Як расказалі арганізатары, фінальная гранд-баталія стане не толькі адной з найбуйнейшых у Беларусі, але і адной з самых відовішчных дзякуючы тэатралізаваным элементам, уключаным у шоу.
Трэці па ліку фестываль-рэканструкцыя «Залатая шпора — 1812» пройдзе 11 чэрвеня на базе аднайменнага конна-гістарычнага клуба ў вёсцы Міжрэчча Валожынскага раёна.
На цэлы дзень гледачы пагрузяцца ў 1812 год, у «эпоху апошняй прыгожай вайны» — з балямі, баталіямі, дуэлямі, народнымі кірмашамі, шляхетнымі пікнікамі і шабельнымі баямі.
Адкрые фестываль гранд-паланэз, у якім па сядзібе пройдуцца прыгожыя паненкі і бравыя афіцэры. Затым пачнецца Адкрыты гасцявы баль. У ім змогуць прыняць удзел і гледачы. Калі нехта ні разу не танцаваў мазурку і пра катыльён мае вельмі расплывістае ўяўленне, танцмайстар навучыць рухам і па.
На шабельных выступленнях будзе прадстаўлена шабельная школа Рэчы Паспалітай, якая з XVІІ стагоддзя славілася як найлепшая ў Еўропе. Шабля заўсёды лічылася высакароднай зброяй, валоданне ёю было абавязковым для шляхціца. Таксама на фестывалі можна будзе ўбачыць і школу еўрапейскай шпагі.
У кавалерыйскіх спаборніцтвах бравыя ўланы і гусары пакажуць майстэрства коннага бою, прыёмы валодання шабляй і пікай.
Спецыяльна для тых, хто хацеў бы прымераць на сябе мундзір 1812 года, пройдуць «Рэкруцкія гісторыі» ці набор гледачоў у пяхотныя палкі абедзвюх армій. Прыхільнікам этнаграфіі і фальклору будуць цікавыя народныя песні і гульні на Траецкім кірмашы.
Адбудзецца таксама гістарычнае дэфіле, падчас якога госці фэсту больш даведаюцца пра адзенне і моду XІX стагоддзя.
Завершыць фестываль відовішчная гранд-баталія, дзе сыдуцца войскі Вялікай арміі Напалеона і Рускай імператарскай арміі. Увесь дзень на свяце будзе працаваць сапраўдная карчма XІX стагоддзя. Арганізатары абяцаюць смачную ежу са свежых фермерскіх прадуктаў.
Пачатак фестывалю ў 11.00, завяршэнне — а 18-й гадзіне.
Сяргей РАСОЛЬКА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
