Амаль два гады прайшло з таго часу, як Выдавецкі дом «Звязда» аб'яднаў пад сваім дахам найстарэйшую ў краіне беларускамоўную газету «Звязда» і літаратурна-мастацкую перыёдыку Беларусі: штотыднёвую газету «Літаратура і мастацтва», часопісы «Полымя», «Нёман», «Маладосць» і «Вожык». Падчас святкавання Дня беларускага пісьменства, да якога гэтыя выданні маюць непасрэднае дачыненне, мы асобна раскажам пра кожнае з іх на старонках «Звязды».
З «Полымем» у сэрцы
«Полымя» — гэта новыя творы лепшых айчынных пісьменнікаў і невядомая літаратурная спадчына. Гэта архіўныя гістарычныя дакументы і дзённікі славутых суайчыннікаў. Гэта інтэрв'ю з цікавымі людзьмі і дыскусіі на самыя актульныя тэмы культурнага жыцця краіны.
Чытайце на старонках часопіса аповесці «Прыгоды сарамлівага карэспандэнта» Віктара Гардзея, «Паўночны вецер для спелых пладоў» Юрыя Станкевіча, «Атамізацыя» Васіля Гігевіча, «Закон захавання кахання» Зінаіды Дудзюк, а таксама пасляваеннныя ўспаміны Міколы Лобана. У бліжэйшых нумарах «Полымя» — лісты Уладзіміра Дубоўкі да Уладзіміра Конана, артыкулы і эсэ Івана Саверчанкі, Адама Мальдзіса, Лады Алейнік, Алеся Марціновіча і Казіміра Камейшы. У вялікай падборцы матэрыялаў пад агульнай назвай «Літаратурныя часопісы: у пошуках страчанага» — развагі вядомых беларускіх і замежных пісьменнікаў пра тое, якое месца займаюць сёння літаратурныя часопісы ў грамадскім і культурным жыцці, і што можна і трэба зрабіць, каб прыцягнуць да іх большую чытацкую цікавасць.
Часопіс для тых, хто ўмее чытаць
«Нёман» — часопіс-адлюстраванне сучаснага культурнага жыцця Беларусі, блізкага і далёкага замежжа. Гэта творы лепшых сучасных пісьменнікаў Беларусі і Расіі, якія пішуць на рускай мове, пераклады беларускай і замежнай прозы, паэзіі, публіцыстыкі, крытыкі, артыкулы і інтэрв'ю, прысвечаныя праблемам будаўніцтва Саюзнай дзяржавы, матэрыялы, якія распавядаюць аб незвычайных жыццёвых сітуацыях і лёсах, артыкулы пра яркія з'явы і дзеячаў тэатра, жывапісу, музыкі і многае іншае
Пляцоўка для дыскусій і творчасці
«Літаратура і мастацтва» («ЛіМ») — сапраўдны інфарматар пра надзённыя пытанні дзяржаўнай палітыкі ў галіне літаратуры, мастацтва і кнігавыдання, пра асноўныя напрамкі дзейнасці Саюза пісьменнікаў Беларусі ў справе духоўнага фарміравання асобы і нацыі, захавання нацыянальнай культурнай спадчыны, пра стасункі з літаратарамі краін СНД, развіццё народнай творчасці і інш. На яе старонках выступаюць пісьменнікі, літаратуразнаўцы, дзеячы мастацтва, кнігавыдаўцы, бібліятэкары, гісторыкі, краязнаўцы, выкладчыкі ВНУ, творчая моладзь.
Штотыднёвік публікуе агляды найбольш цікавых і папулярных выданняў, гутаркі з творцамі, мастакамі-графікамі, рэйтынгі продажу кніг у розных гарадах Беларусі, фотарэпартажы з кнігарняў краіны і замежжа.
Хто з «Вожыкам» сябруе, той ніколі не сумуе!
