На ўскрайку прыгожай вёсачкі Соміна, якая славіцца самым глыбокім на Брэстчыне возерам (36 метраў!), жыве член Беларускага саюза майстроў народнай творчасці Ала КАПЫЦІЧ, майстар, дзякуючы якому адрадзіліся традыцыйныя палескія гліняныя цацкі. І не толькі.
— Вы, можа, ці памятаеце: некалі па вуліцах ездзілі так званыя анучнікі, — успамінае Ала Фёдараўна. — Яны збіралі розную старызну, а здатчыкам прадавалі свіцёлкі ў выглядзе птушачак. Я заўсёды бегала іх купляць і потым захоўвала, як самае дарагое.
Таму не дзіва, відаць, што пасля школы дзяўчынка паступіла ў Бабруйскае мастацкае вучылішча на аддзяленне керамікі; не дзіва, што, скончыўшы яго, атрымала накіраванне ў Акадэмію мастацтваў. Праўда, вучыцца там ёй не давялося, але прафесіі дзяўчына не здрадзіла.
— Гліна бывае розная, — расказвае Ала Фёдараўна, — чырвоная, белая, блакітная, жоўтая — у залежнасці ад дабавак-мінералаў. Яе можна купіць гатовую, аднак я люблю прыродную. Сама разведала дарогу ў вёску Гарадная, што на Століншчыне, і цяпер прывожу гліну адтуль. Праўда, і туды не з пустымі рукамі ездзіла — завозіла свае цацкі. Гарадчане ім вельмі здзіўляліся, а потым і самі ўзяліся рабіць. Цяпер там сучасны ганчарны цэнтр, людзі працуюць, грошы зарабляюць. Адзін ганчарны круг, што туды набылі, пад чатыры тысячы долараў каштуе. Сядзеш за такі і нават не ўмеючы нешта зробіш! Асалода за ім працаваць!
Той, за які садзіцца Ала Фёдараўна, высокі, быццам трон. Побач — міска з вадой, каб спалоскваць рукі.
Круг гудзе, рыпіць, круціцца... Невялічкі камячок гліны, як жывы, «прыслухоўваецца» да рук гаспадыні, выцягваецца, лашчыць пальцы яе далоняў — ператвараецца ў адмысловы гаршчочак.
— Вось якія мы атрымаліся! — хваліцца нарэшце майстар, трымаючы твор на шэрай мокрай далоні, і потым прызнаецца, што гліна для яе, як лекі, што ў Гарадной іх, гэтых лекаў, цэлае радовішча!
Яна сама наймае машыну і ездзіць туды за 150 кіламетраў. Сама капае і грузіць. Сама перабірае ад камянёў, каранёў і смецця... Дома замочвае ў вадзе, а «лішнюю» ў цэлафане закопвае ў зямлю на захаванне, каб потым, нават у маразы, можна было адрэзаць.
Але і тады гэта яшчэ не матэрыял: гліну трэба перацерці рукамі, замяшаць, сфармаваць у так званыя бабкі, якія потым і трапляюць на ганчарны круг.
— Працуеш і забываеш пра ўсё, — кажа майстар.
Потым, на толькі што сфармаваныя вырабы, яна запалкай, гелевым стрыжнем альбо драўляным стэкам наносіць узор і кладзе на прасушку: дробныя рэчы на суткі-паўтара, вялікія — часам на месяц, пасля чаго творы трапляюць у печ...
— Шмат клопату. А таму, напэўна, цяжка развітвацца са сваімі творамі? — пытаем у майстра.
— Так, сапраўды, жыццё іншы раз прымушае прадаваць, нават дарагія рэчы. Такіх вось лялек я зрабіла, напрыклад,толькі дзве. Рукі і ногі ў іх рухомыя, кветкі на сукенцы і пацеркі ў валасах — з гліны, вяночак таксама... Тонкая работа, укладзена столькі душы... Але я супакойваю сябе тым, што падарыла некаму радасць.
Не без таго: фігуркі птушачак, конікі, жабкі, змейкі, бабулькі на казе, дзядулі з гармонікам, Зюзя, пеўнікі... Усё эксклюзіўнае, цёплае навобмацак і нейкае роднае.
А яшчэ Ала Капыціч распісвае куфры, малюе: яе пейзажы, нацюрморты, партрэты ўпрыгожваюць сцены дома. Аднак захапленне глінай — справа жыцця.
З апошняга Міжнароднага пленэру, на які ў Гарадную з'ехаліся майстры народнай творчасці з 12 краін свету, Ала Капыціч прывезла Дыплом пераможцы. Не першы і, вядома ж, не апошні.
Валянціна БОБРЫК, г. Івацэвічы
Фота Валерыя МІСКЕВІЧА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.