Беларускія пейзажы прадставяць на выставе ў Нацыянальным музеі мастацтваў у Баку

Беларускія краявіды прадставяць на выставе ў Нацыянальным музеі мастацтваў у Баку падчас Дзён культуры Беларусі ў Азербайджане, якія будуць праходзіць з 1 па 4 красавіка, паведаміў БелТА старшыня Беларускага саюза мастакоў Глеб Отчык.

Экспазіцыя работ беларускіх мастакоў будзе прадстаўлена з самага пачатку Дзён культуры. «Едуць чатыры аўтары: Антон Вырва, Ганна Садоўская, Ганна Конанава і я, Глеб Отчык. Мы вязем пейзажы, дзякуючы якім хочам паказаць прыгажосць беларускага краю, розных яго рэгіёнаў. Усяго ў экспазіцыі 35 работ, напісаных за апошнія два гады», — расказаў старшыня Беларускага саюза мастакоў.

Паводле яго слоў, цёплыя адносіны з мастакамі Азербайджана падтрымліваюцца з 2013 года. У Беларускага саюза мастакоў у Азербайджане шмат сяброў. Ёсць і рэальны плён такога супрацоўніцтва. Напрыклад, Глеб Отчык у свой час афармляў беларускае пасольства ў Баку: займаўся манументальным рэльефам, роспісамі.

«З мастакамі Азербайджана мы рэалізавалі скульптуру знакамітаму паэту сярэднявечнага Усходу Нізамі Гянджаві, устаноўленую насупраць пасольства Азербайджана ў Мінску. У 2014 годзе да нас на буйны пленэр прыязджалі мастакі з Азербайджана. А пленэр у Азербайджане праходзіў пры ўдзеле беларускіх мастакоў», — адзначыў Глеб Отчык.

Ён выказаў надзею, што з падпісаннем пагадненняў па выніках маючых адбыцца Дзён культуры супрацоўніцтва з мастакамі Азербайджана стане больш моцным, з’явіцца дадатковая магчымасць для рэалізацыі выставачных праектаў. У беларускага боку ёсць намеры падпісаць мінімум 3 пагадненні: з Саюзам мастакоў Азербайджана, Нацыянальным музеем мастацтваў, Цэнтрам Гейдара Аліева.

Прэв’ю: БелТА