Напярэдадні свята Раства Хрыстовага ў храмавым комплексе ў гонар Усіх Святых, што ў беларускай сталіцы, адкрылася выстава старажытных ікон. Кожны ахвотны можа ўбачыць яе да канца лютага.
Абразы прывезены сюды з фондаў пяці расійскіх музеяў. Як паведаміў прадстаўнік аднаго з арганізатараў выстаўкі — прадпрыемства «Сафійская набярэжная» — Кірыл Звераў, у Мінску выстаўлена каля 40 ікон. Аднак гэта не арыгіналы, а дакладныя копіі. Выкананы яны спосабам, які аб'ядноўвае старажытныя і найноўшыя тэхналогіі. На ліпавую дошку наносіцца ляўкас, а паверх яго — слой фарбы пры дапамозе метаду ўльтрафіялетавага друку. Гэта дазваляе з вялікай дакладнасцю перадаць не толькі малюнак, але і паказаць фактуру асновы. Такія абразы не выгараюць на сонцы, не баяцца вільгаці, іх можна нават мыць.
Протаіерэй Усіхсвяцкага прыходу Фёдар Поўны адзначыў:
— Гэтыя абразы мы маглі б і не ўбачыць, бо не кожнаму давядзецца пабываць у далёкіх расійскіх музеях, тым больш зазірнуць у іх запаснікі. Выстава дае магчымасць дакрануцца да нашых веры, духоўнасці, якія ўвасоблены ў іконах.
Тут таксама можна ўбачыць невялікія хатнія абразы, выкананыя ў той жа тэхніцы, што і прадстаўленыя ў асноўнай экспазіцыі.
Варвара ГОМАН.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
