У бібліятэках краіны і ў кіёсках «Белсаюздруку» — снежаньскі, за 2023 год, нумар часопіса «Бярозка». Інтэлектуальны часопіс для падлеткаў, як пазіцыяніруе сябе выданне, радуе даволі многімі цікавымі публікацыямі.
Рэдакцыя нагадвае пра даўні праект Мінскага палаца дзяцей і моладзі — літаратурная гасцёўня «Думаць вершы». Хто цікаўны да літаратурнай творчасці — не абмініце і гэты расповяд. З арыгінальнай, надзвычай адметнай казкай «Пра самы прыгожы горад» у снежаньскай «Бярозцы» выступае вучань СШ N 225 г. Мінска Раман Банькоўскі.
З відэагульнямі («Выбіраем падарунак для геймера: відэагульні ці настолкі») знаёмяць Алена Шух, Сяргей Старычонак і Іван Валуеў («Настолкі»). Пад рубрыкай «Міфалогія» друкуецца артыкул Софіі Туронак «Рагатае сузор’е, Ці як каза стала каляднай зоркай». Даволі цікаавым падаецца інтэрв’ю са спартсменкай і трэнерам Таццянай Трушкінай «Сваякі былі ў шоку: такая маленькая дзяўчына — і пайшла ў такі спорт» ( а «такі спорт» — гэта бокс!). Ганна Белая разважае пра моладзевы слэнг (вы даведаецеся, што ж гэта за словы: «крынж», «краш», «лук» і іншыя моўныя таямніцы).
Наталля Сіротка знаёміць з праграмамі для моладзі на радыё «Культура». Прачытайце яе артыкул у рубрыцы «Сур’ёзнае з гумарам» — упэўнены, што вам захочацца паслухаць радыё. Пра Тыдні роднай мовы ў СШ N 2 Драгічына расказваюць члены гуртка «Юны журналіст» Таццяна Кукса і Ганна Пятроўская («Роднай мове — гучаць»). Вопыт драгічынскіх школьнікаў уражлівы і варты пераймання. А мы раім часцей наведваць гэтую школу сучасным беларускім пісьменнікам!
А ў раздзеле «Заяўка на Парнас» —знаёмства з вершамі 16-гадовай гамяльчанкі Наталлі Голубевай. «На напісанне ўласных вершаў мяне натхнілі творчы шлях і паэзія Максіма Багдановіча», — сцвярджае Наталля. Поспехаў і творчых адкрыццяў, Наталля! Новых публікацый у «Бярозцы» і ў самых аўтарытэтных літаратурна-мастацкіх выданнях!
А мы сцвярджаем, што «Бярозку» усё цікавей і цікавей чытаць!..
Мікола БЕРЛЕЖ
