Як выбраць ідэальны букет?

Выбар ідэальнага букета — далёка не заўсёды простая задача. Напярэдадні Дня святога Валянціна і Міжнароднага жаночага дня мы даведаліся, што трэба прымаць да ўвагі пры выбары кветак і якія расліны падыдуць розным людзям.

Калейдаскоп фарбаў і водараў

Улічвайце перавагі таго, каму дорыце. Якія кветкі і водары маглі б спадабацца яму? Калі самастойна вызначыцца цяжка, звярніцеся па параду да каго-небудзь з яго асяроддзя.

Прыміце да ўвагі лад жыцця атрымальніка букета. Даведайцеся, ці няма ў яго алергіі або павышанай адчувальнасці да пэўных раслін. Калі ў планах падарыць «зялёнага сябра» ў гаршку, падумайце аб тым, ці будзе гаспадару камфортна яго даглядаць. Для людзей з насычаным графікам найлепшым выбарам стане непатрабавальная кветка.

Прэзентуючы букет, разам з ім мы даносім да чалавека пэўнае пасланне. Напрыклад, ружы з’яўляюцца сімвалам кахання і рамантыкі, сланечнікі асацыююцца са шчасцем і радасцю, рамонкі ўвасабляюць вернасць, а касачы — давер. Вызначыцеся, што менавіта вы хочаце «сказаць» чалавеку, і выберыце прыдатныя расліны.

Важную ролю адыгрывае і сезонная наяўнасць кветак. Выбраўшы актуальныя для цяперашняй пары года, вы можаце быць упэўнены ў іх свежасці і даступнасці. Акрамя таго, сезонныя кветкі часцяком валодаюць адмысловым шармам і зробяць ваш падарунак незабыўным.

У завяршэнне падумайце над тым, каб дапоўніць кветкавую кампазіцыю асабістымі штрыхамі. Гэта можа быць падарункавая ўпакоўка ў любімых колерах атрымальніка, сентыментальная запіска з сэрцайкамі (напрыклад, да Дня ўсіх закаханых) або паштоўка.

Букет раскажа пра пачуцці

Выбіраючы кветкі для розных людзей, варта ўлічваць не толькі іх асабістыя перавагі, але і вашы адносіны да чалавека, якому дорыце букет. 

Мама. Для галоўнага чалавека вашага жыцця варта абраць кветкі, якія пакажуць любоў і ўдзячнасць, — імі могуць быць ружы, архідэі і лілеі. Ружы з’яўляюцца класічным варыянтам для падарунка: ружовыя сімвалізуюць захапленне і ўдзячнасць, белыя — чысціню і нявіннасць.

Добрым выбарам стануць архідэі. Блізкі чалавек, несумненна, ацэніць гэтыя элегантныя экзатычныя кветкі, якія асацыююцца з любоўю, прыгажосцю і сілай.

Лілеі, у сваю чаргу, з’яўляюцца сімвалам мацярынства, увасабляюць чысціню і адданасць. Аддаўшы перавагу гэтай кветцы, звярніце ўвагу на сорт «Звездочёт» — ён знакаміты выдатным водарам і яркімі кветкамі.

Сястра. Добрым выбарам стануць цюльпаны, касачы ці півоні. Першыя вядомыя разнастайнасцю адценняў і з’яўляюцца сімвалам любові, даравання і вернасці. Перавагай цюльпанаў з’яўляецца іх універсальнасць і адмысловы шарм.

Звярніце ўвагу і на касачы. Элегантныя і яркія кветкі ўвасабляюць веру, надзею і мудрасць. Блізкаму чалавеку прыйдзецца па душы такі ўнікальны і прадуманы падарунак. Далікатную і жаноцкую натуру можна парадаваць букетам духмяных півонь. Кветкі сімвалізуюць вытанчанасць, грацыю і прыгажосць, а іх рамантычны выгляд не пакіне абыякавай ніводную дзяўчыну.

Сяброўка. У гэтым выпадку важна ўлічваць індывідуальнасць чалавека і тып сяброўства. Падыходнымі варыянтамі стануць рамонкі, сланечнікі і гваздзікі.

Рамонкі з’яўляюцца знакам вернасці і сяброўства. Можна абраць як звыклы колер раслін, так і аддаць перавагу яркім адценням — такі букет напэўна выкліча ўсмешку на твары прыяцелькі.

Сланечнікі сімвалізуюць шчасце і сяброўства. Іх сонечны выгляд не толькі імгненна прыцягне ўвагу, але і дапаможа вам выказаць удзячнасць.

Удалым рашэннем стануць і гваздзікі. Дзякуючы сваёй універсальнасці, іх можна камбінаваць з іншымі раслінамі і такім чынам ствараць разнастайныя прыгожыя кампазіцыі.

Калега. Для калегі варта падабраць кветкі, якія не толькі паднімуць настрой знешнім выглядам, але і захаваюць рамкі прафесійна-дзелавых адносін. Звярніце ўвагу на альстрамерыі, хрызантэмы і антурыумы. Першыя знакамітыя вялікай колькасцю расфарбовак, сімвалізуюць росквіт і поспех. Такім чынам вы парадуеце калегу і разам з гэтым пажадаеце ёй прафесійных дасягненняў. У дадатак да гэтага, альстрамерыі з’яўляюцца даўгавечнымі раслінамі — букет з іх зможа доўга ўпрыгожваць працоўнае месца вашай калегі.

Хрызантэмы асацыююцца са станоўчай энергіяй, шчасцем і даўгалеццем. Гэтыя кветкі будуць добра глядзецца, калі скласці букет толькі з іх. Не менш вытанчаныя і ў якасці дадатку да сабранай кампазіцыі.

Антурыумы — яшчэ адзін прыдатны варыянт для падарунка калезе. Экзатычныя і элегантныя кветкі ўвасабляюць гасціннасць і шчасце. Букет антурыумаў дадасць у працоўную прастору ноту вытанчанасці і свята.

Ці дарыць мужчыну кветкі?

Безумоўна, так! У апошнія гады гэтая тэндэнцыя толькі ўзмацняецца. Парадаваць мужчыну букетам можна ў любое свята, у тым ліку дзень нараджэння, юбілей, Дзень бацькі, Дзень святога Валянціна і гэтак далей. Звярніце ўвагу на архідэі, сланечнікі, трапічныя кветкі, каллы і касачы. У якасці альтэрнатывы можна разгледзець сукуленты ці расліны ў вазоне.

Пры падрыхтоўцы прэзента мужчыну рэкамендуецца аддаць перавагу нейтральным або яркім колерам, пазбягаючы пастэльных і мяккіх тонаў. Тым не менш, не забывайце аб асабістых перавагах чалавека. Ведаючы любімае адценне мужчыны, можна парадаваць яго кампазіцыяй у адпаведнай колеравай гаме.

Выбіраючы расліны, якія адпавядаюць асобе і перавагам атрымальніка букета, вы зможаце зрабіць значны і прыемны падарунак.

Лізавета МАЛЬЧУК