Прэзідэнт Аляксандр Лукашэнка патрабуе забяспечыць бяспеку на ЧС па хакеі, не дастаўляючы нязручнасцяў гасцям.
Аб гэтым кіраўнік дзяржавы заявіў на пасяджэнні Савета бяспекі. У першую чаргу Аляксандр Лукашэнка акцэнтаваў увагу на пытаннях правядзення чэмпіянату свету па хакеі і забеспячэнні бяспекі падчас яго правядзення, паведамляе БЕЛТА. «Наша першачарговая задача як арганізатараў заключаецца ў тым, каб забяспечыць бяспеку ўдзельнікаў і гасцей. Галоўнае — не дапусціць ніякіх правакацый. Пры гэтым мы павінны паспрабаваць зрабіць так, каб гэтыя меры бяспекі былі ненавязлівыя, не кідаліся ў вочы, не ціснулі на ўдзельнікаў і гасцей спаборніцтваў, на журналістаў», — сказаў Прэзідэнт.
Аляксандр Лукашэнка асабліва падкрэсліў значнасць для Беларусі гэтага спартыўнага форуму. «Гэта грандыёзная па маштабах і важнасці падзея. Сапраўды спартыўнае свята як для беларускага народа, так і для мільёнаў аматараў хакея ўсёй сусветнай супольнасці», — сказаў кіраўнік дзяржавы. «Я ўпэўнены, што мы зможам прадэманстраваць высокую ступень арганізацыі сусветнага хакейнага форуму, а таксама даказаць усім, што мы сапраўды цывілізаваная дзяржава ў цэнтры Еўропы, каб кожны, хто прыедзе да нас, ад'язджаючы, захаваў у памяці ветлівасць і добразычлівасць беларускага народа», — адзначыў Прэзідэнт.
Дарэчы, як паведаміў на пасяджэнні прэм'ер-міністр Беларусі Міхаіл Мясніковіч, удзел у чэмпіянаце свету па хакеі ў Мінску пацвердзілі ўсе 16 краін. «Алімпійскі, сапраўды спартыўны, прынцып перамог кан'юнктурныя і неканструктыўныя заклікі», — заўважыў Міхаіл Мясніковіч.
Аляксандр Лукашэнка адзначыў, што турніры такога маштабу заўсёды маюць палітычны падтэкст. «Нельга забываць, што вакол гэтага чэмпіянату нямала спекуляцый. Пачынаючы ад заклікаў нашых апазіцыянераў, так званай «пятай калоны», байкатаваць спаборніцтвы і да спроб шантажу з боку замежных нядобразычліўцаў», — нагадаў Прэзідэнт. Пры гэтым кіраўнік дзяржавы адзначыў: «На шчасце, у заходніх экспертных палітычных колах, няхай і запознена, але нарастае разуменне вычарпанасці цяперашняга інструментару ціску на Беларусь. Гучаць заклікі да выпрацоўкі новых поглядаў і падыходаў».
Паводле слоў Прэзідэнта, асабліва каштоўнай для Беларусі з'яўляецца падтрымка міжнародных спартыўных арганізацый. Аляксандр Лукашэнка звярнуў увагу на тое, што, нягледзячы на жорсткі прэсінг з боку асобных еўрапейскіх арганізацый і палітыкаў, Міжнародная федэрацыя хакея і асабіста Рэнэ Фазель не завагаліся пад націскам, былі бескампрамісныя і верныя спартыўным ідэалам.
Беларусь фактычна гатовая да правядзення чэмпіянату, прагучала на пасяджэнні. «Спартыўныя аб'екты «Мінск-Арэна» і «Чыжоўка-Арэна», паводле ацэнак экспертаў, з'яўляюцца аднымі з найлепшых у Еўропе. Яны гатовы да правядзення матчаў», — заявіў Міхаіл Мясніковіч. У першым матчы, які пройдзе 9 мая на «Мінск-Арэне», будуць змагацца зборныя каманды Беларусі і ЗША. Білеты на гэтую гульню прададзены цалкам. Паводле слоў прэм'ер-міністра, білетнай праграме была нададзена асаблівая ўвага. Коштавая палітыка сфарміравана такім чынам, што матчы змогуць наведаць людзі з розным узроўнем даходаў. Так, на матчы папярэдняга этапу цэны складаюць ад 6 да 50 еўра, на матч фінальнай стадыі — ад 25 да 400 еўра.
