Надвор'е: Мокры снег з дажджом і ветрам

Як прагназуюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, у пятніцу надвор’е ў Беларусі будуць вызначаць атмасферныя франты ад цыклону з цэнтрам над Балтыйскім морам. На большай частцы тэрыторыі краіны пройдуць ападкі ў выглядзе снегу, мокрага снегу і дажджу. Месцамі чакаецца слабы галалёд, на асобных участках дарог галалёдзіца. Вецер паўднёвы, паўднёва-заходні месцамі парывісты, а ўначы па паўднёва-заходняй палове краіны ў многіх раёнах моцны парывісты. Тэмпература паветра на працягу сутак складзе ад мінус 1 да плюс 4 градусаў. Атмасферны ціск ноччу будзе інтэнсіўна падаць, днём істотна не зменіцца.

У суботу наша краіна працягне знаходзіцца ў цыркуляцыі паўночнаатлантычнага цыклону, пры гэтым на тэрыторыю пачнуць паступаць прахалодныя паветраныя масы з поўначы Еўропы. Пераважна воблачна. Часам чакаецца мокры снег. Месцамі па краіне прагназуюцца наліпанне мокрага снегу, у паўднёва-заходніх раёнах Беларусі слабая завіруха. На асобных участках дарог галалёдзіца. Вецер заходняй чвэрці парывісты, у паўднёва-заходніх раёнах моцны парывісты. Тэмпература паветра на працягу сутак будзе ад 3 марозу да 2 цяпла.

І ў нядзелю захаваецца ўплыў халодных няўстойлівых паветраных мас, якія паступаюць з поўначы Еўропы. Воблачна з праясненнямі. На большай частцы тэрыторыі краіны чакаюцца снег, мокры снег і слабая мяцеліца. На дарогах месцамі галалёдзіца. Вецер паўночна-заходні, заходні парывісты, уначы ў асобных раёнах на паўднёвым захадзе краіны моцны парывісты. Ноччу стане злёгку халадней, калі чакаецца 1–6 марозу. Але днём зноў усталюецца нездаровае надвор’е з максімальнай тэмпературай ад мінус 3 градусаў да 2 цяпла.

Паводле папярэдняй інфармацыі сіноптыкаў, адказнымі за надвор’е ў наступны тыдзень будуць франтальныя раздзелы і больш цёплыя паветраныя масы. Яны працягнуць рабіць надвор’е не толькі воблачным, але і прынясуць у краіну новыя порцыі ападкаў у выглядзе снегу, мокрага снегу і дажджу. 

А гэта складнікі галалёдзіцы.

У панядзелак на большай частцы тэрыторыі краіны прагназуюцца ападкі ў выглядзе снегу, які будзе пераходзіць у дождж. Ноччу і раніцай у некаторых раёнах галалёд, на дарогах галалёдзіца. Тэмпература паветра ўначы панізіцца да 1–8 марозу. Днём будзе мінус 3 — плюс 3 градусы, а ў паўднёва-заходніх раёнах — 4–7 цяпла.

У аўторак на большай частцы тэрыторыі пройдуць ападкі ў выглядзе дажджу і мокрага снегу. У некаторых раёнах слабы галалёд, на дарогах галалёдзіца. Ноччу слупкі тэрмометраў пакажуць ад мінус 5 градусаў па паўночным усходзе да плюс 5 градусаў па паўднёвым захадзе краіны, а днём будзе ад мінус 3 градусаў да 4 цяпла.

У сераду ноччу на большай частцы тэрыторыі, а днём месцамі па краіне прагназуюцца кароткачасовыя ападкі (снег, мокры снег, дождж). У некаторых раёнах слабы галалёд, на дарогах галалёдзіца. Уначы сіноптыкі абяцаюць ад мінус 4 градусаў да плюс 2, а ўдзень — мінус 3 — плюс 3 градусы.

Сяргей КУРКАЧ