На пачатку новага навучальнага года на беларускае тэлебачанне зноў прыйдзе праект для школьнікаў. Пакуль жа стартавалі адборачныя туры шоу «Я ведаю!», якое ладзяць Генеральны прадзюсарскі цэнтр Белтэлерадыёкампаніі сумесна з Міністэрствам адукацыі.
Інтэлектуальнае спаборніцтва збярэ з усіх рэгіёнаў Беларусі самых эрудзіраваных і таленавітых школьнікаў 5—11-х класаў, а таксама іх настаўнікаў. Прычым папярэдне ўсім ім давядзецца прайсці адбор, адказваючы на пытанні па розных прадметах і выконваючы заданні (розныя ў кожнай вобласці, у тым ліку і творчыя). Пераможцы адборачных тураў будуць вызначаны да 8 верасня гэтага года і трапяць уласна на здымкі тэлепраекта «Я ведаю!». Усяго, як расказалі «Звяздзе» ў Белтэлерадыёкампаніі, запланавана для паказу 33 выпускі ў некалькі этапаў, а ў фінале будуць вызначаны 7 пераможцаў — з кожнай заяўленай паралелі, якіх арганізатары адзначаць дыпломамі і каштоўнымі падарункамі для ўсяго класа.
Больш падрабязна з палажэннем і ўмовамі праекта можна пазнаёміцца на афіцыйным сайце www.tvr.by.
Вікторыя ЗАХАРАВА
Сумесныя праекты ядзерных тэхналогій.