Вы тут

«Камунальныя» планы на 2018-ы: дыспетчарызацыя і замена вокнаў


А таксама інфармаванне праз месенджары.

Сёлета ў Мінску капітальна адрамантуюць каля 170 дамоў (875 тысяч м2 жылля), заменяць 1629 ліфтаў, навядуць парадак у 3577 пад'ездах і добраўпарадкуюць дзесяць двароў. Гэтымі і іншымі навінамі сталічнай жыллёва-камунальнай гаспадаркі падзяліліся спецыялісты.


Ліфты ў мінусе, лямпачкі — у плюсе

Жыхары будуць абавязаны ўдзельнічаць у цеплавой мадэрнізацыі дома падчас капрамонту. Чым большая эканомія ад цеплавой мадэрнізацыі дома будзе атрымана, тым больш сродкаў будзе выдзелена на гэта з бюджэту, расказаў Ігар ГАНЧАРЫК, галоўны інжынер ДА «Мінская гарадская жыллёвая гаспадарка».

— Проста выкананая цеплавая мадэрнізацыя не дасць вялікага выніку. А калі замяніць вокны ва ўсіх кватэрах у доме (хто не зрабіў гэта — павінен будзе зрабіць), устанавіць сістэмы аўтаматычнага рэгулявання на ацяпляльныя прыборы, рабіць па іх разлік — вынік будзе. Калі мяркуецца, што эканомія цяпла пасля ўцяплення дома складзе больш за
50 %, то ад жыхароў спатрэбіцца аплаціць прыкладна 20 % кошту мерапрыемстваў. Астатняе кампенсуе бюджэт.

На капітальны рамонт у сталіцы, дарэчы, летась пайшло 52,6 млн рублёў адлічэнняў жыхароў і ўласнікаў і 68 млн — з бюджэту. На сёлетні капрамонт плануецца накіраваць 46,5 млн рублёў адлічэнняў насельніцтва і 62 млн з бюджэту.

На 2018-ы па праграме «Камфортнае жыллё і спрыяльнае асяроддзе» запланавана замяніць 1629 ліфтаў. Летась з запланаваных да замены 163  ліфта памянялі толькі 231.

Затое работа па замене звычайных лямпачак у месцах агульнага карыстання на святлодыёдныя свяцільнікі з датчыкамі гуку ці руху за 2017-ы выканана на 285 %. Грошы былі выдзелены на замену 49 тысяч свяцільнікаў, а памянялі — 121 тысячу. Сёлетняя колькасць пакуль удакладняецца

Прыборы ўліку, сістэмы рэгулявання, пад'езды і двары

Прыборамі індывідуальнага ўліку цяпла (ІПУ) у Мінску аснашчана 819 дамоў. З іх 737 — маюць прамапаказваючыя прыборы ўліку, а 123 дамы аснашчаны размеркавальнікамі цеплаэнергіі. Пры гэтым разлічваюцца па паказчыках толькі 568 дамоў, заўважыў Ігар Ганчарык:

— Разлік па прыборах уліку ў сталіцы робяць тры падрадныя арганізацыі. Згодна з даручэннем Саўміна, у Мінску вызначаны яшчэ дзве арганізацыі, якія будуць дадаткова займацца абслугоўваннем прыбораў індывідуальнага ўліку. Гэтыя структуры будуць створаны на базе ЖЭУ Першамайскага раёна і УП «Белсантэхэнерга». Яны сёння гатовы ўдзельнічаць у гэтай рабоце. А непасрэдна разлікамі зоймецца Цэнтр інфармацыйных тэхналогій.

Абслугоўванне ІПУ летась каштавала ад 5,1 да 10,8 рубля ў залежнасці ад арганізацыі і спосабу, якім рабіўся разлік: адзіны пераразлік пасля заканчэння ацяпляльнага перыяду або раз на месяц. Паверка прыбору ўліку цяпла са зняццем і наступнай устаноўкай абыходзіцца ў 63—70 рублёў, аднак паверку цяпер робяць толькі пры неабходнасці, калі прыбор выйшаў са строю, дадаў спецыяліст.

Летась 26 сталічных дамоў абсталявалі 50 сістэмамі аўтаматычнага рэгулявання цеплаэнергіі. 63 сістэмы з тэрмінам эксплуатацыі больш за дзесяць гадоў былі заменены.

— Старыя сістэмы немагчыма падключыць да дыстанцыйнага з'ёму паказчыкаў. Імі нельга кіраваць на адлегласці, — растлумачыў замену Ігар Ганчарык. — Новыя сістэмы дазваляюць без выхаду спецыяліста непасрэдна на дом кіраваць імі дыстанцыйна. У 2018-м запланавана ўстанавіць яшчэ 62 сістэмы рэгулявання.

Падчас бягучага рамонту запланавана адрамантаваць 179 тыс м2 даху, 212 тыс. м2 стыкаў панэляў, 140 тыс. м2 фасадаў, 1128 балконаў і 3577 месцаў агульнага карыстання (пад'ездаў). Двары таксама не застануцца сёлета без увагі.

