Саміт Еўрасаюза, што адбыўся 30 жніўня 2014, меў даволі важнае значэнне як для будучыні Беларусі, так і для Расійскай Федэрацыі. Найбольш істотнае пытанне саміту было аб тым, ці ісці ЕС і ў далейшым па шляху нарошчвання санкцый супраць Расіі або перайсці да кардынальна новай палітыкі. Адной з задач беларускай знешняй палітыкі было дапамагчы як Расіі, так і Украіне ўрэгуляваць усе супярэчнасці, паколькі менавіта ўкраінская сітуацыя давала падставы для абмеркавання ў ЕС падобных крокаў.
Нягледзячы на тое, што сустрэча ў Мінску 26 жніўня была досыць плённай (Уладзімір Пуцін і Пётр Парашэнка аднавілі асабісты кантакт і абмяняліся думкамі аб перспектывах канца грамадзянскай вайны ва Украіне), на саміце Еўрасаюза было ўсё ж вырашана пайсці па шляху новых санкцый супраць Расіі.
Падчас самога мерапрыемства новыя санкцыі абвешчаны не былі, аднак Пётр Парашэнка заявіў, што яны абмяркоўваліся і ўсё ж будуць уведзены. У якасці апошняга шанцу для Расіі пазбегнуць санкцый ім была агучана сустрэча ў Мінску 1 верасня (пасяджэнне трохбаковай кантактнай групы Украіна—АБСЕ—Расія), што зноў выводзіць Мінск у цэнтр вырашэння гэтай праблемы. Хоць і цяжка чакаць, што гэтае сур'ёзнае пытанне можа быць вырашана ў рамках адной мінскай сустрэчы.
На саміце было таксама зроблена дастаткова шмат рэзкіх заяў у адрас Расіі. Як адзначыў старшыня Еўракамісіі Жазэ Мануэл Барозу, «калі не будзе змен у паводзінах расійскага кіраўніцтва і мы не зможам прыйсці да сапраўднага палітычнага працэсу, я баюся, што далейшая эскалацыя можа не дазволіць аднавіць тыя адносіны, якія, як я лічу, у інтарэсах большасці (краін-членаў) ЕС і Расіі. Пад гэтым я маю на ўвазе кропку незвароту». А прэзідэнт Літвы і зусім паведаміла прысутным, што Расія атакавала Украіну, і заклікала да паставак зброі Украіне.
Рэакцыя ЗША на рашэнні саміту ЕС была цалкам прадказальнай. Прэс-сакратар Белага дома па нацыянальнай бяспецы Кейтлін Хэйдан заявіла: «Мы вітаем рашэнне Еўрапейскага савета прадэманстраваць цвёрдую падтрымку суверэнітэту і тэрытарыяльнай цэласнасці Украіны, а таксама падрыхтаваць для разгляду ў найбліжэйшыя дні далейшыя санкцыі».
Яшчэ адным важным вынікам саміту стала прызначэнне дзвюх новых найвышэйшых службовых асоб у іерархіі Еўрасаюза, што, уласна кажучы, і было галоўнай афіцыйнай мэтай мерапрыемства. Прэм'ер-міністр Польшчы Дональд Туск прызначаны старшынёй Еўрапейскага савета замест Хермана Ван Рампея, а міністр замежных спраў Італіі Федэрыка Магерыні стане новым вярхоўным прадстаўніком Еўрасаюза па замежных справах і віцэ-прэзідэнтам Еўракамісіі, змяніўшы на гэтай пасадзе брытанку Кэтрын Эштан.
У Польшчы пачаліся сур'ёзныя дыскусіі аб тым, што ж цяпер будзе з ліберальнай партыяй «Грамадзянская платформа», паколькі, на думку многіх, Дональд Туск з'яўляўся самым яркім яе прадстаўніком і знайсці раўнацэнную замену будзе вельмі няпроста. З пункту гледжання экспертаў, новыя прызначэнні ў ЕС маюць дваістыя наступствы для Расіі. Прызначэнне на высокую пасаду прадстаўніка Польшчы, несумненна, з'яўляецца негатывам, улічваючы ўсе складанасці расійска-польскіх адносін. У дачыненні да Федэрыка Магерыні дамінуючымі з'яўляюцца высновы, што Масква больш выйграла, чым прайграла, паколькі італьянка сімпатызуе Маскве, што, дарэчы, доўга перашкаджала яе прызначэнню на гэтую пасаду.
Што тычыцца наступстваў новых прызначэнняў для Беларусі, то яны досыць падобныя. На жаль, з польскімі палітыкамі, нягледзячы на непасрэднае суседства нашых краін, нам даволі складана дамовіцца. Не сказаць, што Беларусь не робіць спроб (адной з іх з'яўляецца нядаўні візіт міністра замежных спраў Беларусі Уладзіміра Макея ў Варшаву), але, як правіла, вывесці адносіны на стабільна пазітыўны ўзровень складана.
У дачыненні да Федэрыка Магерыні несумнеўным плюсом з'яўляецца яе італьянскае паходжанне. Калі яе папярэдніца ў галіне прадстаўніцтва знешняй палітыкі ЕС, баранеса Кэтрын Эштан была родам з Вялікабрытаніі, якая з'яўляецца самым важным саюзнікам ЗША ў Еўрасаюзе, што, безумоўна, накладвала адбітак на яе пазіцыю ў адносінах да нашай краіны, то мець справу з Італіяй і яе палітыкамі Беларусі заўсёды было непараўнальна лягчэй. Акрамя гэтага, Федэрыка Магерыні вядомая як добры аналітык, здольны разбірацца ў складаных пытаннях міжнародных адносін. А цяперашнія адносіны Беларусі з Еўрапейскім саюзам якраз і з'яўляюцца пытаннем такога кшталту, і хочацца верыць, што для іх разблакіравання здольнасці Магерыні будуць да месца.
Зрэшты, не будзем забывацца пра тое, што паўнамоцтвы цяперашніх старшыні Еўрапейскага савета Хермана Ван Рампея і вярхоўнага прадстаўніка Еўрасаюза па замежных справах Кэтрын Эштан скончацца яшчэ толькі праз тры месяцы.
Сяргей КІЗІМА,
доктар палітычных навук
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?