Па стане на 7 красавіка прададзены і забраніраваны 354 тысячы білетаў на «Мінск- Арэну» (75% ад агульнай колькасці) і 142 тысячы білетаў на «Чыжоўка-Арэну» (67%). Замежным гасцям рэалізавана 70,5 тысячы білетаў. Асноўная доля продажаў для замежных гасцей прыпадае на Расію і Латвію. Таксама досыць вялікую цікавасць праявілі балельшчыкі з Фінляндыі, Швейцарыі, Германіі, Славакіі.
Вырашаны таксама ўсе пытанні бязвізавага ўезду гасцей і ўдзельнікаў чэмпіянату. Памежныя пераходы ўкамплектаваны супрацоўнікамі, якія валодаюць замежнымі мовамі. Прыняты рашэнні для таго, каб Мінск быў максімальна прывабны для турыстаў. У прыватнасці, зафіксаваны цэны на гасцінічнае абслугоўванне, а нумарны фонд гасцініц павялічаны больш чым у 2 разы. Усяго ў час чэмпіянату будуць функцыянаваць 43 гасцініцы на 9 тысяч 725 месцаў. Для размяшчэння гасцей чэмпіянату таксама будуць задзейнічаны 5 інтэрнатаў у студэнцкай вёсцы больш чым на 5 тысяч месцаў. Вырашаны ўсе пытанні, звязаныя з адсяленнем на гэты перыяд студэнтаў без спынення навучальнага працэсу.
У перыяд правядзення чэмпіянату ў сталіцы будзе разгорнута шырокая сетка грамадскага харчавання. Дадаткова адкрыюцца сезонныя кавярні больш чым на 20 тысяч пасадачных месцаў у дадатак да 75 тысяч, якія ўжо існуюць. Распрацаваны спецыяльныя меню ў даступным коштавым дыяпазоне.
Сярод пераваг нашага чэмпіянату Міхаіл Мясніковіч назваў развітую транспартную сістэму. Арэны на перыяд чэмпіянату будуць звязаны прамым транспартным злучэннем паміж сабой і асноўнымі месцамі пражывання балельшчыкаў. Гатовы да прыёму ўдзельнікаў і гасцей і Нацыянальны аэрапорт, значна павялічана яго прапускная здольнасць.
Міхаіл Мясніковіч расказаў, што ўжо распрацаваны сцэнарныя планы афіцыйных мерапрыемстваў, у тым ліку адкрыцця і закрыцця чэмпіянату. Замежным кіраўнікам і кіраўнікам урадаў дзяржаў — удзельніц спартыўнага форуму, краін СНД і стратэгічных партнёраў Беларусі за мяжой накіраваны запрашэнні наведаць чэмпіянат.
Паводле слоў Міхаіла Мясніковіча, самая пільная ўвага надаецца пытанням бяспекі. Прэм'ер-міністр выказаў упэўненасць у тым, што пастаўленая задача па арганізацыі і правядзенні чэмпіянату свету па хакеі на высокім узроўні будзе паспяхова выканана. Гэта пацвярджаецца і вынікамі апошняй інспекцыйнай праверкі Міжнароднай федэрацыі хакея, якая праводзілася з 1 па 4 красавіка.
Другім пытаннем, якое разглядалася на пасяджэнні Савета Бяспекі, стала палітычная сітуацыя ва Украіне і яе ўплыў на стан нацыянальнай бяспекі Беларусі. Было адзначана, што падзеі, якія адбываюцца ва Украіне, не нясуць прамых пагроз для Рэспублікі Беларусь. Наша краіна зацікаўлена ва ўсталяванні на ўкраінскай тэрыторыі грамадзянскага міру, спакою і стабільнасці. Асабліва падкрэслівалася, што Беларусь не прэтэндуе на вядучую ролю ва ўрэгуляванні ўкраінскага канфлікту, аднак прыкладзе максімальныя намаганні для захавання і развіцця адносін з брацкай краінай-суседкай. Па-ранейшаму сярод прыярытэтаў для нашай дзяржавы застаецца захаванне і далейшае развіццё палітычных, гандлёва-эканамічных і культурных сувязяў з Украінай.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».