гірлянд на адкрытым паветры без уліку ступені іх абароны, а таксама пакіданне ўключаных гірлянд без кантролю на працяглы час», — распавёў Аляксандр Гулевіч.
Увага! Эксперт дадаў, што падключэнне гірлянд і святочнай ілюмінацыі павінна ажыццяўляцца толькі ад электрычнай сеткі, абсталяванай апаратамі абароны. Пры гэтым у сеткі напружаннем 220 вольт неабходна ўстанаўліваць прыладу ахоўнага адключэння. Электрычныя ўпрыгажэнні з напружаннем менш за 25 вольт з’яўляюцца найбольш бяспечнымі.
Нічога, кажа наш чалавек, паправім.
І бярэцца выпраўляць няспраўнасць самастойна, але... Часам удар токам атрымліваюць людзі ў тым выпадку, калі пашкоджана ізаляцыя. Таму трэба загадзя, да падключэння да разеткі, пераканацца, што ізаляцыя і правады не пашкоджаныя ці не адарваныя.
«Каб не дапусціць электратраўмы і пажару, варта ажыццяўляць рамонт любых электрапрыбораў толькі з адключэннем іх ад сеткі, — падкрэсліў спецыяліст. — Неабходна даверыць правядзенне такога рамонту выключна кваліфікаванаму прафесіяналу. Трэба памятаць, што нельга замацоўваць электрычныя правады і кабелі з моцным нацяжэннем, падвяргаць іх іншым механічным уздзеянням, а таксама размяшчаць паблізу ад крыніц цяпла (напрыклад, батарэі або адкрытага агню). Таксама неабходна выкарыстоўваць гірлянды толькі заводскага вырабу. Перад уключэннем гірлянд і ілюмінацый у электрасетку важна ўважліва вывучыць інструкцыю па іх эксплуатацыі».
Яшчэ ён звярнуў увагу на недапушчальнасць падключэння гірлянды да сеткі дзецьмі, бо яны не могуць ацаніць у поўнай меры яе тэхнічны стан. Дзяцей трэба папярэджваць аб небяспецы.
«Акрамя гэтага, неабходна візуальна пераканацца ў адсутнасці пашкоджанняў электрычнага кабеля, штэпсельнай вілкі і іншых электрычных элементаў ўпрыгожвання да падключэння іх да электрасеткі. Трэба неадкладна адключыць электрапрыбор ад сеткі пры з’яўленні прыкмет аплаўлення ізаляцыі, дыму, непрыемнага паху і іскрэння», — раіць Аляксандр Гулевіч.
Асобна спецыяліст спыніўся на выкарыстанні прылад ахоўнага адключэння. Па статыстыцы Дзяржаўнага энергетычнага і газавага нагляду, прыкладна да 40% няшчасных выпадкаў можна было б пазбегнуць, калі б у сетцы стаялі прылады ахоўнага адключэння.
«Гэта прылада даказвае сваю эфектыўнасць, а ахоўныя апараты такога тыпу свабодна прадстаўлены ў гандлёвай сетцы. Акрамя таго, на сённяшні дзень у продажы маюцца нават разеткі з убудаванай прыладай ахоўнага адключэння», — адзначыў галоўны інжынер арганізацыі.
Паводле яго слоў, на выставе Energy Expo іх установа, у ліку іншых распрацовак, прадставіла практычны стэнд, які імітуе спрацоўванне стацыянарна ўстаноўленай прылады ахоўнага адключэння ў двухправадной электрычнай сетцы. «Любы, хто жадае, мог убачыць прынцып работы такіх прылад і даведацца ўсе перавагі іх выкарыстання. Улічваючы станоўчы эфект, прымяненне падобных стэндаў будзе пашырацца», — запэўніў Аляксандр Гулевіч.
Тут спецыяліст звярнуў увагу на тое, што ўсе гірлянды і ілюмінацыі, якія падключаюцца, павінны адпавядаць месцу і ўмовам размяшчэння.
«Пры выбары ўпрыгожванняў трэба звярнуць увагу на маркіроўку ступені абароны электрапрыбора. Так, прыбор з маркіроўкай ІP 20 прызначаны толькі для выкарыстання ўнутры сухіх памяшканняў. Калі на прыбор нанесеная маркіроўка ІP 44, то ён можа выкарыстоўвацца і па-за памяшканнем, але павінен быць размешчаны пад навесам. У цэлым, размяшчаць гірлянды на вуліцы можна са ступенню абароны ІP 54 і вышэйшай. Так, маркіроўка ІP 67 азначае, што прыбор з’яўляецца водатрывалым. Упрыгожванні з такой маркіроўкай будуць найбольш бяспечнымі для дэкарацыі індывідуальнага дома і вуліцы», — растлумачыў Аляксандр Гулевіч.
Акрамя ступені абароны, на вырабе можа быць нанесены малюнак хаткі са стрэлачкамі. Калі стрэлачкі накіраваны ўнутр дома, значыць, гірлянда можа размяшчацца толькі ўнутры памяшкання. Калі ж стрэлачкі накіраваны ад дома, значыць, прыбор можа выкарыстоўвацца і на вуліцы.
У выпадку надзвычайнага здарэння з электрычнасцю, аварыі або пашкоджання электрапрыбораў важна памятаць і выконваць асноўнае правіла бяспекі — перш за ўсё, неабходна неадкладна адключыць пашкоджаны элемент ад электрасілкавання. Калі ж адбылося ўзгаранне, трэба як мага хутчэй адключыць аўтаматычныя выключальнікі або пробачныя засцерагальнікі ў электрычным шчытку. Менавіта таму кожны жыхар дома павінен ведаць, дзе знаходзяцца яго аўтаматычныя выключальнікі. У крытычны момант гэта можа зберагчы памяшканне і людзей ад пажару.
А сталіцу, як навагоднюю ялінку, ужо «загарнулі» ў мноства святочных агнёў. Намеснік галоўнага інжынера УП «Мінгарсвятло» Дзмітрый Сырамалотаў распавёў нам, што сёлета Мінск ужо ўпрыгожылі больш за 12 тысяч гірлянд рознай мадыфікацыі. З іх 10 тысяч вісяць уздоўж праспектаў і вуліц, а 2,2 тысячы ўпрыгожылі 26 навагодніх ёлак. Напружанне апошніх складае 24 вольты, а ступень абароны — ІP 67.
Святочная ілюмінацыя запалілася ў Мінску 10 снежня і прадоўжыць радаваць вока да 15 студзеня ўжо наступнага года. На ўвесь гэты перыяд у мэтах папярэджання ўзнікнення якіх-небудзь аварый і няшчасных выпадкаў арганізавана дзяжурства аператыўных выязных брыгад.
«Агульная магутнасць ілюмінацыі ў Мінску складае каля 987 кВт. Пры гэтым устаноўленая магутнасць ілюмінацый усіх ёлак у сталіцы — каля 153 кВт. Так, галоўная ёлка краіны на Кастрычніцкай плошчы ўпрыгожаная 128 гірляндамі. Электрычная магутнасць гірлянд на ёлцы і ўсіх усталяваных на плошчы канструкцый — 35 кВт», — расказаў Дзмітрый Сырамалотаў.
Сёлета ў Мінску з’явіліся новыя арт-аб’екты, якія свецяцца. Так, у раёне Палаца спорту ўсталяваны светлавы фантан вышынёй 5 метраў. Акрамя таго, новыя ілюмінацыі размясцілі на вуліцах Маякоўскага, Ташкенцкай, Кабушкіна, Асаналіева і ў Севастопальскім парку. Прыязджайце і любуйцеся.
Сяргей КУРКАЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».