Мінская міжнародная кніжная выстаўка-кірмаш пройдзе з 14 да 17 сакавіка

Ужо зусім хутка адбудзецца ХХХІ Мінская міжнародная кніжная выстаўка-кірмаш, якая пройдзе з 14 да 17 сакавіка. У беларускай сталіцы па добрай традыцыі каля 20 краін прадставяць свае скарбы кнігавыдавецкай галіны. Магчымасць убачыць разнастайнасць кніжнай прадукцыі, шанц трапіць на жывую сустрэчу з любімымі аўтарамі і стаць часткай вялікага свята, прысвечанага кніжнаму слову, — гэта толькі невялікі зрэз тых шматлікіх мерапрыемстваў, якія прапануюць наведвальнікам арганізатары і ўдзельнікі.

— Выстаўка пройдзе як знакавая для нашай краіны і для кніжнай сферы ў прыватнасці. У нас ёсць новыя ідэі, мы рыхтуем новыя падзеі, якія, спадзяюся, будуць ацэнены наведвальнікамі. Сёлета ў нас на выстаўцы будуць шырока прадстаўлены краіны блізкага і далёкага замежжа. Для нас гэта вельмі адказна і прынцыпова ў сувязі з пэўнымі геапалітычнымі падзеямі, з працэсамі, якія адбываюцца ва ўсім свеце, пераацэнкай каштоўнасцяў, якія мы ўсе назіраем. Фіксіуюцца яны і пісьменнікамі, якія будуць разважаць і гаварыць на тэму і ў ходзе работы пляцовак, — адзначыў намеснік міністра інфармацыі Рэспублікі Беларусь Ігар Бузоўскі. — Адзначу толькі адно: сёння арганізацыя работы міжнароднага квартала на выстаўцы папоўніцца новымі «фішкамі», падыходамі. У прыватнасці, цэнтральным экспанентам стане Рэспубліка Іран. Краіна будзе не проста ўдзельніцай міжнароднага квартала, дзе прэзентуюцца кнігі — яе выданні там адразу можна будзе і набыць. Усяго на стэндзе Ірана прадставяць парадку 500 найменняў кніг на рускай мове. І для нас тое таксама важна, бо гэта даступнасць кніг, якія па сваім змесце вельмі разнапланавыя, пачынаючы ад прыроды, культуры і заканчваючы кнігамі пра палітыку. Я спадзяюся, што ўсе краіны, якія прымуць удзел у нашай міжнароднай кніжнай выстаўцы, будуць нечым нас здзіўляць.

Што да тэматычных акцэнтаў на сёлетняй выстаўцы-кірмашы, то іх будзе некалькі і ў іх знойдуць адлюстраванне падзеі, якія адбываюцца ў нашай краіне. Увага будзе ўдзелена тэме Года якасці, 80-годдзю вызвалення Беларусі ад нямецка-фашысцкіх захопнікаў. Дарэчы, заўважна гэта стане і па афармленні цэнтральнага стэнда. Папярэдне вядома, што на ім убачым плошчу Перамогі. На цэнтральным стэндзе ўвазе наведвальнікаў прадставяць таксама шырокі выбар кніг ваеннай тэматыкі, якія прадаюцца ў Беларусі. Кожнае з выданняў мае свой GR-код, па спасылцы праз яго можна знайсці ці месца продажу выдання, ці замовіць яго па пошце. Згадана будзе і пра 30-годдзе прыняцця Канстытуцыі Рэспублікі Беларусь. Работа цэнтральнай пляцоўкі ў ходзе выстаўкі па аналогіі з мінулым годам будзе пабудавана на інтэрактыўных зносінах. А значыць, магчымасць завітаць на мерапрыемствы будзе ў кожнага, няхай для некага і ў анлайн-фармаце.

Выканаўчы дырэктар Мінскай міжнароднай кніжнай выстаўкі-кірмашу Дзмітрый Макараў распавёў, што лакацыя правядзення выстаўкі ранейшая, і ўваход на яе мерапрыемствы бясплатны. Таксама ад станцыі метро Няміга зноў будзе курсіраваць спецыяльны паэтычны аўтобус, якім не толькі зможаце дабрацца на месца прызначэння, але і сустрэнецеся ў ім з беларускімі пісьменнікамі.

