Якія праблемы звычайна турбуюць школьнікаў у 15-гадовым узросце? Вучоба, адносіны з бацькамі і сябрамі, першае каханне... Крысціна Неўдах, быўшы яшчэ дзесяцікласніцай ліцэя, зацікавілася тэмамі радыеэкалогіі і біялогіі. Юны ўзрост не стаў перашкодай для сур'ёзных навуковых даследаванняў: дзяўчына перамагла ў трох міжнародных экалагічных алімпіядах у Азербайджане, Інданезіі і Грузіі.
Бацькі Крысціны працуюць настаўнікамі — менавіта яны і паспрыялі таму, каб дачка зацікавілася навукай, але сферу даследаванняў дзяўчына выбрала сама. У Лунінцы, дзе нарадзілася і вырасла Крысціна, тэма радыеэкалогіі знаходзіцца не на апошнім месцы: горад пацярпеў ад наступстваў аварыі на ЧАЭС. І хоць мінула ўжо 28 гадоў, жыхары Лунінеччыны і сёння адчуваюць на сабе ўздзеянне радыяцыі, вынікам чаго становяцца страшныя анкалагічныя дыягназы.
— Апошнім часам мне вельмі часта даводзілася чуць ад сяброў, знаёмых гісторыі пра людзей, хворых на рак. Захацелася больш даведацца пра анкалогію. Аказалася, што да прычын, якія выклікаюць захворванне, адносяцца лад жыцця і харчаванне, — гаворыць суразмоўца.
З надыходам сезона многія адпраўляюцца па грыбы і ягады, але мала хто задумваецца, што яны могуць змяшчаюць цэзій-137. Канцэнтрацыя гэтага элемента можа перавышаць норму ў 7-10 разоў. У сваіх навуковых даследаваннях Крысціна Неўдах распрацавала спосабы зніжэння радыяцыі ў дарах лесу.
— Насамрэч, усё проста — праблем са здароўем дапаможа пазбегнуць правільная тэрмічная апрацоўка. Пільна стаўцеся да працэсу прыгатавання ежы, — дае параду дзяўчына. — Высветлілася, што самы эфектыўны метад зніжэння ўзроўню забруджвання — гэта трохразовае адварванне. Але ў гэтым выпадку разам з цэзіем з грыбоў выходзяць карысныя рэчывы і мінералы. Таму найбольш аптымальным спосабам апрацоўкі грыбоў з'яўляецца адварванне з дабаўленнем солі і воцату.
Дарэчы, сярод мэт навуковых работ Крысціны была і асветніцкая. Вынікамі даследаванняў ліцэістка дзялілася не толькі на канферэнцыях, але і са старонак СМІ. Так, у дзяўчыны атрымалася прыцягнуць увагу мясцовага насельніцтва да сур'ёзнай праблемы.
— Калі бралася за гэтую тэму, то хацела правесці даследаванне, вынікі якога можна было б прымяніць на практыцы, — прыгадвае дзяўчына. — Неўзабаве маімі ідэямі зацікавілася выкладчыца БДУ Алеся Аляксандраўна Шэвелева. Яна дапамагла мне паглыбіцца ў тэму даследавання, зрабіць працу больш грунтоўнай. Гэта дазволіла выйсці на міжнародны ўзровень.
Нягледзячы на ўсе дасягненні ў вучобе і навуцы, Крысціна застаецца простым і сціплым чалавекам: шмат чытае, займаецца рукадзеллем.
— Перамогі ў канферэнцыях і алімпіядах — гэта проста прыемны бонус для мяне. Я нават да апошняга не ведала, што ва ўніверсітэт мяне бяруць па-за конкурсам, рыхтавалася да ЦТ... — шчыра прызнаецца дзяўчына.
Удзел у міжнародных канферэнцыях і алімпіядах, безумоўна, пашырыў кругагляд Крысціны. Яна пазнаёмілася не толькі з культурай іншых краін, але і з моладдзю, якую хвалююць тыя ж пытанні, што і яе.
— У паездках мяне шмат чаго ўразіла. Аднак я нават уявіць не магла, што тэма, якую я распрацоўвала ў родным Лунінцы, зможа прыцягнуць да сябе столькі ўвагі. Менавіта ўвага іншых людзей да нехарактэрных для іх праблем стала, на мой погляд, галоўнай перамогай.
Спыняцца на дасягнутым Крысціна Неўдах не збіраецца. Сёлета яна стала першакурсніцай БДМУ. Таленавітая дзяўчына плануе працягваць свае навуковыя даследаванні, магчыма, крыху ў іншым напрамку, больш звязаным з яе будучай прафесіяй. Пажадаем ёй плёну і поспехаў!
Ганна Курак.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?