Па выніках 2023 года тавараабарот паміж Беларуссю і Казахстанам склаў 1,11 мільярда долараў ЗША. У Беларусі зарэгістравана 55 прадпрыемстваў з казахстанскім капіталам, а ў Казахстане дзейнічае больш 170 аб’ектаў тавараправоднай сеткі беларускіх прадпрыемстваў. Дагаворна-прававая база, якая рэгулюе адносіны дзвюх краін, уключае больш за 80 дакументаў. Перспектывы далейшага супрацоўніцтва і магчымасці для развіцця двухбаковых адносін Прэзідэнт Беларусі Аляксандр Лукашэнка абмеркаваў падчас сустрэчы з Надзвычайным і Паўнамоцным паслом Казахстана ў Беларусі Ерланам Байжанавым.
Найперш кіраўнік дзяржавы падзякаваў за вялікую работу, праведзеную ў адказны для нашай краіны перыяд — электаральную кампанію. «Вы ўважліва сачылі за сітуацыяй, якая адбываецца ў Беларусі. Ведаю, што вы зараз наведваеце розныя населеныя пункты, месцы ў нашай Беларусі. Хацеў бы пачуць вашы ўражанні. Можа быць, вы нешта нам падкажаце, чаго мы не бачым, свежым поглядам заўсёды лепш відаць. Таму мы будзем вам вельмі ўдзячныя», — сказаў ён.
Аляксандр Лукашэнка падкрэсліў, што сустрэча з паслом праходзіць не проста — плануецца афіцыйны візіт Прэзідэнта Казахстана Касыма-Жамарт Такаева ў Беларусь. «Перагаворы пройдуць на самым высокім узроўні, зацікаўленыя асобы сустрэнуцца ў рамках гэтага візіту. Я ўпэўнены, што мільярд тавараабароту, які мы дасягнулі, пасля гэтага візіту акажацца проста смешным. Таму што краіны з такім патэнцыялам. Самыя дружалюбныя, якія знаходзяцца ў інтэграцыйных аб’яднаннях. Такія дзяржавы, як Беларусь і Казахстан, павінны мець самыя прасунутыя адносіны», — заявіў беларускі лідар. Ён звярнуў увагу, што ўжо створаны добрыя сумесныя прадпрыемствы па вытворчасці камбайнаў, трактароў, ліфтаў. Плануецца далейшае прасоўванне беларускіх тэхналогій і стварэнне на іх аснове сумесных прадпрыемстваў у Казахстане. «У Беларусі мы гатовы падтрымліваць вас у любы момант, любыя вашы пажаданні на тэрыторыі Беларусі — для нас закон. Мы гатовы да пашырэння нашага супрацоўніцтва ў плане стварэння сумесных прадпрыемстваў», — адзначыў кіраўнік дзяржавы.
Удзялілі ўвагу і міжнароднай актыўнасці. Сёлета Казахстан старшынствуе ў Арганізацыі дагавора калектыўнай бяспекі і Шанхайскай арганізацыі супрацоўніцтва. У лютым Казахстан ратыфікаваў усе дакументы аб членстве Беларусі ў ШАС. «Мы вам вельмі ўдзячны за гэта. У ліпені ў Астане адбудзецца чарговае паседжанне Шанхайскай арганізацыі супрацоўніцтва, было б вельмі сімвалічна, і мы б гэта віталі, калі б Беларусь менавіта ў Астане стала паўнавартасным членам Шанхайскай арганізацыі супрацоўніцтва. Мы вас будзем пра гэта прасіць. Ад старшынствуючага боку шмат залежыць. І нашаму міністэрству замежных спраў трэба актыўна папрацаваць у гэтым плане», — сказаў Аляксандр Лукашэнка.
Кіраўнік дзяржавы звярнуў увагу, што сённяшняе няпростае становішча ў свеце ўплывае і на Казахстан, і на Беларусь. На адносіны дзвюх дзяржаў асабліва ўплывае пагроза санкцыйнай палітыкі з боку Захаду. «Але мы супрацоўнічаем і павінны знаходзіць кірункі нашага супрацоўніцтва, не ствараючы праблем для Казахстана. Вы павінны ведаць, што мы гатовы з вамі супрацоўнічаць па ўсіх напрамках у інтарэсах вашай дзяржавы. Таму я не бачу тут вялікіх праблем, калі мы будзем рухацца ў напрамку, якія цікавяць Беларусь і Казахстан. Мы можам пераадолець не толькі санкцыі, але і любыя бар’еры і перашкоды. Вы павінны ведаць: вы для нас сябар, і разлічвайце на тое, што мы акажам вам усялякую падтрымку ў вашай дыпламатычнай місіі. Гэта нават не абмяркоўваецца», — запэўніў Прэзідэнт.
Ерлан Байжанаў падкрэсліў, што расцэньвае сусутрэчу з Аляксандрам Лукашэнкам яе асаблівы знак увагі Прэзідэнта да двухбаковага парадку дня ў адносінах Беларусі і Казахстана. «Вы спыталі аб маіх уражаннях. Я яшчэ буду працягваць паездкі. У мяне вельмі сур’ёзныя ўражанні, найперш ад тэхналагічнага развіцця і прамысловага патэнцыялу Беларусі, і вядома ж, ад людзей. Усе, ад галоўных інжынераў да простых рабочых, жадаюць развівацца далей і ў тым ліку ў кірунку Казахстана», — сказаў пасол.
У размове з журналістамі Ерлан Байжанаў расказаў, што Казахстан зацікаўлены ў наладжванні супрацоўніцтва з такімі беларускімі прадпрыемствамі, як «Новус Індустры» з Магілёва (комплекс дрэваапрацоўчых і мэблевых фабрык), «Палімерканструкцыя» з Віцебска (кампанія, якая прапануе комплексныя рашэнні водаадвядзення і водазабеспячэння).
«Размова ідзе не проста аб гандлёвых пастаўках, а аб лакалізацыі вытворчасці. Гэта забяспечыла б больш фундаментальнае супрацоўніцтва. Таму мы арыентуем беларускіх партнёраў на такі падыход. Разумеем, што для падобнага кшталту інвестыцыйных праектаў патрэбна будзе падтрымка дзяржавы. У сувязі з гэтым я прапанаваў ідэю стварыць сумесны фонд прамысловай кааперацыі», — расказаў пасол.
Кажучы аб перспектывах уступлення Беларусі ў ШАС менавіта ў Казахстане, Ерлан Байжанаў падкрэсліў, што падобныя рашэнні знаходзяцца ў зоне кампетэнцыі сакратарыята арганізацыі. «Казахстан вітае ўступленне Рэспублікі Беларсь у Шанхайскую арганізацыю супрацоўніцтва. — падкрэсліў ён. — Мне здаецца, усе перадумовы для гэтага існуюць».
Пасол Казахстана ў Беларусі адзначыў, што нашы краіны шануюць агульную гісторыю. Па яго словах, Казахстан, зацікаўлены ў развіцці адносін з Беларуссю, нягледзячы на цяжкасці. «Саюзнік — гэта паняцце глыбокае і шматграннае. Тут не можа быць голага прагматызму. Саюзнік на тое і саюзнік, што па ўсіх пытаннях трэба ўзаемадзейнічаць, аказваць падтрымку. Адносіны Беларусі і Казахстана менавіта так і будуюцца. Мы разумеем усе рызыкі і трэба проста знаходзіць магчымасці для пазітыўнага ўзаемадзеяння, якое прыносіць карысць», — падсумаваў Ерлан Байжанаў.
Валерыя СЦЯЦКО
Фота: БелТА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
