Гісторыя… Колькі загадкавага тоіцца ў гэтым слове. Колькі яшчэ не расказана, не высветлена. О, каб камяні маглі гаварыць!.. Часам гісторыя ляжыць на паверхні, а мы яе не заўважаем.
Бясспрэчна, не кожны цікавіцца гісторыяй свайго краю, маўляў, хапае сямейных турбот. Бывала, задаешся пытаннем: што мы распавядзём сваім нашчадкам, калі яны зацікавяцца мінуўшчынай? Каб мець адказ, трэба спяшацца распытаць у старажылаў свайго краю, сваіх мясцін, у якіх мы жывём, пра тыя таямніцы, якія часам з'яўляюцца найкаштоўнейшым скарбам у лёсе беларусаў. Менавіта старыя з'яўляюцца носьбітамі краязнаўчай інфармацыі.
Мая вёска Крупава ўмоўна падзелена на старую, цэнтральную і новую часткі. Як узгадваюць старажылы-крупаўчане, калісьці ўсе жылі на невялікім участку, зусім мала было двароў, але з цягам часу вёска пачала пашырацца, маладзейшыя пачалі будавацца — аддзяляцца ад сваіх бацькоў, а ўжо ў наш час, дзякуючы новабудоўлям, вёсцы быў нададзены статус аграгарадка.
Карэнных жыхароў, на жаль, з кожным годам становіцца менш і менш. Некаторыя пераязджаюць у горад да дзяцей і толькі час ад часу наведваюць сваё спрадвечнае месца жыхарства. Вітольд Карлавіч і Тарэза Браніславаўна Паўлюкевічы ўжо шэсць гадоў жывуць у Лідзе. Сын Вітольд і дачка Ірына таксама жывуць у горадзе. А бацькоўскую хату ў Крупаве даглядае сын Валерый, у якой і сам жыве. Калі-нікалі Вітольд Карлавіч наведваецца сюды — цягнуць яго родныя мясціны. Мілы той куток, дзе перарэзалі пупок! Упусціць шанц пагутарыць са старажылам я не мог.
—У сям'і майго дзеда Андрэя (па бацькавай лініі) было 6 дзяцей — 5 сыноў і адна дачка: Казік, Владак, Кароль, Міхась, Пятрук і Стася. Дачка памерла рана, ад туберкулёзу, нават і замуж не паспела выйсці, — прызнаецца мне Вітольд Карлавіч. — А вось дзядзькі Казік і Міхась былі адукаванымі. Казік нават вучыўся ў духоўнай семінарыі, хацеў стаць ксяндзом. Але ж так склаўся лёс, што калі заканчваў вучобу, яго ўгледзела адна дзяўчына. Закахаліся і згулялі вяселле. Прыйшлося хлопцу кідаць «ксяндзоўства», бо святарам-каталікам забаронена мець сям'ю… А вось другі сын, Міхась, малодшы за майго бацьку, працаваў у горадзе памочнікам у дзеда на дэпо. Дзяжурыў дзядзька на гэтай працы рознай парой, праўда, не ведаю якую меў пасаду, але не раз бачыў яго з карабінам, у форме… Помню, як прыйшоў ваенны час, так званыя «лапанкі», калі хапалі людзей на фронт. І ў рукі «хапуноў» трапіў сын Владака — Вацлаў. Агледзеўся дзядзька, што забіраюць братавага сына на фронт, з якога можа і не вярнуцца жывым. Тады неяк хітра ўзброены з карабінам дзядзька Міхась адвёў яго ў раён Астроўлі, быццам узяўшы пад арышт, і адпусціў: так дапамог яму выжыць. Нядаўна толькі памёр. А цяпер, што вельмі прыемна, унук Вацлава, Павел, закончыў Гродзенскую духоўную семінарыю і шчыруе ксяндзом у Ашмянскім касцёле. Ажыццявіў мару дваюраднага дзеда Казіка.
Праз некалькі хвілін спадар Вітольд Паўлюкевіч прамовіў:
—А якія святары былі! Не адмаўлялі ў просьбе людзям.
І ў памяці Вітольда Карлавіча ўсплыло, як яго, маладога на той час, папрасілі стаць кумам — хрышчоным бацькам. Быў перадсвяточны настрой перад Вялікаднем. Маладога хрышчонага папрасілі прывезці з горада, з фарнага касцёла, ксяндза Роека для правядзення хрышчэння ў крупаўскім касцёле. Прывезлі яго на хуткіх конях, якія добра слухаліся возніка: хапала крышку тузануць за лейцы, і яны чулі каманду. Святару Роеку здалося, што коні занадта дзёрзкія, аж забілі капытамі па мёрзлай зямлі, так рваліся ў дарогу. Ксёндз толькі папрасіў: «З месца шпарка не пускай». Але дарога, якая пралягала з Ліды да Крупава, не стаміла ксяндза, паездка спадабалася, пасля яе прамовіў: «Добра кіруеш. Нават лейцамі не заўважыў, як вырушыў».
