Трэцякурсніца факультэта міжнародных адносін БДУ Аляксандра Янушкевіч заваявала тытул “Найлепшы прамоўца” на 20-м Міжнародны конкурсе па міжнародным гуманітарным праве імя Ф.Мартэнса ў Маскве.
Акрамя таго, каманда ФМА БДУ стала чацвёртай сярод студэнцкіх зборных.
Конкурс праходзіць у фармаце ролевай гульні. Удзельнікі выступаюць прадстаўнікамі юрыдычных дарадцаў, Міжнароднага камітэта Чырвонага Крыжа, розных праваабарончых арганізацый, даследчых інстытутаў, кіраўнікоў дзяржаў і нават тэрарыстаў. Камандам даводзіцца прымаць рашэнні ў розных выдуманых сітуацыях узброенага канфлікту. Прававыя пазіцыі распрацоўваюцца ў адпаведнасці з міжнародным гуманітарным правам. Ацэньваецца таксама ўменне аргументаваць свае сцвярджэнні і рэагаваць на стрэсавыя сітуацыі.
Усяго ў конкурсе прынялі ўдзел 18 студэнцкіх каманд з Расіі, Беларусі, Малдовы, Азербайджана, Туркменістана, Арменіі і Кыргызстана.
Арганізатарам інтэлектуальнага мерапрыемства выступае Рэгіянальная дэлегацыя Міжнароднага камітэта Чырвонага Крыжа ў Расіі, Беларусі і Малдове.
Конкурс носіць імя Фёдара Фёдаравіча Мартэнса — аўтара ”агаворкі Мартэнса”, расійскага юрыста, дыпламата, аднаго з заснавальнікаў расійскай школы міжнароднага права, які сфармуляваў адзін з асноватворных прынцыпаў міжнароднага гуманітарнага права.
Па выніках конкурсу журы прысуджае кубак імя Мартэнса лепшай камандзе і прыз лепшаму прамоўцу.
Надзея НІКАЛАЕВА
Сумесныя праекты ядзерных тэхналогій.