Пакуль яе калекцыя складаецца з сямі твораў, якія, вядома ж, маюць прамое дачыненне да таго, чаму ў гэтым універсітэце вучаць. Для студэнтаў адкрытая выстаўка стала чарговым напамінам, што ў будучыні яны, як педагогі, будуць перадаваць высокія ідэі і добрыя памкненні падобна тым, хто ў беларускай гісторыі вядомы як асветнік. Як Еўфрасіння Полацкая, Мікола Гусоўскі, Кірыла Тураўскі, Францыск Скарына, Сымон Будны, Васіль Цяпінскі, Сімяон Полацкі. Новая галерэя адкрылася 30 верасня ў будынку Беларускага дзяржаўнага педуніверсітэта імя Максіма Танка з сямю партрэтамі згаданых асоб і пад назвай «Асветнікі зямлі беларускай».
Аўтарамі работ сталі выкладчыкі факультэта эстэтычнага выхавання Георгій Лойка (куратар стварэння серыі партрэтаў), Мікалай Андруковіч, Алена Шлегель, Каміль Камал, Леанід Гоманаў, Аляксандр Кошалеў, Леанід Данелія — яны перадалі свае работы БДПУ ў дар.
— Гэта знамянальная падзея ў жыцці нашага ўніверсітэта. Сімвалічна, што галерэя пачынае сваю работу перад нашым прафесійным святам — Днём настаўніка, і адкрыццё яе адбываецца ў Год культуры, — кажа рэктар педагагічнага ўніверсітэта Аляксандр Жук. — Наша краіна мае багатую і слаўную гісторыю, прадстаўленую славутымі асобамі. Кожнага з іх хвалявалі не толькі ідэі гуманізму, духоўнай чысціні і служэння сваёй радзіме, але і выхаванне, адукацыя беларускага народа. Яны былі сапраўднымі асветнікамі і педагогамі ў розныя перыяды нашай мінуўшчыны і склалі той трывалы падмурак, на якім і ў сённяшні час трымаюцца адукацыя, навука, педагогіка, выхаванне. На прыкладзе іх жыцця фарміруецца светапогляд сучаснай беларускай моладзі.
Галерэя «Асветнікі зямлі беларускай» стала састаўной часткай экспазіцыі музея педагагічнага ўніверсітэта.
Соф'я КІСЯЛЁВА
Сумесныя праекты ядзерных тэхналогій.
