Закон «Аб адвакатуры і адвакацкай дзейнасці ў Рэспубліцы Беларусь» быў прыняты ў снежні 2011 года. Па ступені наступстваў яго прызнаюць рэфармісцкім, а міжнародныя эксперты называюць гэты закон адным з прагрэсіўных на прасторы СНД. Разам з тым, пасля яго прыняцця дыскусіі і спрэчкі вакол беларускай адвакатуры не сціхлі. Праз 2 гады парламентарыі правялі маніторынг палажэнняў закона і сабралі за «круглым сталом» вучоных, прадстаўнікоў адвакацкай суполкі, Адміністрацыі Прэзідэнта, Генеральнай пракуратуры, Следчага камітэта і Міністэрства юстыцыі, каб разам выпрацаваць канкрэтныя прапановы па вырашэнні праблем у гэтай сферы.
— Канстытуцыя Рэспублікі Беларусь гарантуе права кожнага на атрыманне кваліфікаванай юрыдычнай дапамогі, — нагадала суразмоўцам старшыня Пастаяннай камісіі Савета Рэспублікі па заканадаўстве і дзяржаўным будаўніцтве Лілія МАРОЗ. — Сэнсам існавання адвакатуры як інстытуту прафесійнай абароны і прадстаўніцтва з'яўляецца аказанне юрыдычнай дапамогі ўсім, хто мае ў ёй патрэбу. Бясспрэчна, наяўнасць у дзяржаве асоб, якія здольныя правільна і кваліфікавана аказаць такую дапамогу, з'яўляецца залогам дэмакратычнага развіцця грамадства.
Закон «Аб адвакатуры і адвакацкай дзейнасці ў Рэспубліцы Беларусь» быў прыняты якраз з мэтай аказання больш эфектыўнай прававой дапамогі. У ім замацаваны новыя кірункі дзейнасці адвакатаў, якія цяпер маюць права выступаць прымірыцелямі, медыятарамі і трацейскімі суддзямі. Істотныя змены адбыліся ў сістэме органаў адвакацкага самакіравання, у правах і абавязках адвакатаў.
— Закон увёў адвакацкую манаполію на прадстаўленне інтарэсаў кліентаў у судзе, што ў юрыдычнай грамадскасці, асабліва сярод адвакатаў, выклікала ў цэлым пазітыўную рэакцыю, — канстатавала старшыня Пастаяннай камісіі Палаты прадстаўнікоў па заканадаўстве Людміла МІХАЛЬКОВА. — Аднак адразу пасля прыняцця закона і падчас яго дзеяння выказваліся і досыць крытычныя заўвагі, якія тычацца ўзмацнення кантролю дзяржавы над адвакацкай суполкай, бясплатнай юрыдычнай дапамогі, адсутнасці цэласнай сістэмы падрыхтоўкі і перападрыхтоўкі прафесійных кадраў адвакатуры.
Арганізатары «круглага стала» засяродзілі ўвагу астатніх яго ўдзельнікаў на тым, што ў адпаведнасці з рэгламентам, усе выказаныя на пасяджэнні ідэі могуць увайсці ў будучы законапраект, бо праводзяць яго разам і дэпутаты Палаты прадстаўнікоў, і члены Савета Рэспублікі Нацыянальнага сходу Беларусі.
— У цэлым закон «адбыўся» — як для большасці адвакатаў, так і для грамадзян, — прызнаў старшыня Рэспубліканскай калегіі адвакатаў Віктар ЧАЙЧЫЦ. — Да станоўчых навін закона трэба аднесці, перш за ўсё, манаполію адвакатаў на прадстаўніцтва ў судах, утварэнне новых формаў адвакацкай дзейнасці і даступнасць юрыдычнай дапамогі. Разам з тым, ёсць новаўвядзенні, якія можна аднесці як да станоўчых, так і да адмоўных.
Сярод неадназначных нормаў старшыня Рэспубліканскай калегіі назваў самастойнасць адвакатаў у вызначэнні матэрыяльна-тэхнічнага развіцця калегій.
