У Мінску работніка службы дастаўкі выкрылі ў крадзяжы веласіпеда

У Мінску работнік службы дастаўкі выкраў веласіпед, паведамляе БелТА са спасылкай на ГУУС Мінгарвыканкама.

У Маскоўскае РУУС сталіцы з заявай аб крадзяжы веласіпеда звярнулася мінчанка. Жанчына пакінула двухколавы транспартны сродак у пад’ездзе, а калі вярнулася, то не знайшла сваю маёмасць. Агульная сума шкоды склала Br600.

Супрацоўнікі крымінальнага вышуку па падазрэнні ў крадзяжы аператыўна затрымалі 32-гадовага работніка службы дастаўкі. Сышчыкі высветлілі, што мужчына, ведаючы код ад дамафона, пракраўся ў пад’езд, дзе знайшоў веласіпед. Пазбавіўшыся ад замка, ён выкраў веласіпед, прыехаў на ім да свайго дома і пакінуў у пад’ездзе.

У дачыненні да затрыманага следчы распачаў крымінальную справу за крадзеж.

Міліцыя нагадвае, што адзіны гарантаваны спосаб абароны веласіпеда ад крадзяжу — не пакідаць яго без нагляду. Лепшае месца для захоўвання двухколавага транспарту — гэта кватэра.