Рэпетыцыя цэнтралізаванага экзамену (РЦЭ) для выпускнікоў устаноў агульнай сярэдняй адукацыі адбудзецца ў гэтую суботу, 27 студзеня. Яна стане «поўнай копіяй» цэнтралізаванага экзамену, які пройдзе ў маі 2024 года. Для праходжання рэпетыцыі ЦЭ ужо зарэгістравалася 55,2 тысячы адзінаццацікласнікаў.
Сам жа цэнтралізаваны экзамен, паводле пастановы Міністэрства адукацыі, адбудзецца 27 і 30 мая — даты ўжо вызначаныя. Чакаецца, што ўдзел у экзамене гэтай вясной прымуць каля 58 тысяч выпускнікоў устаноў сярэдняй адукацыі (паводле папярэдніх ацэнак, свае сілы і веды на гэты раз вырашацца праверыць на 5 тысяч больш маладых людзей і дзяўчат, чым летась).
— У 2023 годзе выпускнікі школ упершыню прайшлі выніковую атэстацыю ў форме цэнтралізаванага экзамену. Як паказала практыка, такая форма правядзення іспыту грамадскасцю падтрымана. Сёлета ЦЭ пройдзе другі раз, — адзначыла начальнік упраўлення агульнай сярэдняй адукацыі — намеснік начальніка галоўнага ўпраўлення агульнай сярэдняй і дашкольнай адукацыі Міністэрства адукацыі Ірына Каржова. — Мы вывучалі меркаванне грамадскасці аб тым, якія ж змены неабходна ўнесці ў арганізацыю правядзення цэнтралізаванага экзамену. Маніторынг паказаў: глабальныя змены не патрабуюцца, але ёсць невялікія хібы ў частцы арганізацыі. Яны датычацца, у прыватнасці, тэрмінаў правядзення ЦЭ. Сёлета сам цэнтралізаваны экзамен пройдзе таксама ў маі, але пасля 25 чысла і ў буднія дні. Другая прапанова, якая паступіла з месцаў, — скарачэнне часу прыбыцця ў пункт правядзення цэнтралізаванага экзамену.
Іншымі словамі, самы нервовы час — чаканне пачатку іспыту — педагогі вырашылі скараціць.
— У мінулым годзе адзінаццацікласнікі прыбывалі за 60 хвілін да пачатку іспыту, у гэтым годзе ў пункце правядзення экзамену трэба быць за 30 хвілін да яго пачатку.
Цэнтралізаваны экзамен пачнецца ў 11.00, як ужо гаварылася, 27 і 30 мая.
Ну, а ў студзені адзінаццацікласнікі змогуць «у рэжыме пробы» прайсці праз усе этапы цэнтралізаванага экзамену, пачынаючы з прыезду (падвозу для школьнікаў з сельскай мясцовасці) і запаўнення бланкаў і да непасрэдна экзаменацыйных заданняў. Мэта рэпетыцыі — адпрацоўка механізмаў правядзення іспыту, падкрэсліла спікер.
— Рэпетыцыя пройдзе ў строгай адпаведнасці з Інструкцыяй па арганізацыі і правядзенні цэнтралізаванага экзамену, зацверджанай пастановай Міністэрства адукацыі. Дзеці змогуць апрабаваць свае веды, прайсці цэнтралізаваны экзамен па ўсіх вучэбных прадметах, па якіх прадугледжаны ЦЭ, уключаючы рускую і беларускую мовы.
Для правядзення рэпетыцыі задзейнічаюць тыя ж пункты, дзе ў маі адбудзецца ЦЭ (гэта 144 пункты ва ўсіх рэгіёнах краіны, ад найбуйнейшага — БДУ, да самага невялікага — Расонскай сярэдняй школы).
— Пункты правядзення цэнтралізаванага экзамену размешчаны ў кожнай адміністрацыйна-тэрытарыяльнай адзінцы, то-бок за межы свайго раёна навучэнцам выязджаць не давядзецца як падчас рэпетыцыі, так і падчас самога цэнтралізаванага экзамену, — запэўніла прадстаўнік Міністэрства адукацыі. — Падчас ЦЭ будзе забяспечана цэнтралізаваная дастаўка навучэнцаў у пункты правядзення экзамену ў суправаджэнні педагагічнага работніка. Для вучняў сельскіх устаноў адукацыі будзе забяспечана дастаўка школьнымі аўтобусамі да самага пункта правядзення экзамену. У гарадскіх населеных пунктах навучэнцы будуць карыстацца грамадскім транспартам, суправаджэнне іх педработнікам таксама будзе забяспечана.
