Як будуюцца і размяркоўваюцца дамы ў сельскай мясцовасці?
У саўгасе «Воранаўскі» заявы аб пастаноўцы на жыллёвы ўлік рэгіструюць у… вучнёўскім сшытку. Без указання даты пастаноўкі і зняцця з чаргі, звестак, калі жыллё выдзелена. Больш за тое, за два папярэднія гады там ні разу не праводзілі пасяджэнні прафсаюзнага камітэта і жыллёва-бытавой камісіі па пытаннях пастаноўкі на ўлік і выдзялення жылля. Што не перашкодзіла кіраўніку гаспадаркі ў пяці выпадках асабістым рашэннем прадставіць жылыя дамы — без неабходных дакументаў. І гэта толькі кропля ў моры парушэнняў, якія выявіў Камітэт дзяржаўнага кантролю Гродзенскай вобласці…
Абы з рук
Парушэнні заканадаўства пры размеркаванні жылля, пабудаванага з дзяржаўнай падтрымкай, кантралёры ўстанавілі таксама ў сельгаскааператывах «Жукоўшчына» Дзятлаўскага, «Бародзічы» Зэльвенскага, «Агра-Ліпнішкі» і «Умястоўскі» Іўеўскага, «Забалоцкі-Агра» і «Эліт-Агра Больцінікі» Воранаўскага раёнаў.
У прыватнасці, у КСУП «Эліт-Агра Больцінікі» не палічылі неабходным зарэгістраваць заявы трох работнікаў. Няма звестак аб пастаноўцы на ўлік, выдзяленні жылля, паведамленняў людзям аб рашэннях па іх заявах. Пры гэтым службовае жыллё аднаму з іх выдзеліў асабіста дырэктар прадпрыемства. Прычым дагавор найму жылога памяшкання не падпісаны наймадаўцам і не зарэгістраваны ў Беняконскім сельвыканкаме.
Кіраўнікі шэрагу гаспадарак і адпаведных выканкамаўскіх службаў не надта клапоцяцца і пра якасць будаўнічых работ. Многія дамы здаюцца з недаробкамі, бракам. Жыльцы скардзяцца, а ліквідацыя гэтых «дробязяў» патрабуе, зразумела, дадатковых затрат. Прычым у некаторых гаспадарках гэта ўжо як норма.
Напрыклад, у СВК «Бердаўка-Агра» Лідскага раёна яшчэ ў 2008 годзе падчас прыёмкі ў эксплуатацыю жылых дамоў у членаў камісіі кааператыва з'явіліся прэтэнзіі да падрадчыка — будаўніча-мантажнага трэста № 19. У адным з дамоў быў пашкоджаны і працякаў дах. У іншым — адсутнічалі выцяжкі ў ванным пакоі і кацельні, было разбіта шкло ў аконных праёмах, а маснічыны ў падлозе сырыя.
Ці змянілася стаўленне да якасці будаўніцтва? У той жа гаспадарцы летась былі ўведзены ў эксплуатацыю 5 аднакватэрных дамоў у раёне вёскі Дуброўня. І зноў да падрадчыка (БМУ-2) узніклі пытанні. Сцены ў верандах аказаліся няроўнымі. Замест афарбоўкі, як прадугледжвалася праектам, была толькі грунтоўка.
Не абышлося без дэфектаў, недаробак і ў СВК «Гальшанскі» Ашмянскага раёна пасля прыёмкі ў эксплуатацыю жылога дома, які, дарэчы, знаходзіцца ў рэзерве для маладых спецыялістаў. Не завершаны работы па знешняй і ўнутранай аддзелцы (фарбаванне сцен, падлогі, аклейванне сцен шпалерамі), ва ўсіх пакоях — успучванне падлогі і трэшчыны ў дошках.
Будуецца шмат, але значна больш жылля... пустуе
Старшыня Камітэта дзяржаўнага кантролю Гродзенскай вобласці Васіль
ГЕРАСІМАЎ прывёў парадаксальныя лічбы. Сёлета ў сельскай мясцовасці запланавана ўвесці ў эксплуатацыю 232 дамы (цяпер пабудавана 182). А 665 дамоў пустуюць. Практычна ва ўсіх раёнах ёсць пустуючыя, незаселеныя жылыя памяшканні, у тым ліку пабудаваныя з фінансавай падтрымкай дзяржавы. Частка з іх знаходзіцца ў непрыгодным для пражывання стане, аднак яны ўключаны ў жыллёвы фонд, што скажае карціну забяспечанасці жыллём сельскага насельніцтва. Пры гэтым у выканкамах дрэнна наладжаны ўлік пустуючага жылля, што не дазваляе аператыўна прымаць меры па яго засяленні.
Напрыклад, у вёсцы Чухны Смаргонскага раёна з 2004 года ніхто не пражывае ў трох дамах агульнай плошчай каля 85 кв.м кожны. Адпаведна, не ўносіцца кватэрная плата. На момант нядаўняй праверкі нявыплачаны крэдыт па гэтых дамах складаў 106,4 мільёна рублёў. Штомесячна дзяржаўнае прадпрыемства «Крэва» разлічваецца па асноўным доўгу і працэнтах за карыстанне крэдытам. Аналагічная сітуацыя ў філіяле «Азот Агра» Іўеўскага раёна, дзе два жылыя дамы пустуюць ад уводу ў эксплуатацыю — з 2003 і 2007 гадоў.
Усе гэтыя дамы будаваліся з прыцягненнем ільготных банкаўскіх крэдытаў, за што працягваюць разлічвацца мясцовыя прадпрыемствы. Агульная сума крэдытных рэсурсаў, якія неэфектыўна выкарыстаны сельскагаспадарчымі арганізацыямі, толькі па выяўленых Камітэтам дзяржкантролю фактах склала 1680,1 мільёна рублёў.
Акрамя таго, існуюць выпадкі адсутнасці неабходнай дакументацыі на пабудаванае жыллё. Здараецца і так, што неабгрунтавана зацягваюцца тэрміны вырабу дакументаў, што вядзе да шматлікіх памылак пры вызначэнні кошту жылля. Шмат скаргаў паступае і ад людзей, якія хочуць яго прыватызаваць. У сувязі з гэтым Камітэт дзяржаўнага кантролю Гродзенскай вобласці лічыць неабходным распрацаваць тыпавыя палажэнні аб прыватызацыі жылля. Каб кожны чалавек дакладна ведаў, як і на якіх умовах яго аформіць ва ўласнасць.
Барыс ПРАКОПЧЫК.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.