—Нядрэнны быў ксёндз, хоць па нацыянальнасці быў немцам. Той час быў напружаны: святароў саджалі ў турмы, а вось ён змог прытрымацца на волі. Ён і пахаваны ля фарнага касцёла.
—Найважнейшай каштоўнасцю вёскі Крупава з'яўляецца наш касцёл, пабудаваны ў 1924 годзе. Можа, узгадаеце што-небудзь з гісторыі мясцовай святыні?
—Ужо сем гадоў да майго нараджэння ў касцёле праходзілі набажэнствы. Вядома, прымаць удзел у яго пабудове не прыйшлося. А мая маці, Адэля Адамаўна, калісьці ўзгадвала, што ўдзельнічала на будаўніцтве. Ёй, беднай, давялося працаваць за хворага мужа, за свайго брата. Былі адзначаны спецыяльныя дні для абавязковага ўдзелу на пабудове храма. Гэтыя дні нагадвалі шараварку — бясплатную абавязковую 6‑дзённую працу на дарогах. Маці, дзякуй Богу, на свае гады была моцнай, вышыні не баялася, казала, што па драбінах хадзіла спакойна, адважна і насіла цэглу. Так што тут закладзена і часцінка працы маёй маці.
—А што ведаеце пра ксяндза Гудэйку? — узнікла ў мяне пытанне.
—Нашаму ксяндзу прыйшлося незаслужана адбываць зняволенне ў лагерах Сібіры. Дарэчы, ён таксама пахаваны на крупаўскіх могілках. Толькі нядаўна стала вядома, што сядзеў у турме ён «дзякуючы» арганісту. Да яго звярнуліся партызаны з мэтай паспавядацца, каб памерці з чыстай душой, бо адчувалі, што могуць не вярнуцца з задання. Гудэйка ім не адмовіў: гэта яго абавязак спавядаць. А арганіст гэта «пранюхаў» і далажыў «на верх». Хутка наехалі вялікія начальнікі, на рукі святару наклалі кайданкі, зрабілі яго бандытам. Людзі сабраліся, плакалі, не адпускалі ксяндза… За сем гадоў зняволення яго дапытвалі, хацелі дазнацца, што казалі партызаны яму падчас споведзі, але ён так і не прызнаўся: грэх раскрываць тайну споведзі. Як толькі Гудэйка вярнуўся са зняволення, арганіст адразу, як маланкай, выехаў у Літву… Вельмі хворым і змучаным вярнуўся ксёндз, але яшчэ некалькі гадоў у школе чытаў мудрыя лекцыі з хрысціянскага жыцця.
—Ці памятаеце ваенныя часы? Ці праходзілі немцы праз Крупава?
—Безумоўна! Тут, каля лазні і касцёла, была франтавая дарога, якая называлася Мытнянскім гасцінцам, па ёй суткамі праходзіў абоз. Помню, як праз яго зайшлі немцы і размясціліся ў Абрубах. Цэлы палігон быў: зброя і розная ваенная тэхніка. Дзесьці двое сутак немцы пражывалі там, нават і быка зарэзалі на тым месцы. Бяды не нарабілі, людзей не рушылі ды і наогул пасля сябе пакінулі толькі парадак. Калі што і трэба было ім, то без дазволу гаспадара не чапалі і не бралі. Калі паехалі, доўгі час заставаўся на гэтым месцы пах ад адэкалонаў: глядзелі сябе, адным словам, культурныя былі… Пасля праз некаторы час і «саветы» размясціліся на гэтым жа месцы, але, што цікава, пасля іх засталося толькі смецце… Той час быў гаротны. У Абрубы з'язджалася гарадское насельніцтва, з Ліды. У адной нашай хаце, у сям'і майго бацькі Караля было 6 сем'яў: сваякоў і чужых. Дзяліліся ўсім, што было. Вядома ж, у бядзе не пакінеш. Цяперашняе жыццё лепшае. Але не кожнаму дагодзіш — так было і будзе. Усё ж, хто працуе, той мае хлеб і да хлеба. Жыць можна, хапае цяпер усяго. Трэба імкнуцца. Праца славіць чалавека.
Развітаўшыся хутка з суразмоўцам, я злавіў сябе на думцы: як бы не біла нас жыццё, але заставацца чалавекам трэба. Для мяне, прадстаўніка з маладога пакалення, такім прыкладам з'яўляецца сям'я Паўлюкевічаў.
Алесь ХІТРУН.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?