Баль для людзей срэбнага ўзросту прайшоў у сядзібе М.К. Агінскага ў Залессі ў межах акцыі «Ад усёй душы» у Гродзенскай вобласці.
На мерапрыемства прыехалі наведвальнікі цэнтраў сацыяльнага абслугоўвання, удзельнікі кружкоў па цікаўнасціх і наогул актыўныя людзі, нягледзячы на паважаны ўзрост. Сабраліся ў асноўным прадстаўнікі трох раёнаў Гродзеншчыны: Смаргонскага, Астравецкага і Ашмянскага. Баль таксама наведалі статусныя госці – намеснік міністра працы і сацыяльнай абароны Марына Арцёменка, старшыня Гродзенскага абласнога савета дэпутатаў Алена Пасюта, старшыня раённага савета дэпутатаў Сяргей Кудзенчук.
— Сёлета ў адрозненне ад мінулага года акцыя пачалася яшчэ да Новага года, 26 снежня. Мы прыходзілі ў дамы, дапамагалі прыбірацца, упрыгожваць — стваралі святочны настрой. А сёння, напярэдадні Старага Новага года, мы сабраліся на балі, — адзначыла ў прывітальным слове Марына Арцёменка, намеснік міністра працы і сацыяльнай абароны.
Дарэчы, кампанію ў танцах людзям сталага ўзросту саставілі курсанты Інстытута пагранічнай службы, таму некаторыя жанчыны заўважалі наконт кавалераў: «Якое цудоўнае свята! Мы ўжо даўно не танчылі з такімі жвавымі людзьмі!»
У сядзібе Міхала Клеафаса Агінскага для гасцей падрыхтавалі насычаную праграму. Правесці танцы і паглыбіць усіх у бальную атмасферу пазамінулага стагоддзя прыехалі рэканструктары з Мінска – Дзмітрый Ракаў і непасрэдна аўтар гэтай публікацыі. Дзякуючы нашым падказкам, удзельнікі балю танчылі вальсы, контрдансы і польку так, што і не скажаш адразу, што мерапрыемства – частка акцыі для людзей у сталым ўзросце. Гэта людзі маладыя душой! Яны таксама з цікаўнасцю даведаліся пра мову веера і далучыліся да старажытных салонных гульняў. Трыа «Далія» са Смаргоні падарыла цудоўны акампанемент падчас танцаў і вакальных выступленняў – рамансаў. Не абышлося і без смачнага і карыснага – з клопатам аб здароўі сталых – смачнага фуршэта.
Сімвалічна, што ў гэтыя дні завіталі на баль і калядоўшчыкі. Былі тут па старажытнай беларускай традыцыі і каза, і мядзведзь (мабыць, выхаванец Смаргонскай мядзвежай акадэміі), і цыганка з варажбой!
– Як радасна бачыць у гэтай зале такіх святочна апранутых людзей з агенчыкамі у вачах. Напэўна, уся наша акцыя "Ад усёй душы" накіравана менавіта на тое, каб вы неслі сваю пазітыўную энергію, натхнёнасць і прыгажосць і дзяліліся імі з моладдзю, каб сувязь паміж пакаленнямі развівалася і крэпла. І я ад усёй душы жадаю вам заставацца такімі ж светлымі, цудоўнымі, працягваць натхняць усіх вакол, паболей рухацца і асабліва танчыць і слухаць музыку, бо гэта і ёсць простыя сакрэты актыўнага даўгалецця, – павіншавала ўдзельнікаў балю і ўсёй акцыі Марына Арцёменка.
Ганна РОВІНА
Фота аўтара і газеты «Светлы шлях»
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
