...Доўгія сінія валасы, абхопленыя павязкай на лбе, свабоднае адзенне, рукі ў бранзалетах, праколатае брыво, на плячы — тканы заплечнік. Гэтая дзяўчына рэзка вылучалася з усіх на аўтобусным прыпынку. «Вось прыбралася!» — з непаразуменнем глядзяць у яе бок бабулькі. Дзяўчына гэта, вядома, чула, але не звярнула ўвагі. Усміхнулася, паправіла заплечнік і адышла ў бок. Бабулі працягвалі перашэптвацца. А мне стала няёмка і крыўдна за гэтую дзяўчыну. Яна нічога не зрабіла ім дрэннага, проста апранулася не так, як усе. «Іншая» — чую я абрывак размовы ўсё тых жа бабулек. Мне не падабаецца гэтае слова. Усе людзі — розныя, усе па-свойму «іншыя». Дык чаму ж яны, дарослыя жанчыны, якія ўжо шмат пражылі, і, здавалася б, павінны быць мудрымі, гатовыя павесіць ярлык на чалавека толькі з-за незвычайнага колеру валасоў і свабоднага адзення? Агідна ўсё гэта. І сумна.
Я падышла да дзяўчыны і павіталася. Спачатку яна неяк сціснулася, напэўна, спалохаўшыся, што я скажу нешта непрыемнае, а потым выпрасталася і ўсміхнулася. «Прывітанне». Яе звалі Ганнай. Такое вось простае імя. Увесь час, пакуль мы абедзве стаялі на прыпынку і чакалі кожная свой аўтобус, яна раз-пораз усміхалася (рэдкасць у наш час). Цяпер ужо бабулі бурчалі ў бок нас абедзвюх. «Не звяртай увагі, ім проста сумна», — сказала Ганна. Можа, і так...
Пляткарыць, меркаваць па знешнасці, навешваць ярлыкі, шаптацца за спінай... Чаму так робяць? Няўпэўненасць у сабе ці, наадварот, завышаная самаацэнка, зайздрасць, абмежаванасць, неадукаванасць, нуда, пустаслоўе, вульгарнасць? Убачылі ў гэтым спісе хоць адну станоўчую якасць?
На вуліцы могуць змерыць такім поглядам, што любы самы добры дзень будзе сапсаваны, любы самы таленавіты чалавек засумняваецца ў сабе, самы ўсмешлівы — нахмурыцца. Можа, таму людзі і аддаюць перавагу камп'ютарам: сядзіш у крэсле перад маніторам, рэальны свет недзе там, за акном, ніхто цябе не асудзіць, не ўбачыць, не пакрытыкуе, а значыць, не зробіць балюча. Можа, з-за страху асуджэння мы і бяжым у віртуальнасць? З-за гэтага людзі баяцца гучна смяяцца, усміхацца без прычыны, ярка апранацца, чытаць кнігі на лавачцы ў парку. «Што пра мяне могуць падумаць?» — гэтая думка забівае нясмелыя парывы душы, маладосці. Не так адзеўся, не так нафарбаваўся, не так размаўляеш і не тую музыку слухаеш... Грамадская думка цяжкай ношай кладзецца на плечы, скоўвае рукі, закрывае святло і ўтрымлівае ў праслойцы «нармальных», як усе.
Напэўна, усе чулі, што знешнасць падманлівая, але часта мы грэбуем гэтай простай ісцінай. Вядома, прасцей думаць, што выдатна разбіраешся ў людзях, па сутнасці карыстаючыся толькі стэрэатыпам: калі «гот» — дык абавязкова агрэсіўны, бландзінка — дурная, у акулярах — «зубрыла», з сінімі валасамі — «іншая». Вось толькі ці не зробім мы занадта балюча іншаму чалавеку сваімі неасцярожнымі высновамі, ці не паранім, не «зламаем»? Або гэта ўжо не так і важна?
Арына КАГАЛЁНАК,
вучаніца 10 класа наваполацкай гімназіі №2.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».