Расстрэл ісламістамі журналістаў французскага сатырычнага часопіса Charlіe Hеbdo шакаваў Еўропу і выклікаў стыхійную хвалю салідарнасці ва ўсім свеце. На жаль, лозунгі «Захаваем свабоду слова!» ці «Узмоцнім барацьбу з сусветным тэрарызмам!» — гэта толькі абстрактныя пажаданні. Пытанне «Што рабіць?» па-ранейшаму застаецца без уцямнага адказу. Адбываюцца жалобныя мітынгі, прамаўляюцца дзяжурныя фразы, і грамадства зноў засынае да чарговага тэракта. Каб зразумець прычыны гэтай сітуацыі, варта зірнуць на праблему еўрапейскага тэрарызму ў больш шырокім кантэксце.
Для Францыі яна не новая. Раней галоўную пагрозу грамадству неслі радыкальныя нацыяналістычныя рухі. Сярод іх сумную вядомасць атрымалі ўласна французскі, карсіканскі, баскскі, алжырскі, палесцінскі і нават армянскі. Апошнія дзесяцігоддзі мода на нацыяналізм зменшылася, затое ў Францыі пачалі з'яўляцца даволі экзатычныя тэрарысты, накшталт анарха-камуністаў, лакальных вінаробаў ці абаронцаў правоў жывёл. Але зараз усіх іх пераўзыходзіць ісламісцкі тэрарызм: у 1990-я адбылася серыя выбухаў у Парыжы, у 2012-м — страляніна ў Тулузе, цяпер — дзёрзкі расстрэл рэдакцыі Charlіe Hebdo.
І падобныя працэсы — ва ўсім свеце. З аднаго боку, гэта відавочныя наступствы эмансіпацыі ісламісцкіх радыкалаў, перш за ўсё — у арабскіх краінах, якія да сярэдзіны XX стагоддзя з'яўляліся еўрапейскімі калоніямі. Мясцовыя ўлады, што арыентаваліся на еўрапейскую цывілізацыю і абапіраліся на сілавыя структуры, у апошнія два дзесяцігоддзі не дэманструюць вялікай устойлівасці. Пад ударамі джыхадзістаў хістаюцца Алжыр, Егіпет, Ірак, Ліван, Лівія, Емен, Самалі, Сірыя і г.д.
З выбухам ісламісцкага радыкалізму ўсё зразумела: велізарныя масы слабаадукаванага і беднага насельніцтва арабскіх краін хочуць простых адказаў на складаныя пытанні. І радыкалы гэтыя прывабныя адказы прапануюць. Таму з такой лёгкасцю экстрэмісты маніпулююць народнымі масамі. Але яшчэ больш цікавымі выглядаюць безадказныя паводзіны Захаду ў гэтай сітуацыі: еўраатлантычныя эліты ў сваю чаргу спрабуюць маніпуляваць лідарамі джыхадзістаў. Атрымліваецца гэта штораз горш, джын экстрэмізму ўсё часцей выходзіць з-пад кантролю і атакуе былых гаспадароў.
Гэтым і тлумачацца дзеянні еўрапейскіх палітыкаў, якія, на першы погляд, здаюцца абсалютна непаслядоўнымі. Самы яскравы прыклад апошніх часоў — Сірыя. Спачатку заходнім элітам не падабаўся ваенны рэжым Башара Асада, які нібыта парушаў правы чалавека, і яны паспрабавалі яго знішчыць пад выглядам «арабскай вясны» рукамі шырокай кааліцыі палітычнай і рэлігійнай апазіцыі. Ісламісты пры гэтым атрымлівалі шчодрую дапамогу Захаду, а Францыя ледзьве не скіравала авіяносец «Шарль дэ Голь» супраць «злачыннага сірыйскага дыктатара» ў жніўні 2013 года. Але неўзабаве сітуацыя выйшла з-пад кантролю: ісламісты з дапамогай масавага тэрору спачатку адціснулі ў цень сваіх праеўрапейскіх саюзнікаў, стварылі «Ісламскую дзяржаву Ірака і Леванта» (ІДЗІЛ), а потым абвясцілі новы халіфат. У выніку некалькі краін Блізкага Усходу знаходзяцца на мяжы маштабнай вайны, Еўропа захлынаецца ад нелегальнай міграцыі і чакае новую хвалю тэрарызму. І вось парадокс: Францыя і ЗША вымушаны зараз дапамагаць «сірыйскаму дыктатару» стрымліваць баевікоў-ісламістаў, тых самых, што ажыццявілі напад у Парыжы.
