Апошнія еўракубкавыя матчы на «Барысаў-Арэне» праходзілі пад непрыемным дажджом. На матч «Шахцёр» — ПСВ надвор'е злітавалася: за некалькі гадзін да пачатку сустрэчы на суровым, шэрым небе з'явілася вясёлка. Футбольныя балельшчыкі з усмешкай глядзелі ўвысь і казалі: «Гэта добры знак!».
На жаль, цуду не здарылася. Гарнякі прадэманстравалі салідную гульню, але ўсё ж такі саступілі вядомаму саперніку (0:2). На старце паядынку салігарчане дзейнічалі крыху нясмела, але вельмі хутка адчулі свабоду і пачалі прабіваць па варотах эйндховенцаў. Аднак ні адна атака для падапечных Сяргея Бароўскага не завяршылася выратавальным голам. Тым больш крыўдна, улічваючы тое, што галандцы відавочна гулялі з запасам, зберагаючы сілы на матчы ўнутранага чэмпіянату. Такую саманадзейнасць трэба было караць. Але гарнякам не хапіла хлёсткага завяршальнага ўдару і крыху шанцавання.
А вось хлопцам Філіпа Каку шанцаванне было не патрэбна. Навошта, калі ў камандзе ёсць такі таленавіты гулец, як Мемфіс Дэпай, які нават з паўмоманту можа зрабіць гол. Так здарылася і ў гэты вечар. Дэпай двойчы бліснуў індывідуальным майстэрствам і вывеў ПСВ у групавы турнір Лігі Еўропы.
Пасля матча галоўны трэнер «Шахцёра» Сяргей Бароўскі не стаў цямніць і шчыра сказаў, чаго не хапіла яго камандзе: «Не атрымалася гульня ў першым тайме. Футбалісты былі нейкія скаваныя. Другі тайм правялі зусім па-іншаму. За жаданне — 10 балаў, а вось за тактычную граматнасць не ведаю, што паставіць. Колькі ні размаўлялі пра контратакі ПСВ, усё адно дазволілі саперніку гэтым скарыстацца. Пакуль нам не хапае ўзроўню, каб граматна праводзіць канцоўкі матчаў».
Тым не менш, «Шахцёр» правёў самую паспешную еўракубкавую кампанію, атрымаўшы некалькі прыгожых перамог на групавой стадыі кваліфікацыйнага турніру. І толькі ўжо за тое, што нашы хлопцы на роўных змагаліся з грозным ПСВ, ім трэба сказаць «дзякуй». Такое надоўга застаецца ў памяці...
Ілья ГАЛЮЗА (паўабаронца «Шахцёра»):
— Вынік першай сустрэчы даў нам магчымасць спадзявацца на добры зыход — выхад у групу. Аднак ПСВ ёсць ПСВ. Гэта каманда добрага еўрапейскага ўзроўню, гранд галандскага футбола. Напэўна, напрыканцы мы крыху стаміліся, трохі тактычна няправільна згулялі. Эмоцыі атрымалі перавагу над розумам, пабеглі забіваць... Не склалася. Хачу падзякаваць усім балельшчыкам. На працягу ўсіх еўракубкавых матчаў яны нас актыўна падтрымлівалі.
Дарына ЗАПОЛЬСКАЯ,
Тарас Шчыры.
Сумесныя праекты ядзерных тэхналогій.