— Раней усе двары рамантаваліся падчас капрамонту дома, пасля адпаведнай пастановы гэты від работ быў выключаны, і летась дваровыя тэрыторыі капітальна не рамантаваліся, — адзначыў галоўны інжынер. — Сёлета запланавана капітальна добраўпарадкаваць дзесяць дваровых тэрыторый у Мінску, па адной у раёне.

Затраты таннеюць, а тарыфы павялічваюцца аднойчы

Сёлета працягнецца таксама работа па зніжэнні затрат на аказанне жыллёва-камунальных паслуг, якая ўстаноўлена дзяржпраграмай «Камфортнае жыллё і спрыяльнае асяроддзе», паведаміла Юлія САГАЙДАК, намеснік генеральнага дырэктара ДА «Мінская гарадская жыллёвая гаспадарка». Летась зніжэнне склала звыш 17 млн рублёў. Сёлета плануецца зменшыць на 9 млн.

— Аптымізацыя нормаў і нарматываў па аказанні ЖКП, аптымізацыя і пераразмеркаванне колькасці, зніжэнне энерга- і электраспажывання — сродкі, што дазваляюць зменшыць затраты на камунальныя паслугі, — адзначыла яна. — Вялікі ўплыў аказвае таксама рэалізацыя механізма ўстанаўлення планава-разліковых цэн. Прадпрыемствы першапачаткова разлічваюць свае затраты на паслугі, пасля чаго тарыфы ўзгадняюцца ва ўвязцы з гэтымі затратамі.

Сёлета тарыфы на ЖКП павышаць пасля студзеньскага падаражання больш не плануецца. Лічбы «жыровак», якія атрымаюць у лютым за студзень жыхары двухпакаёвай кватэры з прапісанымі ў ёй трыма жыхарамі пры ўмове нарматыўнага расходу камунальных рэсурсаў павялічацца прыкладна на 10 рублёў, дадала спецыяліст.

Чат-бот і месенджары ў службе 115

Атрымліваць аператыўную інфармацыю пра адключэнне інжынерных сетак праз Vіbеr або Tеlеgrаm сёлета змогуць беларусы, якія зарэгіструюцца на партале «Мой Горад»115.бел. і пагодзяцца на рассылку. Пра гэта расказаў Ігар КІРЫЛЕНКАЎ, начальнік упраўлення «Кантакт-цэнтра» КУП «Цэнтр інфармацыйных тэхналогій Мінгарвыканкама».

— Чат-бот, уведзены ва ўжытак у жніўні 2017-га, за пяць сутак запуску ацяпляльнага абсталявання больш за 347 тысяч разоў дапамог мінчанам даведацца, калі ў іх кватэрах з'явіцца цяпло. Так што гэта добры памочнік для кантакт-цэнтра, — падкрэсліў спецыяліст. — А ўвогуле кожныя суткі паслугамі чат-бота карыстаецца 500—700 мінчан.

Ігар Кірыленкаў нагадаў, што летась спецыялісты «Кантакт-цэнтра ЖКГ Мінска» прынялі больш за 1,6 млн званкоў, на падставе чаго зарэгістравана звыш 1,9 млн заявак, каля 800 тысяч з якіх — гэта ўдакладненне пэўнай інфармацыі. Асноўныя катэгорыі, што па-ранейшаму хвалююць людзей, — водазабеспячэнне, электраработы і санітарны стан.

Як і раней, заяўкі аварыйнага або перадаварыйнага характару ў начны час і святочна-выхадныя дні накіроўваюцца для выканання ў гарадскую аварыйную службу. Летась спецыялісты службы газу, напрыклад, выканалі больш за 114 тысяч такіх заявак.

Службу 115 да канца 2018-га плануецца ўкараніць ва ўсіх абласных гарадах Беларусі.

Ірына СІДАРОК

sіdarok@zvіazda.by

Дадаць каментар

Выбар рэдакцыі

Грамадства

Партызанскія рукапісы — бясцэнныя сведчанні ваеннага часу

Партызанскія рукапісы — бясцэнныя сведчанні ваеннага часу

Партызанскія часопісы — насамрэч унікальныя інфармацыйныя зборнікі, значэнне і важнасць якіх разумелі ў тым ліку іх стваральнікі і чытачы.

Грамадства

Беларускія навукоўцы прадставілі больш за 300 распрацовак і тэхналогій

Беларускія навукоўцы прадставілі больш за 300 распрацовак і тэхналогій

На юбілейнай выстаўцы Нацыянальнай акадэміі навук.

Эканоміка

Ніна Жалязнова: Мы, беларусы, па сваёй ментальнасці — людзі зямлі

Ніна Жалязнова: Мы, беларусы, па сваёй ментальнасці — людзі зямлі

«Звязда» ўжо неаднойчы пісала пра гэту незвычайную жанчыну.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ўрокі іншай мовы і шчасце, калі ў доме гаспадар.