Вы тут

У чым пайсці на выпускны


Гэтае пытанне хвалюе старшакласнікаў, бадай, не менш, чым школьныя экзамены і цэнтралізаванае тэсціраванне. Як апрануцца, каб выглядаць ярка, стылёва і каб праз пяць гадоў не было сорамна за сваё фота? У падрабязнасцях вячэрняга дрэс-кода разбіраемся з маладымі дызайнерамі брэнда Zіbra Дарынай ВАДАП'ЯНАВАЙ і Аляксандрай ЖУК.


Мод­ны ва­ры­янт — кас­цюм у клет­ку.

Касцюм — па памеры

Пачнем з хлопцаў. Дарына раіць ім паглядзець, як апранаюцца «зоркі» на выхад, і ўзяць штосьці з гэтага сабе на заметку. Строгі дзелавы касцюм пакіньце для экзаменацыйнай камісіі, а для выпускнога лепш выбраць цікавыя колеравыя спалучэнні. Напрыклад, сіні пінжак з пясочнымі штанамі, касцюм у клетку. Калі каляровы камплект не надта падабаецца, то варыянт «тотал блэк» (цалкам чорны) таксама падыдзе.

Джынсы на такім мерапрыемстве будуць глядзецца недарэчна, гэта ўсё ж такі паўсядзённае адзенне. Ад бліскучых касцюмаў і шырокіх каралавых гальштукаў таксама адмоўцеся.

— Усё павінна гарманіраваць. Памятайце, што да кожнага каўнерыка пасуе пэўны гальштук. Рукавы кашулі мусяць выглядаць з-пад пінжака на два сантыметры. Трэба правільна падабраць памер: часта хлопцы пераацэньваюць свой аб'ём у плячах, думаюць, што яны вялікія і натрэніраваныя, — кажа Дарына.

Што да абутку, то ідэальным варыянтам будуць туфлі ці брогі (чаравікі ў дзірачкі). Ніякіх макасінаў. Красоўкі, якія цяпер модна насіць пад касцюмы, таксама не падыдуць: яны хоць і выглядаюць стыльна, але ніякага дачынення да вячэрняга дрэс-кода не маюць. Пры падборы абутку ўлічвайце колеравую гаму — нельга пад шэрыя штаны надзець карычневыя туфлі.

— Фантазію ўключаць не трэба, — раіць Дарына. — Усё ўжо за вас прыдумана. Лепш проста добра апрануцца, чым праз колькі гадоў з жахам успамінаць і саромецца свайго выгляду.

Забудзьцеся на гарсэты

Калі казаць пра дзяўчат, дызайнеры смяюцца, што тыя звычайна дзеляцца на два лагеры: адны хочуць быць на выпускным разняволенымі і дарослымі, іншыя — стаць прынцэсамі. Апошні варыянт у прынцыпе неблагі. Пышныя спадніцы, сукенкі да падлогі ці з невялікім шлейфам заўсёды да месца на ўрачыстых мерапрыемствах. Уборы жамчужнага тону, з карункамі ці кветкавым прынтам таксама наблізяць вас да вобразу прынцэсы.

У пыш­най спад­ні­цы бу­дзе­це ад­чу­ваць ся­бе прын­цэ­сай.

А вось ператварацца ў дарослую жанчыну і надзяваць занадта адкрытую сукенку не варта.

— Лепш, наадварот, падкрэсліць сваю свежасць і маладосць. Цяпер у модзе натуральнасць, — заўважае Аляксандра. — А стварыць сексуальнасць можна альтэрнатыўнымі метадамі, за кошт шматслойнасці, карункаў. Калі глыбокі выраз, то на спіне.

Гарсэты і міні-спадніцы — дакладна не. Папулярныя не першы сезон камбінезоны таксама пакіньце для іншага мерапрыемства: такі ўбор выглядае строга і можа прыбавіць узросту. Звярніце ўвагу на матэрыял, з якога пашыты ўбор. У сінтэтыцы ў перапоўненай актавай зале і на танцпляцоўцы будзе горача. Лепш узяць бавоўну, шоўк, сацін.

Калі хочацца выглядаць арыгінальна і вылучацца сярод астатніх выпускніц, можаце паўтарыць вобраз куміра з кіно.

— Я на свой выпускны выбрала стыль Мэрылін Манро, — успамінае Аляксандра. — Было і незвычайна, і элегантна адначасова, бо гэтая жанчына ў свой час з'яўлялася іконай стылю. Пераглядзіце любімы фільм, знайдзіце сукенку, падобную да той, што носіць у кадры гераіня, зрабіце такую ж прычоску і будзеце ведаць, што гэта ўдала, бо ўжо праверана.

Су­кен­ка да пад­ло­гі на ўра­чыс­тых ме­ра­пры­ем­ствах заў­сё­ды ў тэ­му.

Трэнды ж у вячэрняй модзе асабліва не змяняюцца. Прыталены сілуэт заўсёды лічыўся самым прыгожым.

— Мне здаецца, убор на выпускны мусіць быць сціплым і элегантным. Простая лёгкая сукенка з мінімальным дэкорам — найлепшы варыянт, — кажа Дарына. — А пры выбары колеру і фасону не варта прытрымлівацца нейкіх трэндаў: перавагу трэба аддаваць таму, што пасуе канкрэтна табе.

lubneuskaya@zvіazda.by

Загаловак у газеце: Ніякіх міні і макасінаў!

Выбар рэдакцыі

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Капыльскі раён. Мінулы год можна назваць стабільным

Капыльскі раён. Мінулы год можна назваць стабільным

Чым Капыльскі раён жыве сёння і якія планы на перспектыву?

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».