З 16 снежня пачалося пагашэнне дзяржаўных аблігацый, якія намінаваны ў замежнай валюце, для фізічных асоб чацвёртага, пятага і шостага выпускаў на агульную суму 50 млн долараў.
Пагашэнне аблігацый названых выпускаў і выплата працэнтнага даходу па іх ажыццяўляюцца праз філіялы, цэнтры банкаўскіх паслуг і аддзяленні Беларусбанка па ўсёй краіне. Пры пагашэнні аблігацыі ўладальніку выплачваюцца намінальны кошт аблігацыі і не атрыманы ім раней працэнтны даход. Пасля заканчэння шасцімесячнага тэрміну (з 16 снежня сёлета да 15 чэрвеня 2015 года), у адпаведнасці з заканадаўствам Беларусі, усе выплаты па дзяржаўных валютных аблігацыях чацвёртага—шостага выпускаў ажыццяўляюцца на падставе заявы ўладальніка аблігацыі ў адрас Міністэрства фінансаў.
У прэс-службе Мінфіна дадаткова паведамілі, што ў сувязі са зменай стратэгіі па ажыццяўленні дзяржаўных пазык на ўнутраным фінансавым рынку і высокай актыўнасцю беларускіх банкаў па размяшчэнні сярод насельніцтва аблігацый уласнай эмісіі Міністэрства фінансаў у бліжэйшы час не плануе выпускі дзяржаблігацый для фізічных асоб у дакументарнай форме. Налета грамадзянам будуць прапанаваны дзяржаўныя аблігацыі, якія намінаваны ў замежнай валюце, у выглядзе запісаў па рахунках (у бездакументарнай форме). Распаўсюджванне дзяржаўных валютных аблігацый у бездакументарнай форме сярод насельніцтва прадугледжана адпаведнай пастановай Саўміна. Дакладная інфармацыя аб умовах набыцця фізічнымі асобамі дзяржаўных валютных аблігацый у бездакументарнай форме будзе апублікавана дадаткова пры прыняцці Міністэрствам фінансаў рашэння аб размяшчэнні такіх каштоўных папер.
Сяргей КУРКАЧ
Сумесныя праекты ядзерных тэхналогій.