У разнастайным шэрагу літаратурна-мастацкіх і публіцыстычных выданняў Беларусі асаблівае месца займае адзіны ў рэспубліцы ілюстраваны часопіс сатыры і гумару «Вожык», слаўная гісторыя якога пачалася ў далёкім 1941-м годзе з выхаду газеты-плаката «Раздавім фашысцкую гадзіну». З таго часу і па сёння на старонках часопіса друкуюцца лепшыя творы беларускіх паэтаў, празаікаў, мастакоў-карыкатурыстаў, закліканыя не толькі паляпшаць настрой чытачам, але і адмысловымі сродкамі сатыры і гумару змагацца з негатыўнымі з'явамі ў жыцці грамадства. Традыцыі, закладзеныя за шматгадовую гісторыю рэдактарамі выдання (а сярод іх — вядомыя пісьменнікі Кандрат Крапіва, Уладзімір Корбан, Валянцін Блакіт, Міхась Пазнякоў, Алесь Пісьмянкоў, Уладзімір Саламаха), працягваюцца і сёння. А побач з традыцыямі на старонках часопіса з'яўляюцца арыгінальныя аўтарскія знаходкі — ілюстраваныя казкі і фельетоны, вершаваныя гумарэскі, маляваныя іранескі... І ўсё гэта — на найлепшым літаратурным-мастацкім узроўні, ярка і з густам аформленае, каб кожны раз пры сустрэчы з «Вожыкам» нават самы патрабавальны чытач атрымліваў сапраўднае задавальненне.
З «Маладосцю» па жыцці неяк радасней ісці!
Часопіс, да стварэння якога прыклаў руку легендарны Машэраў. Выданне, якое не адпавядае ніякім стэрэатыпам мыслення. Старонкі, якія літаральна прымушаюць глядзець на літаратуру па-новаму. Проза і паэзія Айчыны — ад пакалення звышновай эры. «Зоркі» маладой літаратуры замежжа — па-свойску, па-беларуску. Тэрыторыя эксперыментаў і почыркаў. Адным словам, ёсць чым зачытацца.
Менавіта дынамічная «Маладосць» тры гады апекавала часопіс для дзяцей «Бярозка». Калі той адчуваў часовыя цяжкасці і спыніў свой выхад, яна друкавала яго як свой дадатак. З 2015 года «Бярозка» зноў пачне выходзіць, і ў новым фармаце!
Адкрый для сябе «Бярозку»!
Гэты часопіс прыдумалі для дзяцей даўно-даўно вельмі клапатлівыя дарослыя. Гэта і літаратурнае выданне для дзяцей, і творы, напісаныя дзецьмі. У розныя гады ён па-рознаму называўся і
па-рознаму выглядаў, а сёння літаральна просіцца да цябе ў рукі такімі важнымі словамі з вокладкі: «Светам кіруе той, хто чытае». Кіраваць светам — значыць, быць чараўніком і ствараць для людзей нешта добрае — што заўгодна! Часопіс «Бярозка» будзе вучыць цябе гэта рабіць. Проста таму, што ён чароўны.
Чытайце і любуйцеся!
З пачатку гэтага года да цеснай сям'і перыядычных выданняў Выдавецкага дома «Звязда» далучыўся часопіс «Родная прырода».
У цэнтры ўвагі выдання — прыродныя аб'екты, якія маюць сусветнае гучанне: нацыянальныя паркі, запаведнікі, малыя і вялікія насельнікі лясоў, лугоў і балот, дзівосны свет раслін.
Аўтары часопіса — спецыялісты розных узроўняў, якія прафесійна валодаюць прыродаахоўнай тэматыкай, і чытачы «Роднай прыроды», якія шмат гадоў сябруюць з выданнем. А яшчэ — вядучыя айчынныя фотамайстры на здымках якіх — наша прырода ва ўсёй непаўторнай красе.
Напэўна, кожны ведае, што лепшы спосаб не прапусціць ніводнага нумара любімага часопіса ці газеты — аформіць падпіску на выданне. Калі гэта зрабіць на Дні беларускага пісьменства 6 ці 7 верасня на стэндзе РУП «Беллпошта», вы атрымаеце падарунак ад Выдавецкага дома «Звязда».
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?