Чэмпіянат свету па праграмаванні сярод студэнтаў — найбуйнейшыя міжнародныя спаборніцтвя, якія збіраюць маладзёжную эліту сусветнага праграмавання. Ён праводзіцца ў тры этапы: чвэрцьфінал, паўфінал і фінал.
Паўфінал Паўночна-Усходняга Еўрапейскага рэгіёну праходзіў адначасова ў Санкт-Пецярбургу, Барнауле, Тбілісі і Ташкенце. Беларусь у Санкт-Пецярбургу прадстаўлялі 10 каманд: пяць каманд ад БДУ, тры — ад БДУІР і па адной — ад Гродзенскага дзяржаўнага ўніверсітэта ім. Я. Купалы і Магілёўскага дзяржаўнага ўніверсітэта імя А. Куляшова.
А ўсяго ў паўфінале чэмпіянату спаборнічалі 174 каманды з 12 краін: Беларусі, Расіі, Латвіі, Літвы, Эстоніі, Казахстана, Грузіі, Арменіі, Азербайджана, Кіргізіі, Туркменістана і Узбекістана.
Кожнай зборнай з трох чалавек быў прадастаўлены адзін камп’ютар і пяць гадзін для вырашэння 12 задач. Умовы задач падаваліся на англійскай мове. Ад студэнтаў патрабавалася распрацаваць алгарытм, даказаць яго правільнасць і аптымальнасць, напісаць праграму на адной з моваў праграмавання і адправіць для праверкі ў аўтаматызаваную сістэму. Перамога прысуджалася камандзе, якая рашыла найбольшую колькасць задач за адведзены час. Па правілах правядзення спаборніцтваў, прадстаўляць у фінале ўніверсітэт можа толькі адна каманда.
Каманда, якая будзе прадстаўляць Белдзяржуніверсітэт у фінале, складаецца са студэнтаў факультэта прыкладной матэматыкі і інфарматыкі. У яе склад увайшлі першакурснікі Фёдар Карабейнікаў, Ягор Дубовік і магістрант Канстанцін Вільчэўскі. Таксама на рахунку студэнтаў-праграмістаў БДУ ў паўфінале тры дыплома другой ступені і адзін — трэцяй ступені.
Варта адзначыць, што зборная БДУ адзіная ад Беларусі заваявала права выступіць у фінале, які пройдзе ў красавіку ў Пекіне. Беларускія каманды ўдзельнічаюць у чэмпіянаце свету па праграмаванні сярод студэнтаў, пачынаючы з 1995 года. За ўсю гісторыю выступлення на чэмпіянатах у скарбонцы студэнтаў БДУ залаты медаль (2004 год., Чэхія), “бронза” (2008 год., Канада) і дзве “сярэбраных” узнагароды (2012 год, Польшча і 2013 год, Расія).
Надзея НІКАЛАЕВА
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.