— Немалаважна, што на выстаўку прыязджаюць па рэдкія кнігі, навінкі. І сёлета ў нас будзе прадстаўлена шмат новых выдавецтваў з Расіі, у асноўным з Масквы. Яны паспрыяюць новаму інтарэсу да кнігі, — адзначыў Дзмітрый Макараў. — Уся падрабязная інфармацыя па кніжнай выстаўцы ёсць на афіцыйным інтэрнэт-партале кніжны кірмаш. бел. Там можна будзе сачыць і за падзеямі ў ходзе яе правядзення. Што датычыцца галоўных стэндаў, будуць прадстаўлены Іран, Расія, Кітай. Хто цікавіцца вучэбнай літаратурай, шырокі выбар будзе ў адукацыйным квартале. А ў міжнародным квартале прадставяць свае дасягненні ў кнігавыданні каля 20 краін.

Напярэдадні выстаўкі-кірмашу 13 сакавіка зноў запланавана правядзенне міжнароднага сімпозіума літаратараў «Пісьменнік і час». Чарговы раз прадстаўнікі пісьменніцкіх, выдавецкіх колаў, творчай інтэлігенцыі краін-удзельніц выстаўкі будуць у Нацыянальнай бібліятэцы Беларусі абмяркоўваць тэму «Партнёрства ў імя будучыні».

Што датычыцца беларускіх выдавецтваў, то яны не толькі прадставяць кнігі, але і арганізуюць цікавыя сустрэчы з пісьменнікамі, рыхтуюць акцыі, віктарыны і іншыя мерапрыемствы для прэзентацыі сваёй прадукцыі. Так, напрыклад, выдавецтва «Мастацкая літаратура» прэзентуе ў асноўнай экспазіцыі шмат выданняў, у тым ліку кнігу, якая нядаўна ўбачыла свет «За цябе, Беларусь». Яна прысвечана 80-годдзю вызвалення Беларусі, і ў яе аснове — ваенная хроніка з 1941 да 1944 года. Адлюстраваны галоўныя ваенныя падзеі, якія адбываліся на тэрыторыі Беларусі, даты, публіцыстыка, пісьмы людзей, якія ваявалі на нашых землях. Яшчэ, як распавёў дырэктар «Мастацкай літаратуры» Алесь Бадак, у рамках кніжнай выстаўкі адбудзецца падпісанне дагавора паміж выдавецтвам і Выдавецтвам літаратуры на замежных мовах Кітайскай Народнай Рэспублікі аб выданні кнігі-біяграфіі Мінска. Гэтае выданне будзе на беларускай, кітайскай і англійскай мовах у серыі «Сто гарадоў на Шаўковым шляху».

Выдавецкі дом «Звязда» прадставіць шырокай аўдыторыі ў тым ліку і навінкі. Сярод іх — кніга «Ведаем, ганарымся» Ірыны Аўсяп’ян, у якой пад адной вокладкай чытач знойдзе нарысы пра самых знакамітых дзеячоў культуры, асветніцтва Беларусі ХХ—ХХІ стагоддзя. Таксама выйшла кніга аўтара Андрэя Караля «Дарогі vs Сэнсы», прэзентацыя якой запланавана ў рамках выстаўкі. Будзе прадстаўлена чытачам і чацвёртая кніга са збору мемуараў народнага пісьменніка Беларусі Мікалая Чаргінца «Цяжкія дарогі жыцця». Кніга «Галавасек» Анатоля Бензерука распавядае пра карную аперацыю ў вёсцы Драмлёва ў Жабінкаўскім раёне.

Можна будзе знайсці сярод выданняў і кнігі ўдзельнікаў літаратурнага конкурсу «ЛітUp» і адкрыць для сябе новых аўтараў. Яшчэ на стэндзе выдавецтва запланаваны шматлікія сустрэчы з любімымі пісьменнікамі, аўтограф-сесіі. Саюз пісьменнікаў Беларусі праводзіць сумесна з калегамі з Расіі, якія прыедуць на Мінскую міжнародную кніжную выстаўку, Дэкаду рускай кнігі, у рамках якой пройдзе шэраг мерапрыемстваў у бібліятэках, студэнцкіх аўдыторыях і на пляцоўцы Саюза пісьменнікаў.

Алена ДРАПКО

Фота Кацярыны УРБАН