Сёння мы прапануем чытачам песню «Не за вочы чорныя» — адзін з самых пранікнёных твораў беларускага класіка Юрыя Уладзіміравіча Семянякі (1925—1990), славутага кампазітара, лірыка, рамантыка, мастака з аптымістычным светаўспрыманнем.
Яго музыка прасякнута цеплынёй, задушэўнасцю, глыбокім пачуццём. Кампазітар лічыў, што «па прыродзе сваёй музыка — шчыры голас сэрца», і пацвярджаў гэта ўсёй сваёй творчасцю. Пяру кампазітара належаць оперы, музычныя камедыі, кантаты, рамансы, хоры. Але вялікае прызнанне знайшоў менавіта ў песні. «Ой, шумяць лясы зялёныя», «Явар і каліна», «Люблю цябе, Белая Русь», «Ты мне вясною прыснілася» і многія іншыя — каштоўная спадчына музычнай культуры Беларусі.
Аўтар слоў песні Адам Русак (1904—1987) — славуты беларускі паэт-песеннік і музыкант. Найбольшую папулярнасць у свой час атрымала яго песня на музыку І. Любана «Бывайце здаровы».
У песні «Не за вочы чорныя» ў розныя гады было шмат выканаўцаў, але, на мой погляд, найбольш удала яе выканаў жаночы ансамбль «Чараўніцы».
Паспрабуйце праспяваць яе. Думаю, вам спадабаецца.
Не за вочы чорныя
Ціха растрывожыла
Думкаю-бяссонніцай
Вечна неспакойная
Ты, любоў мая.
Не за вочы чорныя,
Не за бровы смуглыя,
А за сэрца шчырае
Палюбіла я.
Знаю, не праложаны
Мне дарогі роўныя,
Кветкамі не сцелюцца
Сцежкі у жыцці.
Пушчамі глыбокімі,
Горамі высокімі,
Рук не разнімаючы,
Нам з табой ісці.
Засвяціся яснаю,
Светлаю, нязгаснаю
Зоркаю шчасліваю
Ты, любоў мая.
Не за вочы чорныя,
Не за бровы смуглыя,
А за сэрца шчырае
Палюбіла я.
Нагадваем чытачам «Звязды», што працуе электронная скрыня pesnya@zvіazda.by, куды вы можаце дасылаць свае прапановы пра тое, з гісторыяй якіх песень вы хацелі б пазнаёміцца, якія словы і ноты пабачыць у нашай рубрыцы. Пішыце нам!
Рубрыку вядзе кампазітар Уладзімір КАРЫЗНА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
