5 спосабаў не траўміравацца ў галалёд

Зіма — гэта не толькі мароз і сонца, іскрысты снег і навагодні настрой. Штогод сотні людзей атрымліваюць разнастайныя галалёдныя траўмы. Як не стаць ахвярай лёду на гарадскіх вуліцах?

Пра тое, як паводзіць сябе ў галалёд, расказала ўрач-гігіеніст (загадчык аддзялення) гігіены працы аддзела гігіены Мінскага абласнога цэнтра гігіены, эпідэміялогіі і грамадскага здароўя Алена Смірнова.

Галалёд і галалёдзіца: розніца ёсць?

— Галалёд — пласт шчыльнага лёду, які ўтвараецца на паверхні зямлі, тратуарах, праезнай частцы вуліцы ад замярзання вады пры выпадзенні ападкаў на ахалоджаную зямлю, — растлумачыла ўрач-гігіеніст. — Галалёду звычайна спадарожнічаюць блізкая да 0 ° С тэмпература паветра, вецер і высокая вільготнасць. Для яго характэрныя тоўсты пласт лёду (у некалькі сантыметраў) і абледзяненне вялікіх участкаў.

Галалёдзіца — лёд або абледзянелы снег на паверхні зямлі, які фарміруе слізкую паверхню. Утвараецца пасля адлігі, дажджу, кропель густога туману пры пахаладанні. Да галалёдзіцы можна аднесці таксама ўшчыльненне і абледзяненне снегу з-за руху аўтамабіляў на дарозе.

І галалёд, і галалёдзіца ператвараюць гарады ў вялікія каткі, што прыводзіць да падзення і траўм.

Высокія абцасы няхай пачакаюць

— Лепшая прафілактыка траўм — гэта асцярожнасць і абачлівасць, — падкрэсліла Алена Смірнова. — Калі ёсць магчымасць, устрымайцеся ад выхаду на вуліцу ў галалёд. Калі ж такой магчымасці няма, выконвайце наступныя нескладаныя правілы.

• Абутак павінен быць няслізкім, устойлівым, лепш з гумовай або рыфленай падэшвай. Жанчынам трэба адмовіцца ад высокіх абцасаў.
• Перасоўвацца неабходна асцярожна, не спяшацца і не паднімаць ногі занадта высока.
• Па слізкай паверхні ідзіце, крыху прагнуўшыся наперад і сагнуўшы ногі ў каленях. Рабіце невялікія, слізгаючыя крокі, наступайце на ўсю падэшву, рукі трымайце свабоднымі.
• Калі ўсё ж такі страцілі раўнавагу, трэба паспрабаваць узмахамі рук вярнуць яе. Вызваліце рукі (адкіньце сумку, пакет), сагніце ногі ў каленях і як бы прысядзьце — так можна зменшыць вышыню падзення. Адначасова паспрабуйце максімальна згрупіравацца, сабрацца ў «камячок» (локці прыціснуць да цела, уцягнуць галаву, ногі злёгку сагнуць, напружыць цягліцы) і прызямліцца на бок, каб пазбегнуць пераломаў рук і ног, хрыбетніка і касцей таза.
• Пры падзенні з абледзянелай лесвіцы твар і галаву прыкрыйце рукамі. Не спрабуйце тармазіць, раскідваючы канечнасці, — так шанцы атрымаць пералом толькі ўзрастуць.

Калі пасля падзення ў вас з’явіліся галаўны боль, млоснасць, галавакружэнне, боль у суставах, узніклі ацёкі — тэрмінова звярніцеся па медыцынскую дапамогу.