Зараз можна пачуць, што карыкатурысты Charlіe Hebdo самі вінаваты ва ўласнай гібелі, бо справакавалі экстрэмістаў сваімі малюнкамі. Можна хіба пагадзіцца, што журналісты недастаткова дбалі пра ўласнаю бяспеку, але асноўная віна ў іх гібелі — усё ж на еўрапейскіх элітах, якія ўласнаручна выгадавалі звера ісламісцкага экстрымізму, не стварыўшы адэкватнай сістэмы еўрапейскай антытэрарыстычнай бяспекі, а зараз льюць кракадзілавы слёзы па «непаліткарэктных карыкатурыстах».
Але гэтым праблема не вычэрпваецца. Галоўны вынік — яшчэ наперадзе. І гэта не толькі масавая міграцыя ў Еўропу жыхароў трэцяга свету, якія не падзяляюць еўрапейскія каштоўнасці і жывуць закрытымі суполкамі. Праблема — унутры самога еўрапейскага грамадства, што за апошнія 200 гадоў драматычна секулярызавалася і згубіла ўласную культурную ідэнтычнасць, ператварыўшыся ў арыфметычную суму касмапалітычных спажыўцоў, прасякнутых ідэалогіяй мультыкультуралізму і талерантнасці. Мігранты са сваёй моцнай рэлігійнай і нацыянальнай ідэнтычнасцю грэбліва і з нянавісцю ставяцца да карэнных еўрапейцаў — як да «іванаў-бязродзічаў». У той жа час з сацыяльна-эканамічнага пункту гледжання еўрапейцы нагадваюць новых рабаўладальнікаў і ставяцца да мігрантаў, як да людзей другога гатунку, пазбаўляючы іх доступу да сацыяльных ліфтаў. Такім чынам, да нацыянальнай і рэлігійнай напружанасці далучаецца самы небяспечны складнік — сацыяльны.
Гісторыя вучыць, што гэта можа скончыцца вельмі кепска. Адзін з вядомых прыкладаў — Ліван, які ў 60-я і 70-я гады XX стагоддзя быў квітнеючай краінай еўрапейскай арыентацыі з пераважна хрысціянскім насельніцтвам. Раптоўнае з'яўленне вялікай колькасці палесцінскіх бежанцаў справакавала працяглую грамадзянскую вайну — і з тых часоў Ліван ляжыць у руінах.
Ці знойдуць Францыя і ўся Еўропа сілы мабілізавацца і прадухіліць грамадзянскую вайну на сваёй зямлі альбо працягнуць безадказныя інтрыгі на Блізкім Усходзе і мультыкультуральныя эксперыменты над уласным насельніцтвам — пытанне адкрытае. Але пакуль усё ідзе па найгоршым сцэнарыі. Паўплываць на лёс усёй Еўропы Беларусь не можа, але пэўныя высновы для сябе зрабіць мы абавязаны.
Ва Украіне працягваецца грамадзянская вайна, чаму пагроза тэрарызму і бандытызму абвастраецца і для нас. Трэба навучыцца жорстка спыняць экстрэмізм у любым выглядзе: нацыяналістычным, рэлігійным, сацыяльным, экалагічным і г.д. Таму трэба мець доўгатэрміновую стратэгію кіравання працэсамі міграцыі. Перавагу трэба аддаваць мігрантам, цывілізацыйна блізкім да беларусаў, якія здольныя хутка інтэгравацца ў наша грамадства. Але галоўнае — нам, беларусам, трэба згуртавацца дзеля захавання міру і спакою, што з'яўляюцца галоўнай каштоўнасцю нашай краіны.
Аляксандр Сінкевіч
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.