«З аднаго боку, гэта цудоўна: у адвакатаў з'явілася рэальная магчымасць добра зарабляць. Акрамя таго, заканадаўца зрабіў усё для таго, каб максімальна зменшыць любыя перадумовы для фінансавых парушэнняў. З іншага боку, не ўсе адвакаты зразумелі, што прадастаўленыя магчымасці накладаюць на іх і абавязкі. Напрыклад, вырашаючы пытанне з унёскамі на ўтрыманне тэрытарыяльных калегій і ў фонд развіцця адвакатуры, неабходна думаць пра тое, што ў аснову пастаўлена даступнасць юрыдычнай дапамогі, і яна павінна быць аказана ўсім грамадзянам Беларусі, а не толькі жыхарам абласных цэнтраў і сталіцы», — патлумачыў Віктар Чайчыц.
Ён прапанаваў перакласці задачу вызначэння ўнёскаў на саветы адвакатаў, у якія выбіраць найбольш аўтарытэтных і прагрэсіўных прафесіяналаў, якія жадаюць працаваць на карысць усёй адвакатуры.
Далёка не адназначнай старшыня Рэспубліканскай калегіі назваў таксама норму па арганізацыі стажыроўкі і прыёму ў адвакатуру па заяўках юрыдычных кансультацый. «Упэўнены, што адвакатура праз уласныя саветы павінна самастойна падбіраць кадры, навучаць, павышаць іх кваліфікацыю і вырашаць, у якіх выпадках плаціць стажорам, а ў якіх, наадварот, браць плату за навучанне, як гэта робіцца ва ўсім свеце».
— Аплачваць стажыроўку ў сталіцы немэтазгодна, але трэба плаціць у 3-4 разы больш тым, хто пайшоў бы працаваць, напрыклад, у Брагіне, дзе ў нас цяпер няма не толькі ніводнага стажора, але і ўласна адваката, — лічыць Віктар Чайчыц.
Сярод станоўчых новаўвядзенняў быў названы інстытут памочнікаў адваката. Але на практыцы высветлілася, што юрыдычныя ВНУ не маюць права накіроўваць маладых спецыялістаў па размеркаванні на гэтую пасаду, бо ў кваліфікацыйным даведніку няма такой спецыяльнасці. Універсітэт ужо быў папярэджаны Камітэтам дзяржаўнага кантролю, што размеркаванне на пасаду памочніка адваката з'яўляецца парушэннем і будзе карацца вялікімі штрафамі.
Ёсць шмат пытанняў, якія маюць важнае значэнне не толькі для работы адвакатаў, але для ўсіх арганізацый і ведамстваў, і самае галоўнае — для грамадзян, якім таксама неабходна ведаць, на што яны могуць разлічваць пры звароце па кваліфікаваную юрыдычную дапамогу, і што рабіць, калі гэтая дапамога аказваецца няякасна. Пытанні адвакацкай тайны, аказання юрыдычнай дапамогі за кошт калегіі, атрыманне адказаў на запыты адвакатаў трэба прапісаць максімальна дакладна, лічаць у Рэспубліканскай калегіі адвакатаў.
— Адно з галоўных пытанняў: «Хто павінен вырашаць усе спрэчныя пытанні ў паўсядзённай адвакацкай дзейнасці?» На наш погляд, гэта павінны рабіць органы адвакацкага самакіравання, — сказаў Віктар Чайчыц. — Недакладна прапісаныя ў законе паўнамоцтвы Рэспубліканскай калегіі не дазваляюць ёй якасна кіраваць тэрытарыяльнымі структурамі.
Сярод самых балючых праблем адвакатуры былі названы адказы на запыты. Адвакаты маюць права запытваць інфармацыю, але далёка не ўсе ведамствы лічаць неабходным ім адказваць. Напрыклад, Міністэрства аховы здароўя кажа: «А дзе напісана, што ваш закон больш важны, чым закон аб ахове здароўя?» З-за адсутнасці ўзгодненасці паміж прававымі актамі адвакаты не маюць магчымасці якасна падрыхтаваць іскавыя заявы, прыкласці ўсе неабходныя дакументы, што прымушае потым адкладаць судовы разбор.
«А мы не можам гэтыя дакументы сабраць, бо, калі, напрыклад, муж з жонкай дзеляць маёмасць і жонка ведае, што муж употайкі ад яе купіў аўтамабіль, то на наш запыт ДАІ спасылаецца на «тайну асабістага жыцця» і адмаўляе ў прадастаўленні інфармацыі. Мы прапануем рэалізоўваць механізм, які б папярэджваў злоўжыванні, але дазваляў бы нам якасна выконваць сваю работу», — слушна заўважаюць адвакаты.
Вольга МЯДЗВЕДЗЕВА
Сумесныя праекты ядзерных тэхналогій.