Рэформа на сяле: як гэта рабілі продкі?
У XІX стагоддзі і да Кастрычніцкай рэвалюцыі 1917 года на тэрыторыі сучаснай Беларусі сельская гаспадарка была даволі прыбытковай справай. Каб спрыяць яе развіццю, яднаць тых, хто валодае зямлёй, ствараліся спецыялізаваныя таварыствы.
Адно з такіх таварыстваў да 1903 года ўзначальваў Вацлаў Косаў, адзін з памешчыкаў, які валодаў вёскай Падбярэззе. Больш за тое, па яго ініцыятыве было створана сельскагаспадарчае вучылішча. Будынак у пасёлку Лужасна (пад Віцебскам. — Аўт.) захаваўся да нашых дзён. Першы набор навучэнцаў і афіцыйнае адкрыццё навучальнай установы адбыліся 15 лістапада 1909 года. Пасля Кастрычніцкай рэвалюцыі на яго базе стварылі сельскагаспадарчую школу, якая ў 1929 годзе была ператворана ў Лужаснянскі дзяржаўны льнопяньковы тэхнікум. Цяпер ён функцыянуе як аграрны каледж Віцебскай ордэна «Знак Пашаны» дзяржаўнай акадэміі ветэрынарнай медыцыны. З моманту арганізацыі навучальнай установы падрыхтавана каля 21,2 тысячы спецыялістаў.
— Увогуле сельскагаспадарчыя таварыствы ўпершыню з'яўляюцца ў Расіі ў першай палове XVІІІ стагоддзя. Іх мэта — удасканаленне сельскай гаспадаркі і развіццё аграрнай навукі. У 1765 годзе было заснавана Імператарскае вольнае эканамічнае таварыства для, як сказана ў статуце, «распаўсюджвання ў народзе карысных ведаў». Што тычыцца тэрыторыі сучаснай Беларусі, у 1826 годзе ў Віцебску стварылі Беларускае вольнае эканамічнае таварыства — па ініцыятыве памешчыкаў Віцебскай і Магілёўскай губерняў. Дарэчы, у нашым музеі ёсць пячатка гэтай арганізацыі. У 1841 годзе яно спыніла дзейнасць. І ў «новым абліччы» адрадзілася ў 1876 годзе. Мела назву «Віцебскае таварыства сельскіх гаспадароў». Ганаровым старшынёй быў Павел Растоўцаў, віцебскі губернатар. Прымалі тых, хто працуе на вёсцы або цікавіцца сельскагаспадарчай тэмай. Да 1905 года таварыства налічвала каля 390 членаў, — расказвае Валерый Шышанаў, намеснік дырэктара Віцебскага абласнога краязнаўчага музея па навуковай працы.
Паводле яго слоў, заступнікам таварыства быў брат імператара — вялікі князь Уладзімір Аляксандравіч.
У статуце гаварылася, што таварыства магло набываць уласнасць (у прыватнасці, з першых рук — добрыя пароды коней, іншых жывёл, а таксама якаснае насенне — для раздачы іх членам таварыства і жыхарам па прывабных цэнах), а таксама валодала правам уручаць прэміі і медалі тым, хто вызначыўся ў галіне сельскай гаспадаркі.
— У 1879 годзе праўленнем было зарэгістравана Таварыства ўзаемнага крэдыту землеўладальнікаў Віцебскай губерні. Больш за 90 членаў для гэтага ўнеслі звыш за 11 тысяч рублёў капіталаў. А ў той час на гэтую суму можна было купіць вельмі добрую сядзібу. Неўзабаве грашовы абарот вылічаўся мільёнамі. У 1898-1899 гадах выходзіла газета «Віцебскі лісток» пад рэдакцыяй старшыні таварыства Аляксандра Мікалаевіча Хвастова. У ёй змяшчаліся матэрыялы па кан'юнктуры мясцовага рынку, артыкулы эканамічнага характару. Пісалі аб крэдытнай палітыцы, канкурэнцыі, выкарыстанні навінак тэхнікі, становішча гаспадарак, жыццё сялян, — працягвае Валерый Шышанаў.
Дарэчы, менавіта Аляксандр Хвастоў абгрунтаваў неабходнасць пераводу сялянскіх гаспадарак на хутарскую форму землекарыстання, спасылаючыся на станоўчы вопыт развіцця фермерства ў Заходняй Еўропе і ЗША, а таксама сфармуляваў перавагі такога падыходу: стварэнне ўмоў для праяўлення ініцыятывы і зацікаўленасці працавітых сялян у выніках сваёй працы, ліквідацыі цераспалосіцы, правільнага вядзення севазвароту. Для вырашэння пытання аграрнай перанаселенасці (у Віцебскай губерні ў той час яна была адной з самых высокіх у Расіі) прапаноўваў урадавае заахвочванне перасялення сялян у Сібір шляхам стварэння спецыяльнага перасяленчага банка, прадастаўлення льгот перасяленцам. Такім чынам, Віцебскае таварыства сельскіх гаспадароў у асобе спадара Хвастова апярэдзіла шматлікія ідэі, закладзеныя пасля ў Сталыпінскай аграрнай рэформе. Невыпадкова і тое, што ў Віцебскай губерні разбурэнне абшчыны, перасяленне, хутарызацыя ў пачатку XX стагоддзя праводзіліся вельмі актыўна ў параўнанні з іншымі рэгіёнамі Расіі.
