Чакаецца ўздым захваральнасці на грып

Медыкі ацэньваюць інтэнсіўнасць захворвання на ВРІ і грып як сярэднюю з тэндэнцыяй да павелічэння ва ўсіх рэгіёнах краіны. У сувязі з гэтым звяртаюць увагу, што ў паліклініках працягваецца вакцынацыя супраць грыпу, і рэкамендуюць шэраг мер, якія дапамогуць засцерагчыся ад рэспіраторных хвароб.

Штогод у Беларусі ў перыяд з кастрычніка да красавіка адзначаецца сезонны ўздым захворвання на вострыя рэспіраторныя інфекцыі, у тым ліку на грып. Цяпер інтэнсіўнасць эпідэмічнага працэсу ВРІ ацэньваецца як сярэдняя з тэндэнцыяй да павелічэння ва ўсіх рэгіёнах рэспублікі. У структуры захварэлых удзельная вага дзіцячага насельніцтва ва ўзросце да 18 гадоў складае больш як 50 працэнтаў, паведамілі ў прэс-службе Міністэрства аховы здароўя.

Вынікі лабараторных даследаванняў сведчаць аб цыркуляцыі вірусаў грыпу А (H1N1), A (H3N2), А (нетыповага), В і негрыпозных рэспіраторных вірусаў (вірусы парагрыпу, адэнавірусы, рынавірусы, РС-вірусы, сезонныя каранавірусы, CoV-2), што абумоўлівае рызыку распаўсюджвання ўзбуджальнікаў і ўзнікненне выпадкаў захворвання, у тым ліку лакальныя ўспышкі.

У Беларусі праводзіцца пастаянны малекулярна-генетычны скрынінг варыянтаў віруса SARs-CoV-2 з мэтай адсочвання і кантролю за з’яўленнем новых варыянтаў, якія цыркулююць у краіне.

Па наяўных у краіне даных, варыянт «Пірола» шырокага распаўсюджвання не атрымаў. У цяперашні час працягваецца пераважная цыркуляцыя двух рэкамбінантных формаў віруса: ХВВ.1.16 «Арктурус» і EG.5.1.1 «Эрыс».

Такім чынам, развіццё эпідэмічнай сітуацыі па грыпе і ВРВІ ў краіне адпавядае перспектыўнаму прагнозу на эпідэмічны сезон 2023-2024 гадоў. На падставе даных малекулярна-біялагічных даследаванняў можна казаць аб тым, што ў Беларусі адзначаецца сумесная цыркуляцыя вірусаў сезоннага грыпу, SARS-CoV-2 і іншых рэспіраторных вірусаў.

Эпідэміёлагі адзначаюць, што эпідэмічны ўздым захворвання на ВРІ, абумоўлены распаўсюджваннем вірусаў грыпу, можна чакаць у бліжэйшыя тыдні.

— Развіццё ўздыму захворвання на ВРІ, асацыяванага з эпідэмічным распаўсюджваннем грыпу ў канцы студзеня — пачатку лютага, з’яўлялася характэрным па шматгадовых назіраннях для краіны ў дапандэмічны перыяд, што сведчыць аб стабілізацыі сезоннай актыўнасці вірусаў грыпу. Эпідэмічны ўздым захворвання грыпу 2023-2024 гадоў будзе абумоўлены цыркуляцыяй вірусаў грыпу А. Улічваючы дамінаванне віруса грыпу В папярэдняга эпідсезона і даныя глабальнага нагляду, можна меркаваць, што вірус грыпу В будзе цыркуляваць з меншай інтэнсіўнасцю, — адзначылі ў Міністэрстве аховы здароўя.

Сярод захварэлых будуць пераважаць дзеці да 14 гадоў. Рызыкуюць захварэць таксама цяжарныя і асобы старэйшыя за 65 гадоў, а таксама людзі, якія ўваходзяць у групу рызыкі развіцця захворвання і постгрыпозных ускладненняў.

Медыкі звярнулі ўвагу, што ў арганізацыях аховы здароўя працягваецца вакцынацыя.

Усе вакцыны зарэгістраваны і дазволены для прымянення на тэрыторыі Беларусі, яны змяшчаюць актуальныя штамы.

Як засцерагчыся?

Спецыялісты рэкамендуюць выконваць шэраг мер, накіраваных на мінімізацыю рызыкі распаўсюджвання рэспіраторных інфекцый:

• пазбягайце ці скараціце да мінімуму час знаходжання ў месцах масавага збору людзей;
• выкарыстоўвайце сродкі аховы органаў дыхання (маскі, рэспіратары) пры немагчымасці захавання сацыяльнай дыстанцыі 1-1,5 м, калі ў вас рэспіраторныя сімптомы (насмарк, кашаль, чханне) або вы знаходзіцеся ў месцах масавага збору людзей;
• пазбягайце цесных кантактаў з людзьмі, якія маюць прыкметы рэспіраторнага захворвання;
• рэгулярна і старанна мыйце рукі з мылам, абавязкова пасля вуліцы і грамадскага транспарту. Выкарыстоўвайце пры неабходнасці антысептычныя сродкі;
• праводзьце рэгулярнае праветрыванне і вільготную прыборку памяшкання, у якім знаходзіцеся;
• прытрымлівайцеся здаровага, збалансаванага харчавання, фізічнай актыўнасці (часцей гуляйце на свежым паветры) і не забывайце пра паўнавартасны сон.

Пры з’яўленні сімптомаў рэспіраторнага захворвання (павышэнне тэмпературы цела, кашаль, насмарк, галаўны боль, боль у горле і іншых) неабходна заставацца дома і выклікаць урача.

Алена КРАВЕЦ