Прэзідэнт Беларусі Аляксандр Лукашэнка сустрэўся з надзвычайным і Паўнамоцным Паслом Таджыкістана ў Беларусі Бахтаварам Сафарзадой. Вітаючы госця, кіраўнік дзяржавы заўважыў, што ён дасведчаны дыпламат, які добра ведае Беларусь і яе магчымасці. У сваю чаргу, беларусы добра ведаюць магчымасці Таджыкістан. «Нашы народы заўсёды паважалі адзін аднаго, дружныя былі заўсёды. Нашы адносіны з З Эмамалі Шарыпавічам (Прэзідэнт Таджыкістана Эмамалі Рахмон — Зв.) самыя развітыя, у нас няма сакрэтаў адзін ад аднаго. Таму вы выбудоўваем добрыя дружалюбныя адносіны», — сказаў Аляксандр Лукашэнка. Ён нагадаў свой пастаянны тэзіс аб тым, што базай любых міждзяржаўных адносін з’яўляецца эканоміка, гандлёва-эканамічныя адносіны.
«Міністэрства замежных спраў мяне супакойвае ў тым, што леташняе падзенне тавараабароту нязначнае і гэтак далей. Але я эканаміст і прывык у дынаміцы глядзець на працэсы. У мінулым годзе мы ненашмат знізілі тавараабарот, але да папярэдняга года. А папярэдні год даў нам прыстойнае зніжэнне тавараабароту. Таму ў цэлым мы тавараабарот знізілі», — адзначыў Прэзідэнт. У 2022-м годзе тавараабарот паміж Беларуссю і Таджыкістанам раўняўся 78,1 млн долараў, а ў 2023-м — 67.4 мільёна.
«Разбураць падмурак нашых адносін нельга. Як я сказаў, аснова — гандлёва-эканамічныя адносіны. Таму трэба нам тут папрацаваць з тым, каб вярнуць тавараабарот для пачатку на тую стадыю, на якой ён знаходзіўся. Ну і вядома, у нас дастаткова прадукцыі, тавараў для таго, каб павялічваць тавараабарот», — канстатаваў Аляксандр Лукашэнка. Ён падкрэсліў, што 78 ці нават 100 мільёнаў тавараабароту для Беларусі і Таджыкістана — гэта амаль нішто. Таму трэба шукаць магчымасці, вызначацца з пазіцыямі, па якіх можна павялічваць гэты паказчык.
«Я ўпэўнены, Таджыкістан прыме такія прапановы. Вызначыцца па таварах, якімі мы ўзаемна можам гандляваць, абменьвацца, — сказаў беларускі лідар. — Я яшчэ раз кажу: нашы магчымасці вы добра ведаеце. У нас ёсць усё неабходнае, у чым мае патрэбу Таджыкістан у галіне прамысловасці, сельскай гаспадаркі, паставак аўтамабільнай тэхнікі, асабліва вялікагрузаў — вы вельмі шмат працуеце па горнаруднай прамысловасці. Мы тут можам аказаць вам значную дапамогу і падтрымку. Закрытых тэм няма, гатовы супрацоўнічаць з вамі і ў ваенна-прамысловым комплексе. Вы ведаеце нашы магчымасці. Скажыце, чым можам дапамагчы ў плане забеспячэння вашай бяспекі, мы гатовы падключыцца, хоць мы ўжо зрабілі нямала крокаў у гэтым напрамку. Вы таксама гэта добра ведаеце».
Аляксандр Лукашэнка рэзюмаваў, што праблем вельмі шмат і такая ж колькасць задач, якія патрабуюць вырашэння. Беларускі бок, па словах Прэзідэнта, да гэтага гатовы.
«Давайце будзем інтэнсіфікаваць нашыя адносіны. З Эмамалі Шарыпавічам мы ў бліжэйшы час пры першай жа магчымасці пагаворым аб тым, каб вызначыць напрамкі інтэнсіфікацыі нашых адносін. А вы як пасол вельмі актыўны, перспектыўны дыпламат, думаю, зробіце свой уклад у развіццё нашых адносін», — падсумаваў кіраўнік дзяржавы. Аляксандр Лукашэнка перадаў Эмамалі Рахмону самыя цёплыя і добрыя віншаванні і пажаданні з Новым годам. «Вельмі хачу, каб ён быў для таджыкскага народа, Таджыкістана і вашага лідара самым паспяховым», — сказаў ён.
Бахтавар Сафарзада перадаў беларускаму лідару прывітанне ад яго таджыкскага калегі. «Мы вас ведаем, як вялікага сябра Рэспублікі Таджыкістан і шчырага сябра нашага лідара Эмамалі Рахмона. Ваша сяброўства з’яўляецца прадметам гонару для нас, дыпламатаў, прадстаўнікоў дзяржаўных органаў улады і двух брацкіх народаў дзвюх краін», — сказаў ён.
Журналістам Бахтавар Сафарзада расказаў, што падчас сустрэчы з Прэзідэнтам Беларусі былі абмеркаваны амаль усе напрамкі двухбаковага супрацоўніцтва. «Рэспубліка Беларусь — адна з ключавых пазіцый у знешняй палітыцы Таджыкістана. Паміж нашымі краінамі існуюць дагаворы аб сяброўстве і стратэгічным партнёрстве. Сённяшняя сустрэча прайшла ў духу стратэгічнага партнёрства на ўзроўні палітычных, эканамічных, культурна-гуманітарных адносін», — сказаў ён.
Ключавым пытаннем, зразумела, стаў тавараабарот. «У 2023-м годзе мы крыху зменшылі ў тавараабароце. Але ўсе планы і мерапрыемствы сведчаць аб тым, што ў 2024 годзе дагнаць і перагнаць лічбы тавараабароту, якія ў 2023-м годзе мы крыху збавілі, можна», — заявіў пасол. Гэтаму будзе садзейнічаць шматфункцыянальны цэнтр, які плануецца адкрыць у Мінску. Мяркуецца, што гэты цэнтр будзе садзейнічаць каардынацыі бізнэс-колаў Беларусі і Таджыкістана.
Пасол нагадаў, што з 2017 года ў Таджыкістане збіраецца беларуская сельскагаспадарчая тэхніка. Падобную кааперацыю ён назваў узорным прыкладам у двухбаковых адносінах. «Акрамя рынку Таджыкістана, гэта зборачная прадукцыя карыстаецца поспехам і ў суседніх дзяржавах», — звярнуў увагу кіраўнік дыпмісіі. Ён назваў гэта добрым прыкладам сумеснай кааперацыі.
Валерыя СЦЯЦКО
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