Відавочна, што нават рэпетыцыя цэнтралізаванага экзамену — гэта стрэс для школьнікаў. Таму на кожным пункце яе правядзення будзе медработнік.
— Акрамя таго, традыцыйна будуць створаны ўсе ўмовы для бяспекі ўдзельнікаў ЦЭ. У прыватнасці, Дзяржаўтаінспекцыя забяспечыць паркоўку школьных аўтобусаў, якія суправаджаюць, каля пунктаў правядзення экзамену. Будзе наладжана ўзаемадзеянне з тэрытарыяльнымі органамі МНС і медыцынскімі работнікамі, — адзначыла Ірына Каржова.
Прадстаўніца Міністэрства адукацыі расказала, што ўваход у пункт правядзення цэнтралізаванага экзамену будзе ажыццяўляцца на падставе дакумента, які сведчыць асобу (важна памятаць: дакумент павінен мець тэрмін дзеяння, сапраўдны на момант правядзення рэпетыцыі/экзамену), і пропуска.
— Староннім асобам уваход у пункт правядзення ЦЭ будзе забаронены, — папярэдзіла яна.
Асаблівасць рэпетыцыі гэтага года — тое, што яна пройдзе па ўсіх прадметах па выбары навучэнцаў, уключаючы дзяржаўную мову (беларускую або рускую).
— Школьнікі змогуць апрабаваць свае веды, прайсці цэнтралізаваны іспыт па ўсіх вучэбных прадметах, па якіх прадугледжаны ЦЭ, уключаючы беларускую і рускую мовы. Нагадаю, што летась рэпетыцыя праходзіла толькі па профільных навучальных прадметах, — патлумачыла прадстаўніца Мінадукацыі.
Большасць школьнікаў зарэгістраваліся на рэпетыцыю экзамену па рускай мове і матэматыцы. На трэцім месцы па папулярнасці сёлета біялогія.
Педагогі падкрэсліваюць: у гэтым навучальным годзе як пры правядзенні першага этапу рэпетыцыйнага тэсціравання, так і пры правядзенні наступных, а таксама на рэпетыцыі цэнтралізаванага экзамену будуць выкарыстаны тэсты з уключанымі заданнямі пятага ўзроўню складанасці. Гэта значыць, з’явяцца задачы «з зорачкай». Мэта — прывесці ў поўную адпаведнасць крытэрыі ацэнкі ў школе да крытэрыяў ацэнкі цэнтралізаванага экзамену — выніковай формы атэстацыі выпускнікоў.
У цэлым, «проба» дазволіць прыйсці да цэнтралізаванага экзамену ў маі больш спакойнымі і больш падрыхтаванымі — у тым ліку маральна і псіхалагічна. Структура і складанасць тэстаў на рэпетыцыі цэнтралізаванага экзамену будуць поўнасцю адпавядаць структуры і складанасці тэстаў пры правядзенні як цэнтралізаванага экзамену, так і цэнтралізаванага тэсціравання ў гэтым навучальным годзе, падкрэслілі прадстаўнікі сферы адукацыі.
У гэтым запэўніў, гаворачы аб тэставых заданнях, дырэктар Рэспубліканскага інстытута кантролю ведаў Юрый Міксюк: тэставыя заданні адпавядаюць школьнай праграме.
— Усе заданні, якія будуць на рэпетыцыі цэнтралізаванага экзамену, той жа складанасці, што будуць і на самім цэнтралізаваным экзамене. Ацэнка вынікаў будзе праводзіцца па ўжо вядомых і апублікаваных табліцах. Ніякіх нечаканасцяў для дзяцей не будзе.
Наколькі паспяховай была рэпетыцыя, будучыя абітурыенты і іх бацькі змогуць даведацца ўжо ў лютым: апрацоўка вынікаў будзе праведзена ў двухтыднёвы тэрмін, у трохтыднёвы — вынікі давядуць да ўдзельнікаў. Пры гэтым самі вынікі рэпетыцыйнага цэнтралізаванага экзамену ні на што не ўплываюць, бо сапраўдны іспыт — толькі ў маі.
Усе неабходныя матэрыялы, якія датычацца цэнтралізаванага экзамену і яго рэпетыцыі, можна знайсці на сайце Міністэрства адукацыі ва ўкладцы «Цэнтралізаваны экзамен 2024 года», у тым ліку нарматыўна-прававыя дакументы, памяткі для педагагічных работнікаў і для ўдзельнікаў цэнтралізаванага экзамену. Таксама на сайце Міністэрства адукацыі размешчана інфармацыя для абітурыентаў, якія будуць паступаць на мэтавую форму падрыхтоўкі.
Аляксандра АНЦЭЛЕВІЧ
Фота Лізаветы ГОЛАД
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».