На той час на Віцебшчыне было мала прамысловых прадпрыемстваў. Вытворчасцю тавараў займаліся ў асноўным рамеснікі. А сельская гаспадарка якраз была вельмі развіта. Прыдзвінскі край тады спецыялізаваўся на льнаводстве. Яно было распаўсюджана настолькі шырока, што менавіта з поўначы сучаснай Беларусі экспартавалі за мяжу прыкладна 70% усяго льну. Гэта звязана яшчэ і з вельмі зручным геаграфічным знаходжаннем.
Вышэйзгаданае таварыства лабіравала меры па патанненні крэдытаў. Адзін з экспертаў у газеце крытыкаваў мясцовыя банкі за прадастаўленне крэдытаў з працэнтнай стаўкай звыш 10% у год (пра такія крэдыты зараз можна толькі марыць. — Аўт.). Ён жа падлічыў, што мясцовыя памешчыкі могуць «пацягнуць» выплату крэдыту ў памеры не больш за 4% у год! Прапаноўвалася, каб скараціць працэнтныя стаўкі, аб'яднаць дваранскі і сялянскі банкі ў зямельны. Абмяркоўвалася таксама ідэя ствараць таварыствы ўзаемнага крэдыту.
Напрыканцы XІX стагоддзі праводзілі шмат эксперыментаў, каб ураджаі былі лепшымі. Напрыклад, фасфарытная мука пачынала выкарыстоўвацца ў якасці ўгнаення. Пытанне аб эфектыўнасці неарганічных угнаенняў было тады вельмі актуальным. «Да вопыту трэба ставіцца са строгай дакладнасцю!» — пісаў «Віцебскі лісток».
Сусветнай сенсацыяй стаў яшчэ адзін вопыт. У 1889 годзе кіеўскія эксперыментатары паспрабавалі паспрыяць стымуляцыі росту раслін... пад уздзеяннем электрычнага поля. Тады пра гэта напісаў нават парыжскі часопіс. Рост насення, на думку рацыяналізатараў, адбываецца ў выніку электралізацыі глебы, у якую закопваліся цынкавыя і медныя лісты з пазалочанымі шыпамі і злучаліся па паветры дротам... Што дзіўна, падчас вопытаў высветлілася, што папярэднія вынікі нядрэнныя. Аналагічную практыку спрабавалі выкарыстоўваць і на Віцебшчыне.
Віцебскае таварыства сельскіх гаспадароў арганізоўвала маштабныя сельскагаспадарчыя выставы — правобраз знакамітай савецкай выставы дасягненняў народнай гаспадаркі. У прыватнасці, у Дзвінску (цяперашні Даўгаўпілс, які тады быў у складзе Віцебскай губерні. — Аўт.). На іх былі прадстаўлены ўзоры малочнай прадукцыі, збожжавыя, агародніна і садавіна... Працавалі секцыі конегадоўлі, дробнай свойскай жывёлы, птушкі, лясной гаспадаркі.
Што цікава, арганізатары выставы ладзілі канцэрты вядомага віяланчэліста Аляксандра Вержбіловіча.
У апошнія гады свайго існавання таварыства ўяўляла сабой вельмі разгалінаваную структуру. Акрамя Лужаснянскага вучылішча, пры таварыстве былі камісійнае бюро, музей жывёлагадоўлі і малочнай гаспадаркі (заснаваны ў 1903 годзе), таварыства рыбаводства і рыбалоўства, камісія па арганізацыі земляробчых гурткоў. Апошніх у падпарадкаванні таварыства ў 1915 годзе налічвалася каля 140.
Арганізоўваліся таксама курсы па жывёлагадоўлі і малочнай гаспадарцы для «земляробчага насельніцтва». У адпаведнай справаздачы адзначалася: «Звычайна слухачы настолькі цікавяцца курсамі, што колькасць тых, што прыходзяць, павялічваецца з дня ў дзень. А колькасць ахвотных прымаць удзел у практычных занятках бывае такая вялікая, што большасці прыходзіцца адмаўляць, каб пры абмежаваным ліку практыкантаў апошнія маглі больш знаёміцца з тэхнікай... І тыя з іх, якія ў пачатку курсаў ставіліся да справы абыякава, станавіліся сур'ёзнымі і акуратнымі работнікамі».
Кастрычніцкая рэвалюцыя перарвала дзейнасць таварыства. 1 снежня 1917 года маёнтак Падбярэззе рэквізавалі і пера-
далі Мішкаўскаму валасному зямельнаму камітэту. Былыя ўладальнікі Косавы выселены...
Аляксандр ПУКШАНСКІ
Фота з архіва
Віцебскага абласнога краязнаўчага музея.
Віцебскі раён
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?